هل انا مخبر ؟

محمود المصلح

الحوار المتمدن-العدد: 3022 - 2010 / 6 / 2 - 10:53
المحور: المجتمع المدني
    

هل أنا مخبر ...؟؟
يعني إذا بتقول كلمة حق بحق الحكومة بتكون مخبر .. وبتكون عميل .... وإذا بتوقف وبتسب وبتلعن وبتنتقد بتكون ، حر ومعارض ووطني وشريف وابن ناس ومناضل كمان ...... شايف المعادلة مقلوبة .. مخربطة .. ما إلها أول من راس .. وكأنها هالحكومة حكومة من جزر واق الواق أو من المريخ .
وبعدين هل من الممكن انه الحكومة كلها شر وما فيها الخير بالمرة ... يعني هالحكي مش معقول .. مجنون بحكي وعاقل بسمع .. وخليكوا انتو الحكم العادل صاحب العقل والناس مجانين . وما في حدى كامل بالدنيا .. يعني الحكومة بتغلط مثلها مثل كل الدنيا الواقعة بالغلط ..

يا أخي ما هي الحكومة حكومة منا وفينا وإحنا إلي عملتاها .. ويعني هو الرئيس والوزراء من وين جايين ... ولا من وين مستوردين .. مش هم منا وفينا وأولاد البلد زينا وزيادة ........ يعني هو مش زيادة كثير .

صحيح سحنتهم ناعمة وملساء ومبين عليهم العز ... مش مثلنا الواحد وجهه ما يضحك لرغيف الخبز الساخن ..ولو تضربه بالحيط ما برن .. وصحيح الجوع مبين فينا .. مش جوع كثير جوع شوي .... وصحيح انه وجبتنا القومية والوطنية صحن فول وحبتين فلافل .. وإذا طبشناها بنجيب كاسة شاي .. ولا قزازة ببسي ، مش علبة .. لانه القزازة ارخص بكثير مش شوي ... ومثل ما بيقولوها ... صرارة بتسند صخرة ... أو قطرة على قطرة بتسوي بحر ..

عفوا أنا وين رحت فيكم .... كنت بحكي انه الواحد إذا حكا عن الحكومة مليح بيقولوا هذا الزلمة مخبر ومن زلم الحكومة . ... وإذا حكا على الحكومة بيقولوا هذا الزلمة مسنود .. مدعوم .... اله ظهر كبير ..... والصحيح هما ما بعرفوا انه السند تبعو مخدة خربانة وانه إلي داعمه حيط خشن بدون قصارة ولا طراشة ...... يعني بلوك عالحل .......وانه بلا ظهر يعني ظهره ملزق ببطنه من الجوع ..

رايحين بقولو طيب ليش بقدر بحكي هالحكي ... أي في حدا بقدر يسب الحكومة .. أو بتهجم عليها أو بينتقدها إذا ماكان مدعوم .... او يعني بكون مخبر أو جاسوس الها ... او يعمل لحسابها ، وكأنا نحنا كلنا ما بنعمل عند الحكومة وبنستلم رواتبنا منها اخر الشهر بكل لهفة . حتى يشوف مين إلي بحكي عالحكومة حتى يبلغ عنه ويروح على بيت خالتو ..

يا عمي لا بيت خالتو ولا بيت عمتو حتى ولا مرة أبوه ..القصة ابسط من هيك ليش ما تفكروا بالموضوع من جوانب ثانية ..راحين بتقولا هات ورينا .. طيب صبركوا علي شوي :

ليش ما يكون إلي عم بحكي هالحكي ليش ما يكون مقهور ... مولعه معه ...... ما في معه حق بكيت دخان ولا وقية هيشي ......... يعني سلامة فهمكو طفران عالحديدية .. من قهره طلعت هالكلمتين .. وبس .
لا هو مع ولا ضد الحكومة وممكن بتسأله مين وزير الداخلية ... بقولك والله ما بعرف . طيب من رئيس الوزراء ... بقلك وأنا شو بهمني ... صح ولا غلط .... يعني هالحكي في منه ولا لا ء.
أو ليش ما يكون فهمان وشايف وعارف كل إلي عم بييصر بالحارة الكبيرة الكبيرة جدا .... ومش قادر بتصرف ولا بعمل اشي .. عاطل عن العمل ... معه شهادة وبدوه بتوظف ... أو ممكن بيكون موظف وبده يعمل حارس ليلي ومش طالع بيده . أنقهر .. وطلعت هالكلمتين .. وهو بتلاقيه هسه ندمان عليها اشد الندم .. مش لأنه حس حاله غلطان لا سمح الله .. لاء لأنه عارف حاله مار اح يستفيد ... وممكن الواسطة تبعو بتزعل منه وبتكحشه من الديوان وبتقوله :

( مطرح ما تقاقي روح بيض ... ) وسلامة فهمكوا ..ليش دخلنا الواسطة بالموضوع ؟

لأنه مين بدوه يتوسطلك غير واحد كان بالحكومة أو بعده بالحكومة او بيمون عالحكومة وبجيمع الحالات هو حكومة يعني ... ولأنه حكومة ما راح يطيبله يسمع حدا بنتقد هالحكومة أو بحكي عليها ... لأنه كأن هالحكي موجه اله شخصيا . او مثل ما بقولها :
( الحكي إلك واسمعي يا جارة )

وممكن بيكون إلي عم بحكي كثير حكي مثل جهاد علاونة .. حاب يتفشش بالحكي .. ومش لاقي مكان يحكي في أو بكتب فيه .. يعني طقت مرارة من السكوت ..شو بدوه يعمل حكى هالكلمة ... وصارا لي
صار ..ومثل ما بيقولوا :

الكلمة مثل الرصاصة إذا طلعت ما بترجع ..

وفي بعضهم بحكي حتى بنقول عنه أو بقول عنه الناس انه بطل .. وانه ما بخاف .. على رأي البعض ( ما بخاف إلا من إلي خلقه ..) وبتلاقيه كذاب ما بخاف الله ... بعمل كل الحلال والحرام ، ولو كان بخاف الله عن جد ما بعمل الي عم بعمله ، وبتلاقيه بخاف من كل الدنيا حتى من ابن جيرانهم الأزعر ضريب المواس شمام الأجو أو التنر ... أو من واحد بلعب بجهاز الإرسال اللاسلكي وعامل حاله مخبر أو من أجهزة الأمن وهو وبتلاقيه من عمال البلدية ..

وفي منهم بايعها ما هو سائل عن أشي بالدنيا .. يعني كيف ما اجت اجت وكيف ما صارت بتصير ... يعني شعاره كأنه:
قالوا لللقرد بدنا نسخطك قالهم شو أكثر من هيك ...
وبتلاقيه هذا الحزين يأسان فاقعه معه ..
وبالتالي احبابي :
إذا حكينا يا ويلنا وإذا ما حكينا ياولينا من . ..
وإذا سكتنا رايحن بتقولوا هيو ساكت مثل البس .. أكيد طلبوه وخوفوه وسكت ..
يا ناس هذا الحكي والله العظيم مش هز ذنب للحكومة ولا الكوا .. بدكو تصدقوا صدقو ، وما بدكو ا انتو احرار .. بس احنا بدنا نطلع حوالينا ونشوف العالم وين صار وين إحنا بعدنا واقفين .. وبدنا نعرف انه ابن الحكومة واحد منا وفينا .. ابن حمايل وعشاير وابن ناس .. والتعاون مع الحكومة في المجالات الكثيرة بتعود بالخير على الجميع .. وخلينا نحط ايدينا مع بعض .. اهل واحباب ... دون مناقرة ومصايحة ومناطحة ..
بدي احكي الكو هالكلمتين .. ورايح البعض منكو بيقولوا هذا محمود الصقور مخبر ... زلمه من زلم الحكومة... أنا موظف في الحكومة من عشرين سنة ، يعني بقدم خدمة للناس ، الله يعلم مخلصين ولا لاء بس احنا بنعمل إلي بنقدر عليه .. والزملاء في العمل بعرفوا احنا شو مواقفنا وشو شغلنا وبعرفوا انه احنا للجميع ومع الجميع .

شو بتعمل الحكومة غير ما ينفع الناس .. يعني أنا شايف هالحكومة كأنها خدامة للشعب .. خدامة الكو يا عالم يا بشر يا هو ...
يا ناس اذكروا الله ...

#محمود_المصلح (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات