فتوش النكبة

عبد الحميد عبد العاطي

الحوار المتمدن-العدد: 2637 - 2009 / 5 / 5 - 02:07
المحور: الادب والفن
    

من يوم ما وعيت
وأنت بتحكيلي.. كشيخ
عن ترابنا وعاداتنا..
أكلاتكم وأكلاتنا
عن البصارة والفول
وحَب البصل المفحول
عن قعدتكم تحت الشجرة
ورغيف خبز بتقسم لعشرة
عن موسم الزيت والزيتون
وكيف المغني و اليرغول
عن أعراسنا وليالينا ما يحول
ودربكة على دلعونة
وسقا الله نعاود يا مزيونة
عن حلاق مطاهر ومداوي
عن غرفة طين وذياب بتواوي
عن حمارة فلتت
ولحقتها الحارة
ولما رجعوا ما لقوا إلا الختيارة
عن البساطة والجود
عن دار الكتاب
والخيمة الزرقا
والبحر والسمك المخدود
عن باص يتيم بطيركم
من عكا ليافا للسدود
يا شيخ ..
زهقت الحكي
وكثر القيل والقال
زهقت كلمة أيام البلاد
أنا وقت الهجرة عشت
أنا وقت الهجرة ما كنت بس سمعت
وعن واحد ثاني بقول :
كنت لساتني بحضن أمي
لكن دموعها منقوشة بتمي
يا جدي : أنا راح احكيلك واحكيلك
حتى تسبق أولاد جيلك
وتصير عالم بالتاريخ
وتذوق القصة لغيرك
يا جدي:أنا بعرضك دخليك
لا بدي ترويلى ولا ارويلك
وديني على بلادي
على يـبـنـــــا مايو فوادي
وديني ..
عكروم العنب والنكبة
على بير الميا العكرة
واتركني غريب
و لا تسال عليا
يا جدي : بخاف عليك
يا جدي.. يا جدي
ما تخاف ...
راح تعرفني جبالها .. وسهولها.. وديانها
راح تعرفني زهورها وطيورها وغزلانها
راح تعرفني صخورها وجحورها ورمالها
وخطاك يا جدي متزوجة الأرض ..
أنسيت ...!؟
غير أولادك ما بحلالها
يا جدي: اليهود معمرين فيها
والطريق عليها عيون مفتحة
من حواجز وأسلاك
والشجر كله بتكلم
ما بتعرف مين معهم ومين معاك
يا جدي: حطني بعلبة كبريت
وبجيب الصدر خبيني
واطلع قبل الشمس
ومن فوق الليل وارميني
يا جدي: شو بتقول ..
كلامك مش معقول ...!!
يا جدي: بدى أشوفها
بدى أكحل حنيني بكفوفها
بدي لو مرة أبوس قطوفها
يا جدي: اخ .. اخ ولو بقدر ...
يا جدي:طيب ليش بتحكيلي
يا جدي: عشان تكبر وهي فيك
وتعمر بأشعارك وأغانيك
يا جدي: بس عشان هيك
عشان يقولوا ما انسينا
لا يا جدي .. لا يا جدي
بيارتنا اللى بوادي الحمام
ما بترجع بالكلام
ولا بقصة ألف ليلة وليلة
ولا بترجع بالسلام
ولا بترجع بمفتاح مخبى
ولا حتى بجيوش الأنام
هدول مثل الأنعام
يا جدي: كيف بترجع الأوطان..؟!!
يا جدي : فلسطين بترجع بس ...
إذا الوحدة والإرادة سبقتنا
إذا كنا اثنين بواحد
والصدق والحب عملتنا
ويا جدي: فتوش النكبة شلفطتنا
و اللي مش قادر... ما يأكل بصفرتنا

[email protected]
عضــو صالـــــون القلــــم الفلسطينـي

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل