الفجل والعلمانية

صلاح الدين محسن
كاتب مصري - كندي
(Salah El Din Mohssein‏)

الحوار المتمدن-العدد: 1598 - 2006 / 7 / 1 - 11:01
المحور: ملف - 1 تموز 2006 - العلاقة المتبادلة بين العلمانية والدولة والدين والمجتمع
    

الفجل والعلمانية
بقلم : صلاح الدين محسن
كانت بائعة الفجل تجلس بالسوق الشعبي بأحد أحياء القاهرة ، والممتد علي أرصفة وحواف بعض الشوارع الجانبية الضيقة وأمامها كومة من حزم الفجل وبجوارها زميلتها وصديقتها بائعة الليمون عندما أقبل عليها أحد زبائنها الذي تأنس اليهم وتري فيه انسانا طيبا ، واضحة علبه سمات المتعلمين المثقفين وأدبهم ، بعد أن أخذ طلبه من الفجل جاملته وهو يمد لها النقود قيمة ما اشتراه ، قائلة بكرم وشهامة : " خلي يا أستاذ .. خلي والله .. خلي علينا المرة دي .. ، ابتسم وحياها شاكرا .. وقبل أن تمد يدها لتأخذ النقود استأذنته باستحياء في أن توجه اليه استفسارا ، مالم يكن في ذلك تعطيل له عن شيء .. رحب الرجل بلا تردد مما شجعها علي السؤال :
.. يعني ايه / تحاول تذكر كلمة / : عل .. عل.. آه .. علمانية .. ورجل علماني ..؟ يعني ايه يا أستاذ ؟ لا مؤاخذة أصل أنا ما كملتش التعليم . أمي الله يسامحها قالت لي يا سعدية يا بنتي لازم تسيبي المدرسة كفاية عليك الابتدائية .. نشوف أكل عيشنا يا بنتي .. انت عارفة اننا ناس غلابة وأبوك الله يرحمه لو عايش كان يبقي وضع تاني ..
= بسيطة يا ست سعدية ، كل انسان وله ظروفه .... صمت برهة ليفكر ثم ضحك بهدؤ ضحكة محسوبة غير جارحة لها وقال : طيب بماذا يهمك هذا الموضوع ؟
= أقول لك يا خويا .. أصل الجماعة / ثم تلتفت حولها قبل أن تكمل حديثها بشبه همس : بتوع الدقون ..
= يقاطعها : قصدك الاخوان المسلمين ؟
= أيوه اسم الله عليك ... / وهي تتلفت حولها ثانية / أصل بصراحة أنا ما بحبهمش ناس حبكية زيادة عن اللازم وأنا ما بحبش الناس الحبكية قالولي لازم تروحي تطلعي بطاقة انتخابية عشان تروحي تدي صوتك في الانتخابات للناس اللي تنفع وتصلح عشان البلد تتصلح وتنصلح حال البلد وحالنا كلنا .. أنا يا أخويا صدقت وخفيت عقلي ورحت قسم الشرطة عشان أطلع البطاقة وأناعمري ما بحبش أهوب ناحية القسم ولا أحب اللي فيه ..

=يضيف مبتسما " وهمه مين بيحبهم ؟؟
= المهم يا خويا عشان ما أطول عليك .. / بأسف وأسي / وقفتك يا خويا معلش .. طلعت البطاقة .. جم الجماعة بتوع الدقون وقالولي ادي صوتك للرجل ده ؟؟ تشير الي احدي اللافتات الانتخابية الكثيرة المعلقة بالشارع كدعاية انتخابية للمرشحين لعضوية البرلمان // وشاورورلي ع الرجل ده / تشير الي لافتة انتخابية لمرشح آخر / لا تنتخبيه لأنه .. / تضع يدها علي رأسيها محاولة التذكر/ ايه ؟ ايه يا سعدية ؟ دايما أنساها موش عارفة ليه ؟
= يكمل لها : علماني ..؟
= أيوه .. علماني .. تبع العلمانية ، وقالوا لي وبتوع العلمانية ناس موش كويسين، لكن الاخوان المسلمين ناس بتوع ربنا ، قالوا لي كده يعني ، بس أنا ما بحبهمش بيني وبينك كده ..هيه ايه بقه العلمانية دي ؟ بتعمل ايه ؟ والناس بتوع العلمانية وحشتهم في ايه ؟
= / بعد أن يهز رأسه ويفكر قليللا / ده يا ست سعدية موضوع كبير بس أنا حقول لك ع اللي يفيدك من الموضوع ، اللي يهمك ..
= / بلهفة / عليك نور .. تسلم .. أنا عاوزة اللي يهمني موش أكتر .. موش كل واحد يا خويا تهمه مصلحته ؟ موش عاوزه حاجة تاني ..
= شوفي بقه يا ست سعدية .. لو بتوع العلمانية هم اللي مسكوا الحكم في البلد حيعملوا قانون للستات زي اللي في تونس ..
= / بقلق / وده بيقول ايه يا خويا الآنون بتاع تونس ؟؟
القانون يا ست سعدية اللي في تونس من خمسين سنة بيقول ان الرجل موش من حقه يتجوز واحدة تانية علي زوجته ، هي زوجة واحدة بس ..
= // تشهق فرحا وتبرق عيناها بالابتهاج.. // ودينك يا شيييخ ؟؟؟.. ينصر دينهم .. ده الراجلحوزي ذالل أعياني وكل شوية يقول لي حتجوز حتجوز .. وأنا زي مانت شايف ببيع وقاعدة في الشارع بساعده عشان عندنا عيال وموش عاجبه اللي طالع عليه عفريت بعيد عنك اسمه حتجوز حتجوز .. .. قلت لراجل شيخ عندنا في الشارع يكلمه ويعقله عشان عندنا عيال ما يتبهدلوش .. يقوم الراجل يقول لي اييييه : / تقولها بالفصحي كما ينطقها المشايخ وبسخرية تنتزع الضحك/ " يا ابنتي انه حقه الشرعي " رحت سايباه وماشيه علي طول وقلت في بالي : الهي ينكسر حوقك انت وهو في ساعة واحدة " هههههه / تضحك فيضحك معها وتضحك زميلتها التي تتابع الحوار ..
= / يكمل / وكمان يا ست سعدية ، لو رحتي المحكمة عشان تشهدي علي حاجة شهادتك في المحكمة القاضي يحسبها شهادة كاملة .. لكن لو الاخوان المسلمين اللي مسكوا السلطة تبقي شهادة الست في المحكمة تتحسب بنص شهادة بس يعني لو مفيش ست تانية معاك تبقي شهادتك باطلة ما تنفعش ..
= / باندهاش واستنكار / باطلة ؟؟ الهي تبطل عينيهم .. ليه ؟ هو أنا ست زمتي وحشة ؟ عشان شهادتي تبقي بنص شهادة ؟ كل الناس عارفني حقانية بقول الحق ولو علي رقبتي ورقبة أبويا .. تبقي شهادتي بنص شهادة ليه ؟ جوزي اللي عاوز يتجوز علي ده ، أجدع واحد يحود عن الحق ، تقوم المحكمة تحسب شهادة الضلالي ، شهادة كاملة عشان هو راجل ؟ وأنا يا ولية ياحقانية وعمري ما أقولشي الا الحق تبقي شهادتي نص شهادة عشان أنا ست ؟؟ يا حلااااوتكوا ..
= وكمان يا ست سعدية لو في ورث ولا حاجة من والدك أو من والدتك
= منين يا خويا ؟؟ الحمد لله مفيش الا الستر .. أبويا الله يرحمه كان راجل فقير ما سابشي اللضا ..
عني بقول ..، لو الاخوان المسلمين هم اللي بيحكموا يبقي لك نص نصيب أخوك بس .. لكن لو العلمانيين اللي بيحكموا يبقي زيك زي أخوك في في الميراث مفيش
فرق بين رجل وست كلنا ولاد تسعة وكلنا ولاد حوا وآدم .. ده لو العلمانيين في السلطة ...
= / تضرب بطن كفيها الأيمن بظهر كفها الأيسر من الدهشة / : في تونس كده بقه يا أستاذ ؟ .. النظام الحلو ده ؟
= أيوه يا ست سعدية .. أنا قلت لك ع اللي يهمك قوي يعني واللي يخصك خالص
= أنا عازوه ايه تاني أكتر من كده ؟ كده نعمة قوي .. كده رضا خالص لو كده بس .. .. / كتر خيرك يا أستاذ ... عطلتك يا خويا معلش..
/ وبينما هو ينصرف وباديا علي وجهه السعادة بهذا الحوار قائلا لها : أي خدمة يا ست سعدية ؟ /.. تلتفت سعدية نحو زميلتها بائعة الليمون قائلة : روحي طلعي لك بطاقة انتخابية يا بت .. ثم تقسم لها قائلة " عليا الطلاق زي الرجالة الا أروح أنتخب الراجل بتاع العلمانية دهه / تشير لصورة المرشح /.. آه منهم بتوع الدقون قلالات الضمير .. آاااه ما أنا عارفاهم ..آاااه . عارفاهم ..

#صلاح_الدين_محسن (هاشتاغ)       Salah_El_Din_Mohssein‏#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل شاكر الناصري، أحد مؤسسي الحوار المتمدن	حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل