تكعة ملا علي

عودة وهيب

الحوار المتمدن-العدد: 2844 - 2009 / 11 / 30 - 08:33
المحور: كتابات ساخرة
    

(تكعة) ملا علي


استمعت مع الحاج زعيبل إلى خطبة عصماء لأحد قادة الاسلامويين النجباء...
كان معمما أصيلا... وكان (هرجه) منمقا جميلا...
هاجم الفساد والمفسدين، والرشا والمرتشين، والطائفية والطائفيين، والسارقين لأراضي ونفوط العراقيين...
كما هاجم البرلمانيين الذين أصبح الناس بهم مبتلين ومن فعالهم مستاءين، وعنفهم على رواتبهم الخرافية التي لم يُشاهد مثلها في كل البلدان الديمقراطية أو الديكتاتورية
وكان الفاسدون في مجلسه حضور،وعلى وجوههم الفرح والسرور، خواتمهم يلمع بريقها ومسابحهم تدور.
وكانت الحجب قد ضربت من شمال ومن يمين، لتخفي وجوه النساء عن كل فاسق لعين ، وكانت النسوة عن حديثه معرضات، وفي مشاغلهن مثرثرات ،غير آبهات بجنانه الموعودة ووعوده الممدوده، فهن قد جربن (جوده ) وعرفن قلة مردوده، وأدركن انه لخيره لالخيرهن يسعى ، وهن في نظره قطيع في مرعى ،أو مجرد متعة إليها الرجال تسعى ، ليس لهن عنده حقوق ترعى ،ناقصات عقل ودين، لاياخذ بمشورتهن( الحكيم) الفطين ،غير انه كالأفعى، يبدل السروال كلما تطلب الحال، وكلما أدرك إن مزاج الناخبين والناخبات عنه قد مال..
كان حاج زعيبل مذهولا من طلاقة لسانه وحسن بيانه فقال :
(يمكن السيد الله يستر عليه متريّك بميكرفون، مايتلحّك على حجيه ، جنه درنكة بيد كاولي )
وعندما أنهى السيد خطابه وغادر المنصة مودعا بهتاف : ( علي وياك ،علي ) اخذ حاج زعيبل يردد الهتاف الذي كنا نردده أيام كنا زعاطيط وهو ( علي وياك، علي .. إمام الدرويش، علي .. أبو قبة وريش، علي ..علي وياك ،علي )
ثم بعد أن انتهى( الفلم) التفت الحاج زعيبل إلي قائلا:
- والله ياجماعة من اسمع حجي الموامنه ياخذني الفرح وتصير عندي رغبه اكوم واشبكهم .. ياجماعة حجيهم مسنع مصفط وجنه حامض حلو وماينشبع منه
لكن من اباوع لافعالهم واشوف بوكهم ورشاويهم وبيع الوضايف وكل سوالفهم المكسره ياخذني العجب
تلزم الشيخ منهم تلاكيه يهاجم المرتشين ويشتم بيهم لكن هو نفسه مايسويلك شغله الا تدهنله السير..
شي مايشبه شي
ابروح ابوك استاد جا اذا كلهم ايشتمون بالفساد جاياهو الفاسد ؟ مابقة الااحنه ابناءالشعب ..اي ايجوز الشعب هو الفاسد مو الحكومة ..كلشي يصير،
والا تعال فهمني ،أذا همه الوزراء وهمه المستشارين وهمه رؤساء واعضاء الهيئات المستقله وهمه كلشي بيدهم ومع هذا البلد اتفرهد كله، جاياهو اللي فرهده غيرهم
من اسمع حجيهم اكول البلد بخير.. ومن اباوع لافعالهم اكول ماظل باب للمعروف ابدا
كل سوالفهم ماالهه علاقة بالايمان ...
اللي نعرفه المومن يخاف الله، وزاهد بالدنية ويخاف رب العباد، لكن الجماعة كل سوالفهم ماالهه علاقة بالايمان
من اقارن بين حجيهم وبين سوالفهم المكسّره المنافية للايمان اتذكر سالفة (ملا علي)..
(ملى علي)- رحمة الله على روحة- جان عنده نسوان ثنين، وحده عجوز ظالة بس قلايج، والثانية زغيره وحليوه ومجكنمه .
فابو حسين كالعادة يميل للزغيرة، لكن يعرف بان هلشي (حرام) لان الاسلام يكول لازم الرجّال يعدل بين نسوانه، فالملا صاحبنه احتار بين رغبته وبين دينه، فصار يدور على (حيل شرعيه) يوفق بيهه( بين ربه وبين حبه )..
ذاك اليوم راح للزيارة، ومن رجع اكتشف بان هذا اليوم للجبيرة مو للزغيره حبيبته .
كال لزوجته الجبيرة :( يابه اليوم يومج يم حسين، فلازم اتروحين اتجيبين ماي من الشط حتى نسبح )
المسكينه ام حسين لزمت (المصخنه) وركضت للشط
استغل الفرصة( ودخل) في زوجته الصغيره
الزوجه الجبيرة تعرف سوالف الموامنه، فبسرعة ملت المصخنه بالماي ورجعت ركض..
من دخلت البيت، ( ملا علي) نهض بسرعة وصاح ( الله واكبر) وسوه نفسه يصلي
زوجته الجبيره دخلت وباوعتله فشافت ( تكعة - بقعة) على ثوبه (من اثار العدوان الملائي )
لزمت ثوبه وصاحت : ربي... هي هاي (التكعة) مال واحد يصلي؟!
عاد يااستادي سوالف الجماعة الموامنه مو مال واحد ايصلي ويخاف الله
تكعتهم مثل تكعة ملا علي، مو مال واحد يصلي

#عودة_وهيب (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل