يسألوني لماذا انت ساخر

جان نصار

الحوار المتمدن-العدد: 4098 - 2013 / 5 / 20 - 18:39
المحور: كتابات ساخرة
    

يسألني الكثيرين لماذا انت ساخر في كتاباتك وحتى في اسلوب حياتك وغير جدي وضاربها بعرض الحائط ولا سأل على اشي..انا اجيب لاني من يوم ما وعيت على الدنيا وكل شي ماشي بالعكس يعني منضربها يمين بتيجي شمال.اصلا انا زعلان من اول يوم ولدت فيه لانه اهلي ما استشاروني اذا بدي انولد بهاي البلاد او اذا كنت ارغب بالانتماء الى الشعوب العربيه او لا .وهاي بحد ذاتها اصل المشكله..ومن يوم الشاعر ما كتب :ماكل ما يتمنى المرء يدركه تجري الرياح بما لا تشتهي السفن.. وأخينا كان عارف انو بيت هالشعر طابو وماشي فقط عند الشعوب العربيه وصار ستغمه مطبوع على جبيننا.
يا جماعه فكركو ان الوطن هو مكان الولاده من بطن امهاتنا او المكان اللي متنفس فيه بحريه؟
الاماني والامنييات لا تتحقق ,الطلب والطلبات بيجي عكسها,السعي والمساعي ولا هي في الوارد وكل هاي المواضيع على الصعيد العام والصعيد الشخصي.
على الصعيد العام سنوات واحنا نناضل ونطالب بالحريه والعداله الاجتماعيه وبعد كل هالسنين ونتيجة ثورات الفصول الاربعه بنحصل على حكومات دكتاتوريه دينيه عنصريه اقصائيه...ناضلنا لسنوات لاحزاب يساريه اشتراكيه علمانيه تحترم توجهاتنا الانسانيه طلعلنا احزاب دينيه سلفيه تريد تدين السياسه وتسيس الدين والعوده الى عصور الجاهليه.
الشعوب في كل العالم تتقدم وتمشي الى الامام واحنا نتأخر ونمشي الى الوراء .قبل 40 او 50 سنه كان وضع المرأه افضل مما هو عليه الان يعني كل هالنضال وبيجيب مردود عكسي. واليوم المرأه من خلف الحجاب تطالب بالمساواه وبقلك انه هناك امل في التغير.ولا يأس مع الحياه ولا حياه مع الخس عفوا اليأس.
وزي ما قال ابو فلان وشر البليه ما يضحك..شعوبنا اكثر شعوب العالم عنصريه همجيه ومتوحشه.وكل هاي الاشياء كانت مخباي بقشه واليوم ظهرت بشكل شرس وبان المستخبي لا وسطيه ولا اعتدال هذا كان زمان.
عربي كردي درزي وتركماني..عنصريه فوق التصور مسلم مسيحي درزي بهائي يزيدي وغيرو.الصراع والقتل والسحل على ودنو بين الجميع.
بين الاسلام وغير الاسلام من طوائف مسيحي يهودي بهائي وبوذي وهندوسي هاي شوي ابعد عن منطقتنا.
مسلم مسيحي .مسلم سني وشيعي .عربي وكردي.علماني ومتدين .اخوان وسلفي وقاعدي وعلوي ومعتدل. يساري اشتراكي يميني لبيرالي ملحد متدين متزمت اصولي وكل ما يخطر على البال.
يكفي نظره سريعه على احوالنا وهي محزنه لدرجة السخريه .
الاوضاع في سوريا من قتل وسحل وتقطيع واعدام ومشاهد تقطيع واكل الانسان لاخيه الانسان ومع النظام وضد النظام والحياد كله يقتل ويهجر.
مصر الاخوان والسلفين والمعارضه واسلام ومسيحيه كله مختلط الحابل بالنابل .العراق ماكو حتشي تمام لا مجال للتكرار اوضاع امن مستتب ولا في الاحلام.وما بدنا نتكلم عن تونس واليمن وليبيا والجزائر استقرار سياسي وعاطفي يضرب فيه المثل. الاردن والمغرب على صفيح ساخن ووجد ان الاردن اعلى نسبة عنصريه في البلاد العربيه والخير لسه جاي.
الفلسطينيه محافظين على الصداره في الانقسام وكعادتهم ما بستفيدوا من أي شئ بيكون لمصلحتهم من يوم يومهم .اما دول الخليج وعلى رأسهم السعوديه وقطر هولاء مولعينها وبرقصوا حواليها.
على الصعيد الشخصي بصراحه الامور مش جايبه همها ومن يوم ما كانت المرحومي الوالدي تقولي يا ابنيي المنحوس منحوس و لو حطولو ميت شمعه وفونس.( طبعا المثل محرف شوي منعا للاحراج من القراء).يوم ما ولدت وضعت في الحاضنه لاكتمال النمو اما اليوم فعلى جسمي ارطال من اللحم تطعم قبيله بحالها لمدة شهر اذا مش اكثر.درست في الخارج وكان شعارنا التحصيل العلمي والعوده الى الوطن .وعدت الى الوطن واصدقائي عادوا الى الخليج وصار كل واحد منهم مليونير وانا مديونير ليش لانو حب الوطن صبح علي.وكل ما واحد يسألني شو درست اقولو مهندس يقولك يللا الشغل مش عيب.قدمت طلبات للحصول على وظائف قد شعر راسي وصار عندي هوايه تقديم طلبات والبحث عن وظائف امارسها لليوم وانا تقريبا في سن التقاعد وامارسها انا وابنائي الخرجين على اساس اني صاحب خبره طويله في هذا المجال.حاربت الجميع حتى طواحين الهواء زي دون كيشوت ورفعت شعار لا للمهادنه والمداهنه والمساومه وتمسيح الجوخ ونعم للاخلاق والمطالبه بالحقوق والمواقف الثابته وكلها شعارات المفلسين امثالي..كله خلف خلاف شو ما بطلب وبتمنى بيجي العكس حظي نايم زي حظ كل شعوبنا العربيه.اذا قلت يا رب ا بعتلنا رزقه بدق الباب فاتورة كهرباء او ماء للدفع تلفون من صاحب البيت يطالب بالاجره مكتوب مسجل لدفع شي ضريبي .بطلت اطلب انه تنفرج الحال على اساس انه يمكن يخف حمل الدفع وكمان ما مشي الحال.
حتى في الرياضه اذا كنت اشاهد مباره كرة قدم مثلا بين اسبانيا وايطاليا وكنت اشجع اسبانيا مثلا بتقوم البرازيل بتغلب مع انه ما بتعلب في المباره كيف هيك صدقوني ما بعرف معقول يا ناس .حظي واقف مش قابل ينام.
علمتني زوجتي الاجنبيه مثل: انو الحظ لما يتعب بنزل وبركب اول تيس بلاقيه في طريقه..انا بحياتي ما شفت تيس اكبر مني امتى بدو يجي حظي ويا سيدي يركبني بس يجي.
وبسألوني ليش انا ساخر جاوبهم يا ابو فاخر ..

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات