يمظفّر الماقصَّرت

ميسون نعيم الرومي

الحوار المتمدن-العدد: 6047 - 2018 / 11 / 7 - 20:22
المحور: الادب والفن
    

الى شاعر العراق مظفر النواب اهديها

يمظفـّـر الماقصَّرت
ميسون نعيم الرومي

يمظفـّـر الماقصَّرت
عريت حكام الچذب .. احچيت ابظلمهم ماخفت
يالعندليب الغردت .. غفله اوعلى ناسك غبت
ابحور الشعـر بيهه عـِـلـِتْ..
لـَنـَّـك غبت
والشعر حاير منتظر
حتى القوافي اتعـَـلعـِـلـَـت
لـَوْزان كلهه اتعطلت
(يمظفر) البيهه اگطـَـعـِـت .. ليش اگطـَـعـِـت؟
وانت اسـْـكـَـتـِت
اي .. ليش اسـْـكـَـتـِت ؟
فـَيّ النخل حـَـن اوسأل
يتـنـَـطـَّـرك .. مـَـل اوزعل
راحت سنه .. اوجـَـتـّي سنه ..
راح الأمل
وانت اسـْـكـَـتـِت
حيف اسـْـكـَـتـِت ..
اچلاب السياسه .. استأسـِـدَت
لعبت لعب ..
هـَـدْنـَـه التعب .. شفنه العجب
ردتك تجي .. نتنطرك ..
مابينت
صوتك غـَـضـَـب .. نار اولهب
يحرگ .. توج .. اعروش الگصب
اي .. وين ارحلت ؟
آخ .. ارحلت
عين الشعب ما غـَمـُّـضـَت .. تترجه جيتك يا الجبل
الچاي بالقوري برد
ريل اوحمد .. مشتاگه الك ..
تانه .. اوتعب
حتى الگطه .. فيـّـه التهب
مات الگصب
بلبل گعد .. صبخه لـِگـَه ..
لاتين ظل .. لاظل رطب
كلهه صفت .. (خردة عشگ) ..
باعوهـَه وابرخص الثمن
كلشي رخص
كلشي نگص
كلنه هضم كلنه حزن
ساحه افرغت
الإيد بالإيد اصفـِگــَت
(منجل إيـِداعي) .. مابقه ..
اولا ريل عَ السچه مشه
البردي شچ اويه الگصب
والهور مايه هالنشف
راح الجرف.. ماظل جرف
والماي وابجرفه نشف
(بصرتنه) غطـَّـتهه الدمه
والماي بدلوه ابملح
اوسيابنه الكله وفه..گال الشعر..

(عيناك غابتا نخيل ساعة السحر
أو شرفتان راح ينأى عنهما القمر
عيناك حين تبسمان تورق الكروم
وترقص الأضواء...كالأقمار في نهر
مطر مطر مطر)

(بغدادك) التزهي انهفت
كرخ اورصافه اتريفت
واعلامهه البيهه ارحلت
وانت ارحـلـِت
اي .. ليش اسكتت ؟
الجرح بالروح اوغـُمـَگ
عطـّابـَه مـِتـْـلـِمـَّه بعد
مامش دوه البيه اونفع
الدمع حده اويـَه الجفـِن
والهجر عشعش بالضلع
والشته كله اتعده .. والصيف هم اتعده
وينك سعد؟ .. وينه اسعود؟
مامش بعد كل جيـّـه
اولا بيرغ الشرجيه
اولا ضل نهر عبرت اوبي عبريه
مانابـْـنـَه غير السحن
والغربه يمظفر محن
وانت الرحت
امن الساحه ياحيف اوغبت
غربان .. بوم اوعشعشت
ثروتنه كلهه اتفرهدت
(يمظفر) اوحيف اسكتت
آه الزمن .. آخ القدر
الذهب شو صاير صفر
غـَـمـَّـه الوكت .. يمظفراهوايه شفت
انت الشفت
واتعذبت .. واتشردت .. واتمرمرت
دنيةْ غدر وابلا بخت
حيف او ألف .. آخ الوكت
وانت اسكتت ! ليش اسكتت؟
ليش ؟
----------------------------------------------
قصيدتي التي قرأت في لقاء الأحتفاء بشاعرنا مظفر النواب
الذي اقامته جمعية الفنانين التشكيليين العراقيين في السويد
في
6 / نوفمبر/2018
ســـــــــــــــــتوكهولم

#ميسون_نعيم_الرومي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل