دردشة مع والدتي .... حول حوار قناة العراقية مع المالكي .... (10) ....؛؛

علي الأسدي

الحوار المتمدن-العدد: 3087 - 2010 / 8 / 7 - 13:43
المحور: العلمانية، الدين السياسي ونقد الفكر الديني
    

كانت والدتي تصغي باهنتمام إلى المؤتمر الصحفي الذي تحدثت فيه الناطقة باسم وزارة التجارة عن الحريق الذي حصل فيها يوم الثلاثاء 3 أب ، حي نفت أن يكون الحريق مدبرا من أي طرف ، وأنه كان نتيجة مس كهربائي.
علقت والدتي قائلة : الحمد لله رب العالمين اللي ما راحت أرواح ناس بها الحريق ، كلشي ولا أرواح الناس. لكن شي ما دا أفتهمه يمة ، أشو اهوايا حرايك دصير هالايام بالوزارات وكبلها بالبنك المركزي ، وكلهه كالوا عليهه بسبب الكهرباء ، هذا عمري كله ما سمعت فد يوم احتركت دائرة حكومية لو بنك بالمس الكهربائي ، لا بزمن صدام ولا كبله ، أي شعجب هالوكت صارت الحرايك بفلس؟ عفية كهرباء كل هالحرايك والناس تصيح وتكول ما كو كهرباء ، والله يا ابني مادا نفتهم الصدك من الجذب. احنا من يوم اشترينا المحولة لي هسة ماشفنة كهرباء الوطنية ، لكن أكو ناس عدها كهرباء ليل نهار ، ما تعرف شلون مدبريهه ، الله لا يجعلهه غيبة ، يكولون اليدفع من جوه ليجوه يحصل كهرباء الوطنية ، لكن شلون ما يندره ، الله يبعدنه عن الحرام واهله.
أكلك يمة ، خليت بالك على حجي المالكي البارحة عالعراقية ، ماجان على بعضه ، ومبين عليه زعلان هواية من حجايات السيد الحكيم ، واتريد الصدك حكه لو يزعل ، لأن حجايات الحكيم مو بمكانهه ،ومجان لازم تطلع منه ، يعني لو طالعة الحجاية من غير واحد بيهه وجي ، لكن من الحكيم اللي هوه عليه حجي هواية ، لا والله تعدي ، والمالكي مو غشيم ويعرف بكلشي ، وراح يجي يوم ويكشف المستور ، بس هو طلع عاقل وما رد عليه. أم عبد السادة حجتلي حجي على جماعة المجلس يشيب الراس ، وهاي مو وحدة شلون ما جان ، يمة لو أحجيلك اللي سمعته مجان صدكت. واني تره هم سامعة حجي هوايه عالمالكي ، لكن انشالله ربي ماتطلع صدك ، واني ما اريدله لهال الرجال غير الخير، واذا الله اطاني عمر راح اكلك فد يوم عالشي سامعته عن الحكيم وجماعة الصدر والفضيلة والجعفري ، بس لا تكول لحد ؛؛
لكن يومه تريد الصدك ، تره جماعتنا من صاروا بالحكومة ما بيضوا وجي لا تكلي ولا أكلك خجلونه ، لا خدموا شعب ولا شي ، من صار الحكم بيديهم نسوا كلشي ، وشفنه الضيم من وره شكم واحد مايسوى فلس ، يمة ماجان لازم يخلون البطاقة التموينية بيد ناس نهابة ما عدهه لا غيرة ولا ضمير، اللي لحكوا الفقير والمحتاج بلكمة الخبز. يمة شفنه العجب ، طحين فاسد ، والجاي عبالك تبن ، وراحت مواد البطاقة وحدة وره اللخ ، هو هيج تاليها ، جانوا يحجون على زمان صدام ، والله البطاقة التموينيه جانت أحسن ألف قاط بوكته، وعيب عليهم بعد يحجون ، لأن اللي سووه هو اللي كبر صدام بعين الناس ، وهذا الحجي أحجيه اليعجبه يعجبه المايعجبة يطك راسه بالحايط ، آني وحدة محكانية وما أحجي غير اللي أشوفه صح. أشو بدل مايحسنون مواد التموينية للناس المحتاجة حتى يتحسن حالها ، راحوا كرمطوهه وصارت هي والماكو سوه ، يمة صرنا بحلك لليسوه والمايسوة. لكن أكلك يمة ، أكو ناس تتعب دكول عليهم خوش أوادم ، كلهم علم وفهم وأخلاق وشهادات ، لكن وين اللي يخليهم يوصلون ويفيدون بلدهم ، واكفين الهم ركبة ونص ، وما يعينون واحد من غير جماعتهم ، صايرة هاي؟

أثارني قول والدتي ، وسألتها فورا : من تقصدين بجماعتنا؟

ردت على الفور: شنو انت تغشم نفسك يمة ، غير الجعفري والمجلس والدعوة والصدر والفضيلة منو غيرهم ، غير همه اللازمين الحكم من يوم الجو الأمريكان لهسه ، لكن شلون ماجان فرحنا بيهم وكلنا الحمد الله شلون ما يصيرون همه أشوه من غيرهم ، لكن شمدرينه هيج ايطلعون ، قابل شامين كفى ايدينا يا يمة ، لا علم لا فهم ، بس فادوا كرايبهم واحبابهم وجماعتهم من احزابهم ، وكلمن أخذ مكانه وكعد ، ونسى غيره. هيه هيج العدل ، يفركون كلشي بيناتهم ويتركون أولاد الخايبة يركضون والعشا خباز ، والله لو هيج الحكم بالاسلام جان آني أول وحدة أطلع عليه مثل ما طلع فدوة أروحلة ابو عبد الله الحسين على يزيد وحاربه. تمام احجي يمه لولا؟
وتابعت والدتي :
نرجع على مقابلة المالكي البارحة ، خليت بالك شنو كال عالتعمير ؟ آني أعرف انت ما تطي بالمالكي لو شميصير ، تكول هو أحسن الموجودين ،أني ما كول المالكي موخوش أدمي ، حشاه من الشين ، واللي سوا بالارهابية بيوم ذيج الكالو عليهه " جولة الفرسان " تنذكر له ، وما تننسي أبد ، وما كو واحد ابن حلال ما كال عليه عفية. يمة شكد أنقذ بيهه ناس ، وحط المجرمين كلهم بالسجن ، وآني مثلك أشوفة خيرالموجودين ، لكن أكو اشياء هوايه جان يكدر يسويهه ما سواها ، وهو هذا اللي اعتب بي عليه.
سمعته يمة شكال على تعمير البلد؟
كال عمرنا ضريح الامام العسكري بسامرا ، لكن يمة مو صغرا بالامام روحي فداه ، بس هذا موحجي رئيس حكومة مسئول عن شعب بي شيعة وسنة ومسيحيين ، افتهمت من حجايته عبالك الشعب العراقي كله شيعة ، مو السنة هم تفجرت جوامعهم ، والمسيحيين انحركت كنايسهم ، شعجب ما اهتم بتعميرها ، شنو هيه مو عزيزة عليهم ، لو همه مو عراقيين؟

بعدين يمة ، تعمير مرقد لو جامع ما يوكل خبزة ، عدنا فقرة ومحتاجين هايمة بالخرايب ، ما عدها شتاكل وتشرب لو وين تسكن ، لأن لا شغل ولا عمل عدهم ، وفوكاها تركض وراهم البلدية وتهججهم من مكان لمكان. وهذا اللازم تهتم بي الحكومة. صحيح أكو هواية اعمال ارهابية ، لكن كلشي لازم يمشي بشغله ، يعني أبو وزارة الصناعة لو أبو الصحة مو يكعد ويصفن حتى يوكف الارهاب ، صدك يمة لو مو صدك ، انت تعرف شنو حال مستشفى المجيدية ، اللي يكولون عليهه مدينة الطب ، يمة ما كو بيهه أطباء ، لعد شيكول اللي يروح المستشفى الكرخ لو الكاظمية لو بالمحافظات ، يمة حالهه يبجي؟ وتريد الصدك يمة ، تعمير المراقد موشغل رئيس الحكومة ، هذا شغل دائرة الأوقاف لو المرجعية الدينية ، وهمه ماشا الله موناكصين أموال ، ويكدرون يعمرون بأموالها مستشفيات ومدارس ودور ايتام. آني خليت بالي على كل جلمة الكالها المالكي ، ما جاب طاري مشروع صناعي واحد انبنى بهالبلد ، أي تصير هاي ، وصارله خمس سنين بالوزارة ، انت تعرف يمة أحسن مني ، آني مرية على كد حالي ، أكول لو جان انبنى مصنع مال طابوك لو كاشي لو سمنت ، جان شكد شغلت ناس وفرحت أهاليهم ؟

لكن يمة حسرة بكلبي يطلع بالتلفزيون فد يوم ويفتتح فد محطة كهرباء ، بس أبد ، عمري خلص وما راح اشوف الكهرباء بالبيت ليل نهار مثل كبل ، وهاي راح تصير النه سبع سنين والكهرباء على حطة ايد أياد علاوي والجعفري اللي كاتلين نفسهم حتى يرجعون للوزارة. تدري يمة لو جنت اكدر أسأل المالكي ، وين صارت محطات الكهرباء اللي واعدنا بيها مملوص الركبة وزير الكهرباء وحيد ، اللي أني عادتهم وحدة وحدة ، يمكن شي 14 محطة.
هو بالمقابلة حجا الله يحفظه على تشكيل الوزارة لكن ما كال شي شلون راح ايحل مشكلته ويا علاوي لو ويا غيره ، إي هيه يريدلها روحة للقاضي يا يمة ، يا ابني ؟
آني أكول لو يتصافون بيناتهم ، كل شهر يصير واحد رئيس وزارة ، مثل ما جان بمجلس الحكم ، والجان يشوفون الشهر طويل ، خلي واحد يصير رئيس وزارة بالنهار ، والثاني يصير بالليل ، أشو آني أشوفهه معقولة ، انت شتشوفه يمة ، لو هم اتكول عليه مخرفة؟
علي ألأسدي

#علي_الأسدي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل