بالعاميّة وبالانكليزي هماتين

ايفان الدراجي

الحوار المتمدن-العدد: 5285 - 2016 / 9 / 14 - 09:44
المحور: حقوق المراة ومساواتها الكاملة في كافة المجالات
    

(The Arabic version)
- شكد صارلنا سوا؟
حبيبتي سألتني. ما اعرف شنو خطر على بالها وسألتني هلسؤال وهي دتسمع اغنية من البوم اليسا الجديد. بدون ما اصفن او أفكر جاوبتها:
- ليش تسألين هلسؤال؟ من يوم انولدت واحنا سوا.
جواب قطعي ما فكرت بيه ولا قصدي منه أكون رومانسية او ابيع براسها كلام تعرفون ليش؟ من تكون اسؤا طبّاخ بالدنيا ويومية تجبر نفسك تاكل خرابيطك لو تطلب ديلفري شغلات سخيفة وكلها دهن وفجأة من احد يعزمك على طبخة بيت صارلك كومة مماكلها عقلك يبدي يسوي فورمات وحذف وإعادة تنصيب لكل خلايا الذوق عندك ولكل صورة بذاكرتك عن الاكل قبل هلوجبة. تبدي تاكل باستمتاع كأنما اول مرة بحياتك تاكل وبشكل مقدس هماتين. هلشي بالضبط ينطبق على السعادة. طبعا لا مجال للمقارنة بين الاكل والسعادة بس لاني احب الاكل ضربت هلمثل!
أحيانا احس عقلي تناسى مع سبق الإصرار والترصد كلشي مريت بيه، طبعا اقصد بكلمة كلشي هو كل ما بين قوسي الألم والخيبة والتعب والخداع والكذب والاذلال، مثلي مثل أي بنت عايشة بالشرق الاوسخ مضروبة في سين من المرات. ليش؟ بكيفي... لا اتشاقى مو بكيفي، لاني مثلية، متمردة على واقع الشرق الاوسخ وكل قضبان سجنه ابتداءا من الدين وانتهاءا بفكرة انو ركوب البايسكل حصرا بس للرجل مو للمرأة. عززززززة مره تركب بايسكل؟ ليش مو الله مال المسلمين ينجلط بعرشه!
بس هلنسيان مو نهائي. تماما مثل ما اكو تيمبروري فايلس باي هارد ممكن ترجع من خلالهن شغلات محذوفة اذا انت تريد. من امشي بالشارع او اقره بوست بالفيس او اسمع سالفة تذكرني بشغلة تناساها عقلي هنا تبدي تشتغل فلاشات الماضي وتركع صافرات الإنذار براسي. اني شسوي بهلحالة؟ رأسة اشغل وضع الطيران وافصل من الرئيسي وكس اخت الشرخ الاوسخ بعد ما اضيع ثانية من عمري الجديد عليه.
ابسط مثال...
نسيت شلون طباختنا كلها تشتغل ع الغاز عن طريق اللهب، وكم وحدة ووحدة مسكينة احترقت وماتت او تشوهت سواء بحادث او انتحرت من وره ضيم رجلها او أهلها. نسيت احنا ما عدنا رصيف وحالك حال السيارات تمشي بالشارع وتتلفت وتركض والحذر يقره براسك الف لا يضربك واحد وتروح بيها. نسيت بهذله التكسيات بالعراق طبعا لان البنات ما ممكن ياخذون شي اسمه مواصلات عامة هاي اذا بعدها موجودة وشغّالة –الباصات يعني- لان معناها –اذا رجعت للبيت- فترجع وبايدها مولودها! التكسي هم طيحان حظ بس ع الأقل ترجع حامل يعني بيها باب وجاب فد كم شهر! نسيت شلون اتوسل باخواني حتى يجيبولي شي من السوق لان ماكو بنية تنزل للسوق لوحدها تتسوق، هم ترجع حامل! اضعف الايمان اخليهم يوصولني لشي مول او سنتر كبير حتى اشتري منه الي اريده وارجع. نسيت شلون لما تريد البنية تقدم على وظيفه لازم اول شي تراعيه يكون رب العمل او احد يشتغل بالمكان عرف او قرايب حتى تتجنب ترجع لاهلها حامل. كل هذا وهماتين اكو احتمال تحمل لان المره مجرد لحمة شهيّة مهما تلفلفت وتجفّت الشر يظل الذيب يشتمها ويشتهيها حتى لو مو جوعان. نسيت انو ماكو شي اسمه بنية تمشي لوحدها بالنهار طبعا تروحلها أي مشوار ولو لبيت صديقتها الي بمنطقتها، اما بالليل ماكو بشر يمشي شنو هلحجي استغفر الله!
لاحظت اغلب الشغلات الي نسيتها تسببلي الحمل مو؟! لان شي مؤلم انك كنت عايش اكثر من ثلاثين سنة مجرد (كس) بنص قضبان منتصبة اربع وعشرين ساعة تتقاتل على نكحج او محاولة نكحج وممكن يرضون حتى بالاحتكاك وهذا اضعف الايمان –اذا انتي محظوظة طبعا- شي مؤلم جدا. وبعد كل هذا اجي الاقي طعم السعادة لأول مرة بحياتي بين ايدين انسانة حنونة تحترمني وتخاف عليه وتعاملني كانسانة وبنص مجتمع يعاملنا احنا الاثنين كبشر بمساواة مع الكل. حقه عقلي مشتغلني نسيان اكس ومربع لو لا؟ لهذا صارلي هواي مكاتبة شي لان ما عدت اهتم شيصير بالشرخ الاوسخ ولا عاد يهمني ينصلح حاله. هيجي عايشة انتعاش اناني لذيذ.

#ايفان_الدراجي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات