دردشة مع والدتي .... حول اندماج دولتي المالكي والحكيم .... ( 8 )....؛؛

علي الأسدي

الحوار المتمدن-العدد: 2997 - 2010 / 5 / 6 - 20:11
المحور: ملف: الانتخابات والدولة المدنية والديمقراطية في العراق
    

هرعت والدتي لفتح باب البيت على إثر أصوات هلاهل وطرقا متواصلا على الباب الخارجي ، ففوجئت بأم عبد الصمد وهي تردد : خلص حجية ، انفكت الجبسة ، واستمرت تطلق هلاهلها داخل البيت. فبادرتها والدتي :
شنو خير ، شنو صار ؟
ردت أم عبد الصمد : شنو ماسمعتي ؟ كلشي انتهى ، صارت وحدة بين دولة المالكي ويا دولة الحكيم ، وخير وبركة ، وراح تتألف حكومة شراكة مو حكومة محاصصة ..؛؛

ردت والدتي : هبطتي كلبي ، عبالي الكهرباء جت ، عبالي الزبالة راح تنشال من كدام البيوت ، عبالي البطاقة التموينية رجعت مثل كبل. أنت أم عقلين ، صدك لو كالوا ، على دك الطبل هزي يارجليه ،هو هذا اللي دتكوليه ينرادله هلهولة لو دك ولطم ، أي احنة ما اصدكنه نخلص من دولة هانوبة صارت دولتين فوك القهر..؛؛ وبعدين شنو الجديد ، أشو من شفناهم وشافونة همه (... . فد الباس ) ، أي شنو اللي تغير ما تكلليلي يا أم عبد الصمد ، هو هذا شي ينفرحله؟
وبعدين وينهم ، مو جانوا يكولون ماكو طائفية و " هذا البلد مانبيعة .. نبنيه سنة وشيعة " هيج نسوا كلشي ورجعوا على صخام الوجه؟ ، أي هو المطلوب تتوحد الشيعة ، لو يتوحد الشعب وره حكومة وطنية بيهه خير؟

بالله شاكلج شاحجيج ، عود انت العاقلة هيج تفكرين ، لعد شتكول فطومة مرت أبو الطرشي ؟
ردت أم عبد الصمد : احنه فين والحب فين ، مثل ما تكول أم كلثوم ألله يرحمهه ، أي مو كبل جانوا بحكومة محاصصة وطنية ، بيهه من كلشي شوية وفشلت ، وعلمود هيج راح يغيروها ويسووها شراكة وطنية ، من اسمهه مبينة حجية. يعني كلشي راح يتوزع بين جماعة المالكي وجماعة الحكيم بالشراكة ، ما كو واحد أزيد من واحد ، وعلى كيف اليرضى ولما يرضى. . وبجاه الله والرحمن ينصر الايرانيين اللي كدروا يقنعون الحكيم والصدر والمالكي ويرجعوهم مثل الاول ، عقل واحد ، وراس واحد ، وكلب واحد ، وما كو واحد أذكى من واحد...؛؛

ردت والدتي : انت شصاير بعقلج ، البارحة جان كلشي ما بيج ، أي شنو هو العراق مال واحد حتى يتوزع بين هذا وذاك ، لو قطعة قماش حتى يفصلوها مثل ما يردون ، وبعدين عبالج حكومة شراكة بين المالكي والحكيم مو حكومة محاصصة ، موهيه نفس الشي ، وزير من عندكم ووزير من عندنا ، ورئيس منكم ونائب رئيس من عندنا ، ورئيس وزراء من عدنا ونائب رئيس من عندكم ، وسفير من عندهم ( أقصد من الجماعة ) وسفيرين من عدنا ، " وتيتي تيتي مثل ما رحتي جيتي " . وبعدين همة الايرانين لو بيهم حظ جان حلوا مشاكلهم مع جماعة موسوي ، مو جايين علينة ومادين بوزهم بيناتنه؟
لو خاف عبالج حكومة الشراكة يعني اشتراكية الله يجرم ، روحي روحي لا يقشمروج ، هذا كله حجي ، الجماعة يريدون كلشي الهم ، باكه فجل لا تحل ، كرصة خبز لا تكسر ، وأكل لمن تشبع ، سامعة بهذا المثل ؟ يأم عبد الصمد يا عيني ، تره الشغلة مو شغلة الجماعة ، صدك لو كالوا ، انطي العجين بيد خبازته ، واشوفي الفرق؟

أي هاي مو صارنة سبع اسنين مقابليهم وكاعدين ، حرام اجان تغير شي بهال البلد ، بس راح فلان وجا علان ، وعزايم وبوس لحا ، ليشوفهم يكول الله شلون متصافين ، وهمة واحد حافر نكرة للثاني. والله ملينه من شوفتهم ، اشو ذولاكمة ليل نهار، يروح علاوي يجي الجعفري ، يروح الجعفري يجي المالكي ، وهسه الله يجرم شوف منو ، لو هذا اللي يكولوله ابن صولاغ لو عادل عبد المهدي ، وشنو عبالج همه أشطر من المالكي ، والله كلهم بس باللسان وغيره ماكو ، هذا المالكي يعني أحسنهم ، من يوم اللي استلم الوزارة يصيح ، هاي السنة سنة اعمار، وهاي أربع سنين وكلشي ما قبضنه ، ولا شفنا لون هذا الاعمار اللي كال عنه ؟

ساعتالسودة اللي شفناهم بيهه ، والله ما شفنه خير من يوم الشفناهم لليوم ، مادكليلي شنو السووه الهالبلد؟ يمة العالم تريد تغيير ، تريد ناس مخلصة بعملها ، تسوي شي الهل الشعب اللي أكثر من نصه فقرة وحفاي وايتام مكاريد ، أي إلى متى؟

واثناء ما كانت والدتي تتحدث مع أم عبد الصمد ، أجهشت بالبكاء وراحت تلطم على رأسها ووجهها وهي تردد :
أي ما تكلليلي يا أم عبد الصمد إلى متى ، مو كلبنا خلص والله ، والله خلص ، أي شوكت تفرج على هالعراق المظلوم ، أي صايرة بالدنيا حكومة ما تكدر تنظف شوارع البلد من الزبايل ، أي هذولة الامريكان الجابوهم وكعدوهم على كلوبنا ، ما يكللولهم ديروا بالكم على نظافة بلدكم، أي يصير همة ما دايشوفون شنوا من بشر ذولة؟

تدخلت في الحوار وقلت : إن الأمور ليست بذلك السوء يا أمي ، وإذا لم يضعوا حلولا للمشاكل الراهنة ، فان الشعب قد يثور في أي لحظة ، ويضعهم في مواقف حرجة ، كما يحدث الآن في اليونان ، وكما حدث في جمهورية قرقيزيا ، وهو وضع لا يتمناه أحد ، وخاصة أن العراق اقتصاديا وامنيا اكثر هشاشة بما لا يقاس بتلك الدول . ما يعني أن الأمور قد تنتهي إلى ما هو قائم في الصومال من فوضى وعدم استقرار،وربما ينحدر إلى وضع الكونغو ورواندا في الثمانينيات.

ردت والدتي : هو هذا الحارك كلبي ، عفية أحزاب ما تفكر بحال هالشعب ، حتى الماي اللي جنا نشربه بأمان صار يلعب النفس ، انريد ناس تفكر بهال المشاكل ، مو بس تجي وتكعد على الكرسي ما تهده إلا بالموت.
يمة انت تعرف أحسن مني ، إذا ما يجيبون أهل الخبرة المطشرين بديار الغرب ، وينطوهم شغلة اعمار البلد ، صناعة وزراعة وكهرباء ومشاريع اسكان وري واسالة ماء ونظافة البلد ، كلشي ما راح يصير ، وإذا ما يوكفون البوك والنهب راح يبقى العراق على هالحال ليوم القيامة. لأن ما يصير تخلي العطار لوالبكال بوظيفة محافظ ، لو واحد مسودن وزير تجارة ، لو تخلي وحدة حجي ما تعرف تحجي عضو مجلس نواب؟

أي آني أكول خلي يصير أي واحد من الجماعة رئيس وزراء ، المالكي لو الجعفري لو عادل عبد المهدي ، وخلي شميسوي خلي يسوي ، انشالله يعلن نفسه امبراطور ، بس خلي يطي لخبز بيد خبازته ، يعني يشارك اهل المصلحة وأهل العلم والفهم بتدبير أمور البلد ، ويخلوهم يسوون خطة تنمية اقتصادية مثل الأوادم ، ويمشون عليهه إلى أن تنتهي ، مو قشمرة ، بس يحفرون الشوارع ويتركوها عالنص ويمشون ، ولا حد يسأل ولا حد يكول ، لأن الوعود والحجي الفارغ عمرهه ما تبني بلد ، وما راح يبني أي شي.
يمة موتونه بهالاخبار الجذابية ، فلان معمل راح ينصلح ، والكهرباء راح يزيد ، ومحطات اسالة جديدة راح تنفتح ، ومعمل انتاج سيارات راح ينصب ، وماي الشرب علينة حسرة ، والبطالة نكصت ، وهي دتزيد ما دتنكص ، وولد الحرام التجار يغلون ببطالة الماي وما ملحكين ، جيف المواطن محتاج ، والحكومة تسمع وتغلس. لازم تنذبح على قبلة ، ما يصير حكومة تعيش على الكذب ، هاي سبع سنين يجذبون علينة ، عبالهم الشعب غفلان عنهم ، هاي ما صايرة يمة.

وهسه شوف منو راح يجي ، لو عادل عبد المهدي لو الجعفري ، وهم ذاك الطاس يا عباس، خوب علاوي راح وصفا عليه الماي ، ولا جنة موجود ، ولا عبالك انتخبه شعب ، أي مو هو محصل أكثر أصوات بالانتخابات ، شلون يطلعولة هالبلتيقة وياخذون الوزارة منه ، أي هذا يصير بدولة تحترم شعبهه ، لو بدولة كلمن أيدو إلو؟
وبعدين انت ، الفرحانة بحكومة شراكة ، شنو اخرفيتي ،عبالج وزير الكهرباء لو أمين العاصمة أبو الزبايل والشوارع المحفرة راح يشتغلون أحسن بحكومة شراكة من حكومة المحاصصة ، يمة أبو عادة ما يجوز من عادته ، كطنة وشيليها من أذانج ، لأن كلشي راح يبقى على حطة ايدج ، و البوك والنهب والواسطات راح اتزيد ما تنكص ، لأن صار عدهم خبرة وعرفوا شلون يطمطمون ، و شلون يلفطون ،وراح تشوفين ، وكولي الحجية كالت ..؛؛

#علي_الأسدي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل