قصيدة : جهاز إدارة أصول الدولة (بتاع الصكوك)

طاهر كمال عبده

الحوار المتمدن-العدد: 2888 - 2010 / 1 / 14 - 02:44
المحور: الادب والفن
    

جهاز إدارة اصول الدولة

(بتاع الصكوك)

بشاير وهلــّت بطول البلاد

عِلاوة سعادة لجميع العباد

ومنحة شوار للبنات والولاد

هتملك نصيبك , وحقك فى إيدك

في مجلس إدارة أصول البلاد

* * *

هلموا نرحب بكل الوداد

بمجلس إدارة أصول البلاد

تخصص مضاربة وجرايم فساد

تجارب أصيلة في نشر الخراب

وبيع المصانع برخص التراب

صحيفة سوابق تشيـّب وليد

في غش اللبن والدقيق والحديد

مهرب خزاين .. بنوك .. مليارات

مغرق بواخر .. سفن .. عبارات

مزور قواضي ومجالس نيابة

وسارق معاش الكهول الغلابة

وكاتم نفسنا بطوارئ مهينة

لاترحم مواطن في قرية ومدينة

مافيش قسم شرطة بدون إنجازات

إهانة ومذلة و جحيم سلخانات

* * *



سعادة سمو الأمير إصطفاكوا

فشوفوا النعيم اللي زاحف وراكو

تبيع اللى حيلتك في بلدك ب "باكو"

وحسـّك ترازي الحكومة ببلاكو

ومهما هتطلب تجاوبك ب "ماكو"

وتسقط جميع الوعود اللى بينكم

مادام كاسرة عينكم , هتلسع قفاكو

* * *

هيطلع يصوّر ويعمل حبيبك

ويحلف بإنه جايبلك نصيبك

وحقك هيوصل بإسمك في جيبك

برغم إنه بايع دراعك وعرقك

ورغم إنه باعت عساكر تجيبك!

* * *

وبعد الغلا والكوى والآهات

بقيت فجأة مالك صكوك وعقارات

هتهبط علينا بدون إنذارات

وعشنا وشوفنا تعالب بتحلف

وحدّاية تحدف فلوس مليارات

* * *

ومين كان يصدق يكون من نصيبكم

تفنجر عليكو الحكومة بفلوسكم

توزع صكوك مدفوعين من جيوبكم

وتقسم حصص من موارد جدودكم

وتنعم عليكو ب "كوبون" بين إيديكو

وتنزل هدد لمـّـا تخرب بيوتكم

* * *

شيوخ المناصر في كرسى الإدارة

حصيلة كفاحهم في هبش التجارة

كنوز تستخبى في خمسين مغارة

ولو مش مصدق وعايز أمارة

فمين اللى باع البنوك بالخسارة ؟

وهرّب آثار التاريخ والحضارة ؟

وغازنا اللى راح للصهاينة التيوس

ده مين اللي باعه بتراب الفلوس؟

ده غير اللي جاب فيروسات الطيور

وسقـّـع أراضي وخرّب قصور

ومين كان بينصب علي كل جيل؟

ومين اللي باع الميدان ل "إسماعيل" ؟

وبعد إنهيار الصخور والجبال

حرايق بتمحي التاريخ والجمال

سكنـّا العشش والصفيح والقبور

ودوقنا المرار م الرغيف والطابور

وعشنا وسمعنا بإن الديابة

هتكتب تعهد بحب الغلابة

***

وهيّه الأصول إنى أبيع لك كرامتي؟

وأقدم تنازل وأبصم وأمضى؟

يا بايع ميراثنا وحقوقنا برعونة

مادام ورث يعنى : ففين حق أبونا ؟

وخالى وعمى اللي ماتوا وسابونا ؟

وبنتك وإبنى اللي بكرة يلومونا ؟

وحق الشهيد اللي نزفت جروحه ,

وضحّى بروحه عشان مايبيعونا ؟

جاوبنى يامجلس إدارة الأصول

ياراعى الغلابة في عهد المغول !

* * *

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل