على حس الطبل

سعيد حسين عليوي

الحوار المتمدن-العدد: 3190 - 2010 / 11 / 19 - 12:35
المحور: الادب والفن
    

ركضنه ويه الطبل
والركضه وجعانه
لا شفنه الفرح
لا انطونه عنوانه
او ركضتنه صفت
هم شغله تعبانه
ملينه الركض
ما اعرفنه تاليه
على حس الطبل خفن يرجليه
چم مره او نرد
نزلگ بهيچ غيوم
نترجه المطر
والفرح يمنه يدوم
يوميه بدرب
وتشابكت الهموم
تاليه صفت
بيد الحراميه
على حس الطبل خفن يرجليه
حسبوها صحيح
او ترسوْ الجيوب
خبرتهم قديمه
تعلموا الدروب
من قال وبلى
بيهم طبع چلوب
وحسبتنه سواد
مخربطه النيه
على حس الطبل خفن يرجليه
يرجليه شجاچ
اليوم متركدين
دشوفيهم عمايم
لاچن مچطلين
شويه من النفط
شويه من المخمسين
وعلايجنه فگر
ما عدنه عيديه
على حس الطبل خفن يرجليه
شنسوي بعد
نركض ويامن عاد
انطوهه صبر
وافتهموا يا اولاد
تره كلهم دغش
ساس الچذب واوغاد
خلونه نبيع
الدين والدنيه
على حس الطبل خفن يرجليه
والله العن ابو
الجابنه هل البستات
شيعه وسنه
وسوالف هل المسلگات
مو چنه مثل دهن
ودبس بالفات
شجانه وصرنه
مثل البطنج وحيه
على حس الطبل خفن يرجليه
اويلي يا وطن
شحچي بعد وياك
والله مستحي
فشلونه هل الاشواك
ما عدنه ذنب
هو ذنب نهواك
وهاي الخصله
مزروعه وعراقيه
على حس الطبل خفن يرجليه
**********************************

#سعيد_حسين_عليوي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل