صرخات دارونية

داليا محمد

الحوار المتمدن-العدد: 3204 - 2010 / 12 / 3 - 21:14
المحور: كتابات ساخرة
    

صرخت صرخات في البرية, صرخة واضح انها قاصرة فلم تجد اي صدي, فالبعض اثر السلامة او حتى مع الإفلاس والعجز عن الصد او الرد ومن باب إثبات الذات او الدفاع عن الذات العليا الدارونية انبري في أحاديث لولبية انا قلت يمكن العرق الدروني نقح عليهم وصورة الجدة تاكل الحشيش اختلطت عليهم فتكلموا عن الفجر والجرجير ما هو برضوا في دمهم بعض ذاك الحشيش والبعض يا ولداه تاه في الفضائيات اللي شاله علي يا تري الصباع اليمين أطول ولا الشمال والكلام اللي لا يودي ولا يجيب أنصاف مشايخ أمام أنصاف متعلمين بينهم ناس كده هلاميين لا تعرف هم مع مين ولا مين... بعضهم حسب تفسيري المتواضع اعتقد كده والله واعلم فهم نظريات داورن والعمل مع الحفريات علي إنها غاية المطاف من رب العباد فحملوا الرسالة الدرونية واشتغلوا علي حفريات عهود الرسل والرسالات وشغلوا بالهم بحفريات في تاريخ زواج عائشة وكم رضعه وبول البعير وكأنه غذاء عليهم التحقق منه كما يتحققوا من حفريات القردة أردي والجدود العظام من أشباه الإنسان ناس كده بيدخلوا علي ثلاجات التاريخ يطلعوا أي طبخة كده ولا كده يشغلوا بالهم بها وكما يريد الغرب وعلمائه إثبات وجود حلقة مفقودة بين الجد القرد والإنسان هم يشغلوا أنفسهم بإيجاد حلقة مفقودة لتدمير رموز الإسلام واهو كله سعي برضوا

بس علي الأقل داروين كان يبحث عن حق وسافر وراح وجاء وحلل وقال ممكن برغم إنهم يقولوا لا مؤكد لكن المساكين يبدؤوا بالمؤكد وحصل وهبل واللات والعزي حصل وكأنهم كانوا في الحجرة المجاورة يتلصصوا او كأنهم عواجيز الفرح اللي شافوا كل قصة وكل هفوة وكل ما يقال هنا وهناك عواجيز بقي وما لهم غير الحكايات والقيل والقال

ولا اللي يا نضري لسه ها تقرءا النضرية يمكن تفهم النظرية ....

وصرخة أخري ردوا علي وقالوا عرب مين مسلمين مين دول أصحاب سيوف دول دخلوا علي البلاد بالسيف شوفوا فرنسا دخلت علي مصر بالعلم... يا حلاوة وايه كمان... معلش ما فهمتش هي فرنسا لما جائت علي مصر كانت معاها بنادق وسيوف ولا كان الجنود جيين لبسيين بدل رقص... كانت جاية تنشر علينا العلم ولا كانت جاية تحتلنا طب وانجلترا كانت جاية تخرجنا من بحر الظلمات برضوا ثم الشملولة فرنسا عملت ايه في المغرب ولا حتي في الشام تكنش كانت سبب نهضتها واحنا مش وخدين بالنا....

ولا اللي حبت ترد وتقول مين دول العرب دول حتي ما عندهمش مياه حتي للشرب كانوا ينظفوا أزاي شوف السؤال الذكي اللي يحير فعلا ضربة قاضية سؤال يدوخ النملة فعلا.... والصراحة كان لي عندي لها سؤال طبعا مش في هول سؤالها هم لما ما عندهمش مياه للشرب وبما إنهم مألفين دينهم كانوا ليه بيطلبوا عبادات تتطلب المياه ديه كلها ... وبما اننا جبنا سيرة المياة راي الشملولة في بئر زمزم ايه ورأي العلم والعلماء والجهابزة ايه في المكان اللي لا به مياه تكفي وهذا البئر مياهه جاية منين وليه من 1400 سنة علي الأقل مع كل هذا الاستخدام متدفقة وكأن النيل تحتها تفتكري ليه يا حبوبة

لي سؤال هنا عن موضوع الاحتلال والسيف وأنهم أشاعوا الجهل وجابوا العالم للخلف... يا تري العالم وقتها كان فين ... نسمع عن الفرس والروم نعم بس كانت ايه الاختراعات والمخترعين ساعتها منهم ياريت بس حد ينورنا كده وفرنسا وانجلترا كانت بترعي فين وقتها... حد بس يفهمنا كده ايام ما كانت في الأندلس وقرطبة كانت ايه جامعات الغرب الحبوب ساعتها ... حد يعطينا اسم جامعة كده منورة ويمطرنا بأسماء العلماء والنجباء اللي كانوا أيام الرازي وابن سينا وغيرهم يعني من غير ما يكون فيها رزالة لما كان الإسلام هنا وهنا كان فين ايامها فرنسا والغرب كله ومرة أخري لما الإسلام كان احتلال والسيف والمقلاع روما والفرس ومن بعدهم وقبلهم كل احتلال كان داخل بايه ببدل رقص وطبول ومزامير وكانت الناس بتترمي في حضنهم وتقول لهم انبي احتلونا يمكن ما هي فرنسا دخلت علينا بالعلم....

واعذروا محدودية فهمي يعني أصله علي قدي كده هما كانوا في الأساس بييجوا لينا ليه هم كانوا بييجوا محتلين ولا أصحاب وإخوة كده زي ما أمريكا دلوفت في العراق ....يعني كانوا جيين يحلبونا ولا عشقنا في الظلمة وجايين ينورونا كده ويؤنسونا.... معلش بس عشان موضوع الجزية ده هم كانوا بييجوا يوزعوا فلوس علينا ولا كانوا بييجوا ينهبونا ... يعني علي ايامهم ما كانش في جباية ولا كان في كل انواع الجباية

ويا تري القبطي اللي كان بيدفع الجباية وأصبح بيدفع الجزية ليه بقي أتخلي عن دينه وركزوا معايا هنا ليه أتخلي عن دينه ودخل في دين يخليه يدفع نفس القيمة وأكثر زكاة مال زكاة زرع زكاة صيام إفطار كل شيء مدفوع وحج ومليون صلاة لا واللي جاي أكثر يعني كان بيدفع جزية ويحاربوا عنه ويدافعوا عنه طبي ليه يدفع زكاة ويدخل يتجند ويحارب ويجاهد ويتبهدل الا لو كان الأقباط ساعتها عقلهم كده مش ولا بد او حسبوها غلط ...

وبالمناسبة حد عارف عدد المسلمين في الصين وروسيا ... ملايييييين برضوا بالسيف ما سمعناش عن حروب هناك كل ما قيل إنهم دخلوا محبة وتشبه بالمسلمين اللذين عجبت أعمالهم وأخلاقهم وبالتالي تبعوهم ولا عند أصحابنا الآخرين رأي أخر... واللي خلاهم مسلمين حتي يومنا هذا برغم حظر الدين ايام الشيوعية في روسيا وحتي اليوم في الصين ليه استمروا مسلمين وليه مازالوا متشبسين بهذا الدين... وبالمناسبة في دولة كاملة مسلمة هي باكستان يا تري دخل الهنود الإسلام برضوا بالسيف وأفغانستان دخلها الإسلام كده زي دخول الأمريكان لها دكا بحثا عن سراب اسمه مفجر الأبراج والغريب بكل قوة أمريكا التي تري الناس في حجرات النوم لسه لم تجد بن اللادن هذا حتي الان والغريب ان أصحاب العقول مصدقه زي ما صدقت انه دخل يدور علي أسلحة الدمار الشامل التي برضوا لم يجدها احد تفتكروا هي لم توجد من الأساس ولا اتسرقت زي ما كل شيء سرق في الهجوم ولا ايه بالضبط

نرجع مرجوعنا لسؤالنا عن داروين والدرونيين .... ها نقول داروين راجل كبارة وعلمه واسع وراجل واصل وعارف ماشي علي عيني وراسي هو بصراحة عمل وفتش ووصل لشيء وطلع بنظرية وقال قوله الفصل... ونمشيها انها صح وان من قال أمين عارف إنها صح نقول ماشي من يقول داروين داروين بدل احد احد واثق ومتأكد من النظرية وكله ثقة من شجرة العائلة حتى القردة أردي ... بس اللي قال هبل هبل وحلف باللات والعزي إنها صح يعني عارف كده ان مع كل تغيير ممكن تحصل طفرة وتطور وارتقاء كلام جميل... تفتكروا بعد ما صدق وامن وسجد ورفع أردي جدة علي الأكتاف تفتكروا بعدها يعمل ايه وهو يري بالعلم والعلوم وكل ما يدور خلفنا من تغير في الطبيعة والبيئة وكل المؤشرات التي تقول جو الأرض ها يتغير يعني بمنتهي البساطة معرض كل ما علي الأرض لعملية ارتقاء أخري والا ها يفني ها يعمل ايه صاحب العقل والعلم والعلوم وكل شيء

بعد كل هذا لم نفهم ولم يقولوا لنا ما الفائدة النظرية ديه ها تعود علينا وعلي الإنسانية بايه ... العلم استفاد منها ايه للحفاظ علي الإنسان نفسه وسير تطوره وارتقائه بعد ان تأكد أن الإنسان وان لم يكن له يد في الطفرات السابقة التي وصلت بالقرد للإنسان فعلي الأقل تكون فائدة النظرية في مساعدة الإنسان في الطفرات القادمة ولا هي معمولة لما سبق وتقف عنده ولا تنظر للمستقبل وبالتالي فائدتها ايه لي كانسان معرض للانقراض من نقص ماء وهواء وتلوث ونووي قد يقضي علي كل العوامل الطبيعية الصالحة للحياة الخاصة بي كانسان لا وبكل ما حولي من حيوان وزرع ... النظرية ديه ها تساعدنا علي العبور من هذه المحنة أزاي.....

المفروض مع العلم وتقديس العلم ووضعه في مصاف الأنبياء بل والرب والإله المفروض ان يكون العلم هذا هو سبيل النجاة وبما ان أصحاب العقول استبدلوا ربهم وخلقهم بنظرية درونية فالمفروض ان تكون النظرية من اجل الغد ولا كان لازم تستخدم فقط لإثبات ما هم مفروض مؤمنون به يعني بدل تضييع الوقت في البحث عن اردي استخدم الوقت للبحث عن حفيد أردي من طفرة أخري تحوله سمكة او حتى خنزير يعني بمنتهي البساطة بما اننا نتسلح بالعلم والعقل لم في هذه بالذات كل ما يتم هو محاولة واقول محاولة إثبات النظرية وكأنهم لم يصدقوها وبحاجة لبرهان ليثبتها لا اعلم لم فكرتني بموسي وطلب ان يري ربه وكأنه لم يؤمن به والرد كان لكي اطمئن ... يا تري هم برضوا بيبحثوا لكي يطمئنوا يعني هما لسه ما اطمئنوا ام مش ها يطمئنوا الا لما يشوفوا طفرة حولتهم لسمكة ولا اميبا ليعدوا بس عصر الانوي ثم يعودوا مرة أخري إنسان او حتى قرد.....

كل ما نراه هو محاولة إثبات ان البيج بانج حصلت من مليار سنة وعشوائي كده يا سلام وهل في اي علم حصل عشوائي كده... ها نقول ماشي طب ايه اللي يضمن انه لن تقوم عشوائي مرة أخري... ولا نري اي محاولة للسيطرة علي لا بيج بانج اخري ولا طفرة اخري كل ما يهمهم ان يثبتوا ان ما صدقوه صح طب لما انتم لسه مش متأكدين السنين اللي فاتت ديه شغالين ترويج لها ليه... ولما هي ما لهاش لزمة غير إثبات شيء من مليار سنة ولن تفيد في تغيير مصيرنا القادم طب هي الهدف منها ايه... عقلي العاصي بيقول بس انه لا يوجد الله ولذلك كل ما يهم هو إثبات ان النظرية حقيقية ومش مهم بقي ها تفيد في ايه او تمنع عنا ايه يعني بخبث كده ها أقول لا يفكروا تفيد في ايه وتعمل لنا ايه في صد تغيرات البيئة واحتمالات الطفرة بخبث أقول لا يفكروا لأنهم واثقين إنها لن تحدث لسببين أولا لان الأولي لم تحدث لتحدث الثانية ... والسبب الأخر هو إنهم لا قبل لهم بتغيير حتى نملة فما بالك بالإنسان

#داليا_محمد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات