خفافيش الليل/قصة أطفال من قصص ستي اليافاوية اللي لسه ما حكتها

عماد أبو حطب

الحوار المتمدن-العدد: 3010 - 2010 / 5 / 20 - 10:15
المحور: الادب والفن
    

صارلها ستي ستين سنة بتجمعنا وبتقول :"من الف سنة علقت حرب قاتل ومقتول بين الحيوانات والطيور".بس عمرها ما قالت ليش قامت هالحرب .كانت تبلش الحكاية بعد الصلاة على النبي بالقول:"لما بلشت الحرب
اصطفت الحيوانات مبسوطة بقوتها وكان في الصفوف الاولى اللي بياكلوا اللحوم ،ورتبوا حالهم ليهجموا على الطيور.وبنفس الوقت توزعت الطيور على الشجر وهي بتصرخ :احنا أقوى منهم ما راح يقدروا يوصلولنا وما تنسوا انه احنا أحلى منهم ومعنا الصقورة والنسورة والشواهين و كل الكواسر اللي راح يخلونا نكسب المعركة ضد الحيوانات.................الوحيد اللي ما عرف مع مين يروح كان الخفاش.....وبقي يفكر وهو واقف على شجرة بعيدة وعم بيتطلع على الحرب اللي راح تبلش.ولما حميت المعركة وبلشت الطيور تهجم على الحيوانات من السما وترجمها بالحجارة وتموت شوية منهم ،قال الخفاش لحاله:"مبين راحت على الحيوانات الكبيرة في حجمها والصغيرة في عقلها،لألحق حالي بسرعة واروح عند الطيور أحسن يحسبوني على الحيوانات ويموتوني بس تخلص الحرب.
طار الخفاش ونزل على شجرة وسط الطيور اللي استغربوا جينته لعندهم وقالوا شو جابك لهون وانته مش منا؟:
مد الخفاش جناحه وابتسم ورد:"هادول شو همه.... مش جناحات متل اللي عندكم؟يعني انا واحد منكم ..
قبلته الطيور معها وطلبت منه يهجم على الاسود لانه منقاره حاد متل السكين. وهيك صار الخفاش يهجم معهم وبقوة.لكن الطيور تعبت من الطيران وبلشت توقع على الأرض وتدعوسها الحيوانات.وهيك بعد ما كانت الحرب لصالح الطيور انقلبت الشغلة وصارت لصالح الحيوانات وصارت كأنها راح تربح الحرب.انتبه الخفاش انه انقلبت الحرب بنتيجتها ودارت الدويرة على الطيور بعد ما كانت راح تربح ،فكر الخفاش شو راح يعمل علشان ما تفترسه،طار الخفاش من بين الطيور لعند الحيوانات ...استغربت الحيوانات جينته لعندهم وسألوه شو جابك لهون وانته طير؟جاوب الخفاش بعد ما ابتسم مش شايفين اسناني فيه طير عنده اسنان وبيولد؟ما انتو بتعرفوا انهم بيبيضوا وعندهم مناقير.انا منكم يا جماعة وجاي انصركم عليهم اولاد الابالسة هادول.لكن الحيوانات ما صدقته خصوصا انهم شافوه بيهجم عليهم مع الطيور وبيضرب الاسود على راسها.هجموا عليه ليقتلوه ،ولما شافهم هاجمين هرب منهم وطار مرة تانية لعند الطيور اللي طردته لانه خانها وراح يتحالف مع الحيوانات.
ومن يومها ما عاد حدا حب الخفاش ولا رحب فيه وظل يتخبى في النهار ويطلع في الليل.ومن هالخفاش صرنا نشوف يا حبايبي يا حلوين خفافيش كتيرة بتطلعلنا في الليل وبتهجم على الناس وبتشردهم من بيوتهم مسغلة عتمة الليل.
وتوته توته خلصت الحدوته...حلوة ولا مفتوته؟

#عماد_ابو_حطب (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل