دارميات عراقية مابعد 2004

ضياء حميو

الحوار المتمدن-العدد: 2585 - 2009 / 3 / 14 - 09:44
المحور: الادب والفن
    

ببساطة عزيزي القاريء..!
ان اردتً ان تكتفي بالضحك او الابتسام ، فهذا لكَ ، وان اردتَ ان تحلل ظاهرة اجتماعية من خلال هذا الفن الشعري فهذا لك ايضا.!!.
أدناه مجموعة من الدارميات ،نُضمتْ مابعد 9 نيسان 2004 من قبل ناس قد لايكونون شعراء، متداولة في العراق ، تناولتْ أشياء جديدة ، وبعضها بمفردات " انكليزية " جديدة أيضا على الفرد العراقي لم يألفها سابقا ، قام بتوظيفها ، أو السخرية منها بروح نكته وأحيانا عبث يصارع الواقع الذي يعيشه . .!
على سبيل المثال لا الحصر ( الانترنت ، عالم " الموبايل " النقال ،الأسلحة والإرهاب ، الميليشيات ، الكومبيوتر..الخ )

مفخخات وأسلحة وأمريكان

الدهر بس وياي عالنهه حربه
موطلقة حط بالروح حط بيهه " بمبه"

" فخختْ " روحي اليوم كل هذا لجلك
ولو مارضوا ينطوك انفجر بهلك

بين الگلب والروح اهنا اخليك
واكتب " خطر ممنوع " محد يمر بيك

ظلمة " وحظر تجوال " وامريكي عل الباب
ولو تنگلب طلقات اتعنه الاحباب

" مفخخ " صرت بهواك صرت انتحاري
تفجيري " بالريموت " بيدك قراري

من كثر مامشتاگـ تيهت نفسي
اجرت الامريكان حسبالي تكسي

" عبوة " وزرعني الشوگ صرت علة دربك
واعذرني لو " طگيت " فجرني حبك

مليشيات وطوائف

ظلمة و "حظر تجوال " و " البطة " تفتر
واليطلع " ايصكوه " لو جدة يحظر

صوم وصلاه نيشان بالگصة راسم
ولو تسأل التاريخ يطلع " حواسم "

لو گلبي عافك يوم سويته " تكه "
و ( للمكتب استدعاء بالبطة اصكة )

خوة ونظل للدوم سنه ويه شيعة
والدين نفس الدين نفس الشريعة

انترنت وكومبيوتر وسفر

" فرمتت " هاي الروح من كل الاوهام
واول اسم حطيت اسمك على " الرام "

الگلب نص الليل حن وذكركم
والعقل صاير" رام " يخزن صوركم

" بالنت " صدگ حبيت ، حبيت بخبال
تالي فتحت " الكام " ، طلعتلي رجال

صح البشر حلوين بس الك ميزة
تدخل گلب تهريب وبلية " فيزة "

تلفونات موبايل " نقال "

دگ گلبي ست دگات والگلب " هزاز"
" نقالي " هم شيطان يعرفهم اعزاز

فارغ حبيب الروح نايم على الريش
خايف على " السنتات " گاضيها " ترميش"

موصوجك انته الصوج كله من اديه
سويتلك " مس كول " تفتح عليه

لا " مسج " لا " مس كول " چا شنهي فلمك
دزلي رساله ابساع لاامسح اسمك

دايخ وافكر بيك ومشوش البال
خابرت " بالريموت " حسبالي " نقال "

فرفح جهازي عليك ثق فرفح" الرام"
والشحن من دگيت يرگص "هجع" گام

دارميات تحشيش

طـُفر طـَفرْ خنزير و " العمبة " طيبة
گوم اترس " اللالاتْ " مالك علاقه

أزرع بصل بالگاع تطلع " بتيته"
لك شلي بالبطيخ ،شكرا جزيلا.

#ضياء_حميو (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات