الى أم الشهيد البطل ، شهيد البصرة الفيحاء ( مكي ياسر الكعبي) *

ميسون نعيم الرومي

الحوار المتمدن-العدد: 5985 - 2018 / 9 / 5 - 00:58
المحور: الادب والفن
    

الى أم الشهيد البطل ، شهيد البصرة الفيحاء
( مكي ياسر الكعـبي) *
ميسون نعيم الرومي
يا أم الشهــيد .. اتصيح عــينوني – وي (مكـّي) أريد اليوم دفـنــوني
احومي بالدرب واتمعنه بالتابوت – وابچفنه اغـَطي اگصايب امتـوني
يالشِـلت النعـِش ماادري بي ليويـن – نـَـزلوه النعـش ويـّـاه شــيـلـوني
ابـدمـَّـك فديـت الشــعـَـب والثـوار – ربيتك بطل .. ماخابت اضنـوني
شوصفنه الضرب گلبك رصاصه اوفر – جـبان اوهالأدور اعـليه دلوني
ابـزفـتـَـك احني ردت بـچفـوفـَـك – من عرسك يـَـ (مكي) ليش حرموني؟
كـتـلوك ابغـَدر هالحفـنـَة الأوغـاد – اخـتـك هالتصيح ابـدمـَّه حـنـونـي
يا أم الشهــيد .. اتصيح عــينوني
***
يا (مكي) البطل واسنينك العشرين – تحرگ حاكم الخضراء والـْدوني
يا (بصره المجد) ! ياقلعة الطيبين – تصرخ حيل: ذوله الغربه باعوني
آنه الگصب والبردي اوونين الناي – آنه الماطفـيـت ابلحظه چانـوني
آنه البصره حرّه اوقبلة الأحرار – انـذال الخيانــَه ابسـجن سجـْـنـوني
باعـَـوْ مـَـيـّـتي والنخل هالعـدموه – أحارب بالسعـف فـنكم تـذلـّـوني
آنه ام الكرم واچفوفي تنگِـط خير – ما يوم اوفـرغ فد لحظه ماعـوني
آنه البصره مني ... شعــْــلة الثوار – ماتطفي أبـَــد ياخـــوتي عـينوني
يا أم الشهــيد .. اتصيح عــينوني
ـــــــــــــــــــــــــــــــــــــــ
*الشهيد مكي ياسر الكعبي : شهيد البصرة الثائرة ، الذي أغتالتـه أيادي حكومـة الغدر والخيانـة
يوم الإثنين المصادف 3 أيلـول 2018
------------------------------------------
ســـــــــــــتوكهولم 4/ايلول/2018

#ميسون_نعيم_الرومي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل