بالعامية ... الله يرحم الأبطال

احمد البهائي

الحوار المتمدن-العدد: 5322 - 2016 / 10 / 23 - 04:14
المحور: الارهاب, الحرب والسلام
    

رحمة من الله على شهداء الوطن، لما يتقال أن ملثمين استقلوا دراجة نارية، وقاموا بإطلاق النيران على العميد أركان حرب، عادل رجائى إسماعيل، قائد الفرقة التاسعة المدرعة، وهو خارج من منزله رايح بسيارته الميرى للعمل يبقى اسمه ايه دا، وبالامس القريب ،12 وردة جميلة اتخطفت الواحد خلاص مش قادر يستحمل اكتر من كدا ارحمونا بقى من اسلوب النحنحه والعيون المبرأه ودراما المشهد اللي خلاص فقعت مرارتنا عايزين سياسة الدم والنار والضرب بيد من جهنم على كل الارهابيين والعملاء داخل وخارج البلاد ، اللي عايزين يخرجوا يوم 11/11 بحجة الدفاع عن الغلابة مع العلم ان الغلابة براء منهم لانهم خليط من العملاء والمرتزقة ونظام مبارك والاخوان هدفهم تنقيذ اجندة خارجية وضرب الاقتصاد، واحد منهم بيقول اللي بيحصل دا..عنف وعنف متبادل بيعتبر دفاع مصر عن امنها القومي ضد الارهابيين بالعنف ، مصر عمرها مكنش بيحصلها حاجه زى دي البلد هتروح علشان الاسلوب المتبع نتحرك " بعد ماتقع الطوبه في المعطوبه " ، والله انا بموت لما بسمع اولادنا وحبايبنا بيموتو بالطريقة دي ، لغاية امتى هنكون في حاله دفاع بألنا خمس سنوات على دا الحال عايزين نتحرك ونتحول الى حالة هجوم ، ياعم اصحى فوء شوف العالم من حوالينا بيعمل ايه وحوش غيلان كلاب مسعوره اللي بيقرب بس بتاكله وبتقطعه وحنا لسه قاعدين نقول اوعى وخد بالك ولما هكبر معدش وقت للكلام دا عايزين نخلص بقي ، شوف اردوغان رغم كرهي له والله بحقد عليه شوف بيعمل ايه بعد حركة التمرد مبيرحمش بيضرب شمال ويمين مبيهموش حد لا الغرب والا الامريكان هو شايف كدا من وجهة نظره ، ولازم احنا كمان ،اي حد حتى الاعلام عنده شوف قفل كام قناة شك بس انها هتأثر على امن تركيا لاقال ولاخاف من حاجه اسمها القانون ولا الحريات اما احنا مفيش عندنا اعلام دا بيشتغل للي بيدفع وتحت اجندة كله بيلعب بوظه مصالح تجاره ، مصر بقة ملعب للمصالح ولتخليص الحسابات ، اردوغان لما حس بعد التمرد ان في ناس بتلعب في الاقتصاد عن طريق العملة لمهم كلهم في ساعه واحده اما اخنا ياعيني شغل على تقيل اوي على مسمع ومرئ اجهزة ومسئولين كبار، ماتلمو التجار دوول وريح الغلابه منهم ، السكر والزيت بح خلاص ، خلاصونا من الفساد اللي في المؤسسات الشغل عيني عينك بعيون بجحه ارحم المواطن الفقير الغلبان العيان ، والله الواحد بيموت شوف بس امبارح في مجلس الامن ايه اللي حصل بس علشان اختلاف في الرؤى مش في الملفات خرح مندوب السعوديه على الملأ يبوخ ويلوم حبه حبه يشتم ويعاير كمان ، وبعدها اشتغل الاعلام السعودي وفتح علينا النار بيقول علينا شحاتين واللي قال جعانين واللي قال اننا خلاص راحت علينا ولازم نسمع ونطيع ونبوس الايادي والشباشب كمان ، ياعم دوول ايام عبد الناصر كانوا جنب الحيط كان الراجل معلمهم الادب علشان كدا لازم يقفوا عند حدهم خلاص مرارتنا اتفقعت ياعم اضرب اضرب مترحمش خليها نار العالم كله نار وحنا لسه بنقول القانون والاعراف الدولية وحقوق الانسان ، ارحمونا لما يكون الغرض ضرب الامن القومي مفيش حاجه تانيه الا دا الكوي لا الدواء ، ارحمنى ياعم كوميديا سوداء اه والله لما تسمع ان اثيوبيا عايز تلغي اتفاقية النيل اللي عمرها عشرات السنين وتقلل حصتنا من ميه النيل والله لازم نبكي على اللي وصلنالوا من ازلال ولسه بنقول المفاوضات والقانون هو الحل حل ايه بس مفيش حاجه اسمها كدا قدام روح المصريين مية النيل دا امن قومي وشريان الحياة ، البلد كل الفلوس خرجت منها على يد نظام مبارك وبعدها جماعة الاخوان واللي مموتني مبارك وكل نظامه اخدوا برائة بيتمتعوا بأمولهم وقصورهم وبيصيفوا في المنتجعات ، البرجوازية والاقطاع رجعوا تاني اقرب حاجه شركه من شركاتهم المالية بتعمل في مصر وكأنها البنك المركزي المصري خرجت بإشاعة تعويم الجنيه في وقت قاتل خلت الدولار ب15 جنيه بغرض المضاربة والتربح وضرب الاقتصاد عملنا حاجه ضدها ايه اللي حصل ولا حاجه لا دا احنا على فعلتها كرمناها وخلينا اسهمها في البورصة في العالي عال العال، حتي الاخوان الارهابيين اللي باعوا البلد لقطر والامريكان وبيخربوا الاقتصاد مفيش حاجه شفناها غير كلام وجلاسات محاكمات والنقض يلغي الاحكام والله انا خايف ليخرجوا هما كمان ، الخطأ الكبير اللي احنا عملناه المحاكم الجنائية ، لا .. لأ.. في الثورات مفيش حاجه اسمها كدا في محاكم ثورية دا اللي قاله التاريخ علشان تنجح اي ثورة لكن للاسف حصل العكس احنا مستنيين ايه ، من فينا لا يتذكر اعترفات القيادي في جماعة الإخوان المسلمين محمد البلتاجي ضمنياً بمسؤولية جماعته جماعة الاخوان المسلمين عن أحداث العنف التي تجري في شبه جزيرة سيناء، لما قال البلتاجي " إن ما يحدث في سيناء سيتوقف في اللحظة التي سيتراجع فيها الجيش عما وصفه بالانقلاب وعودة مرسي إلى مهامه" ، اخنا خلاص مفيش عزاء من اليوم دا لازم نتلحلح بقى نلبس كلنا .. كلنا بلا استثناء البيادة والخوزه ونرجع رجاله تاني زي زمان الله يرحم ايام ناصر والسادات ، الله يرحم احلى شباب .

#احمد_البهائي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات