آذاريات.....قصائد بميلاد الحزب الشيوعي

رحيم الغالبي

الحوار المتمدن-العدد: 2599 - 2009 / 3 / 28 - 01:16
المحور: الادب والفن
    

فصائد
- 1 – مملوح

- مملوح بس وسفه الايدين كصيرة متلوح
بس فكري طويل ايتابعك شتروح....!!
انت الذوق
انت الراي
انت الروح
انت ياوطن ومنين ابوسك ..
لمن كالوا طاح
شفتك بالعكس انت مناره للعمر
للروح
لا ماطاح.
يلي ريحتك حلوه...
.. وترد الروح
ورد لامو ورد زينه
ورد بستان اخضر
مساء....الثيل يكثر
والسواجي البيك
... وما ارضى حزينة الدنية..
ابد ما مسموح
ياريحان
يافضة
ياورد البنفسح
والعطور تفوح
....
نخلة انته صرت
من طيّحوا صدام
والزمرة الخبيثه الي تلعب الروح
انت اسمك بدم كل العراق
وغيرك الممسوح
وين تروح
اذا بالجبل
بالاهوار
لو رمل السماوة
ونقرة السلمان
الشفت بيها اجروح
لا..... متروح


- 2 – كصيبة طفلةوشريط احمر

من الصبح
كون اكعد انه من الصبح
ماشوف سجينه وجرح
عمال اشوفن والفلح
طلاب دفترها ..
. محبة
ومزهرية
وغصن زيتون
و
حمامات
وشرايط حمر تتباهه بيها اطفالنا بين المعلمات
و للمدرسة لمن يروحون
وعصرية ...
يضحكون ويفرحون
مثل نصب الحرية
من يرجعون..
الورد من راسهم لجدامهم
من همه يمشون
درب..
خالي من السلاح وبدلة الزيتون
يفرحون
يفرحون
يفرحون
مو مثل اسنينّه العشناها
واحدنه مجنون
مجنون
خلصنه الشباب الراح
سجن داخل سجن مسجون
بس مفتون
من حب العراق الماكو مثله
أبد بالكون


-3- بستان طول الوطن


- امشي وكول اوصلت والكنطرة بعيده....!!)*
يذياب * هذا الدرب ...غيره فلا ريده
شامخ وأمين ...
وجزه سبعين ..من عيده
و ورود ريل وحمد.. وجكليت من عرسه
عفيه .. جسر هالجسد ، مثل الحصى.. منمرد
رغم العثر والغلط ...
باقي يظل حسه
طول الوطن ، فصّلت
ثوب احمر ألعرسه
هلهللت بيه البنات
وظلّت الخرسه
....
نفسه اليسب الورد ..نفس الوجه
. . نفسه ..!!!
مرّت ايام المحن . . واتحمل النكسة
شايل صخرنه ابجبل
سييزيف – واتحسه
وكلمن –سبوس الجرش - ريح التجي اتكنسه
ماله جذر بالارض
حتى ولو......
الاّ بارض نجسه
هي الشمس واحده
واللي خلق هالارض ..
تبقى الشمس شمسه
ونته شمسنه..الحزب..تاريخ أمه وشعب
ماصرت خبزة ابحلك ،
واللي يمضغك حقد ....
صدّكني كل الصدك
هم ينكسر ضرسه
بس عدنه احنه السمع
وافواهم خرسه….!!!
.......
لولينه الهم طفل
ماغفت عين الحقد
واشراع عدنه صعد...
اهتز صحيح ...
و خذل الموج بينه
او وصمد

من ريحهم شرسه

وسنين عشنه بسعد
و أسنينهم انتهت...
بالمزبله وتعسه...
ياروحي
مثل الثيل تمشي اعله سمعة ماي
والطير حط عالسطح
من سمع مني الناي
فرحت و اجت بالسمه
طيور شالت غصن ، ومنهن تغني اوياي

هو العمر لافته
..بشارع ضمير ، اسمك
احتار وين انرسم كون انته وياي
....... بوسه اعله كد رسمك
ياعيني كون الوطن...
بستان
بستان كون الوطن ...
مو كاع صبخة وقهر بيه تلعب الفيران
وناعور ساكت...
اسف
وتحركه الثيران

ايوصل الماي ... الجبل
بيه ريحة الانسان
ياروحي اسمج سطح .. لو تصعد الجدران
ياروحي ...كافي وفشل وعيب ،وتجيك الاذى
من اسهمهم جيران
هو الوطن مدرسة
والرمز بيه الشعب
وسنينه تمتحن...
مرات رسبت صدك واتحملت خذلان
ومرات صار المنع....
صبرت وطكت نبع
فاض النبع نهران...
نهران
فاض النبع
نهران...
روحك رمز للشعب
والصلى ..راد آذان
أذنت محد سمع
منها..... وبدى الخسران
ياروحي لمي الشمل....
غربه ... و قهر ينرسم بالمنفى احلى الوان
عودي الوطن هل حلو تانانه من ازمان
سبعين عنده الجزن وخمسه عل سبعين...
انذرله ...دم الجسم
انذر له العينيين
اطشن فرح بالشطرة عالصوبين

- 4 – طول الوطن

- حبك بطول الوطن
انه انرسم خارطة
اتفصل بطولك مدن
كد القهر والحزن
كد المحبة انرسم
كد الفرح بالنهر
للجرف من يبتسم

انت حمامة سلم
فيرو ز غنت الك
بأول صبح..وألندى
طيرة انت ماتنلزم
تاريخ ألك ينحني
من العدو ما تنهزم
لعين الوطن..
كلش صلب ...قدمت
..بالمشنقة وتبتسم
صح اعثرت مهرتك
والعثرة طبع الزلم
تعثر وتنهض رغم
حقد الزمن.. والوكت

بوسة عله كد السمه

بوسة اعلة هيجي اسم
بوسة اعله كد الوطن

بوسة اعله رغم الالم
او ناس
..ماتفتهم
انته شعار الوطن
انته حمامة فرح
طارت
..تحط للسلم

-5-واحدوثلاثين آذار –

واحد و ثلاثين آذار
ستين بعمري...وما عفتك
امسجل بالجنسيه اسرارك
وبكل اليوم
صدكني..
وطيب بعتابك يحله اللوم
انحبك
د
و
م
دوم انحبك ... غصبن عالعاذل ..للدوم

واحد وثلاثين آذار

ترسم كل الدنية اكمار

وخطوة احلام بكل شارع

..نرسمها من احنه ازغار

آه الحلوة..
لو نشرت كل اكصايبها

بذاكرتي مرقد ينزار

واحد وثلاثين
آذار
من تضحك صاحبتي بيومك...

بصحراء الحب تجري انهار

تاريخك خالد بالدنية

يزهي بأسماء الثوار

واحد وثلاثين آذار
شكد نكبات....
شكد ردّات....
شكد غلطات....
اباب اعتابي

اباب ابلادي

يتعلكن شدّات ازهار

واحد وثلاثين آذار

دومك باقي....

يا لطمة بوجه الاشرار


+ رحيم الغالبي

http://m1.ankido.net/index.php رئيس تحريرمجلة انكيدو الثقافية
_________________________________--
• اشتركت بمجموعة قصائدللوطن والناس عام 74 صدرت بمناسبة العيد الاربعين للحزب الشيوعي العراقي
• *اشتركت بمجموعة شموع ومرايات عام 2004 صدرت بمناسبة العيد السبعين للحزب
--------------------------------------------------------------------------------

#رحيم_الغالبي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل