يجوز إلك بيها إراده !!

داود أمين

الحوار المتمدن-العدد: 2832 - 2009 / 11 / 17 - 04:09
المحور: مواضيع وابحاث سياسية
    

للكاعدين بالوزارة والبرلمان، والمتربعين على الكراسي المريحة بالمنطقة الخضرة، أكول.. طكت أرواحنه وصار لازم نحجي وتسمعونه، راح يصير إلنه سبع سنين وإحنه نمشي وراكم، ومن كبل ما يطيح صدام، سويتو مؤتمرات لندن وصلاح الدين وإتفقتو ويه الأمريكان وجبتوهم وإجيتو بسِدهم ، بلعنه الموس وكلنه هم ميخالف! الجماعة ما قصرو وسوو العليهم، أسسو فيلق بدر، بمساعدة إختهم الجبيره إيران، وحطو بيه الوف التوابين، وحاربو جتف بجتف ويه جيش إيران.. وجدامه أيام حرب الثمن سنين! لكن ما طلع بديهم، لإن صدام مو سهل، وينرادله دوله مثل أمريكه ياله تزيحه! لذلك حسبوها عدل وصار اللي ردتوه! ومن إجيتو للسلطه قسمتو العراق إبيناتكم وكعدتو على أعلى الكراسي.. كلنه هم ميخالف! الجماعه صارلهم 1400 سنه كاعدين بالكاع ومحد مكربهم يم كرسي، خلي يجربون كعده الكراسي ويضوكون طعمها! قسمتو الشعب لطوايف وملل وأديان وقوميات، كلنه هم ميخالف.. الربع عطشانين لطم وقامه وزناجيل، وهذا هو راسمالهم العايشين عليه براس المكاريد، ومشعول الصفحه صدام جان حارمهم أكثر من تلاثين سنه من هذا الراسمال، وما مخليهم يراوون أهل البيت حبهم وولائهم، لأن عزيات السيده زينب بسوريا ومواكب قم بإيران ماكفتهم، وما جانت تنطي صوره صحيحه عن قوتهم وشعبيتهم ومليونيتهم!!! سويتو ميليشيات تتحكم بالناس وتكتل علهويه وتحلل وتحرم بكيفها ، كلنه هم ميخالف، شده وتزول، وهاي ضريبة (التحرير الأمريكي !) بكتو النفط عينك عينك وجدام العالم ولهفتو مليارات الدولارات وأملاك الدولة وبناياتها، كلنه هم ميخالف، تتعوض ويجي يوم وتشبعون! وزعتو الوزارات حصص إبيناتكم ويوميه ينفضح بنصكم حرامي، وكلنه هم ميخالف، الظرف طاريء، وما يخلّه زور من واويه! زورتو شهاداتكم وما خليتو قيمه لجلمة دكتور من كثر دكاترتكم المتخرجين من سوق مريدي، كلنه هم ميخالف، هسه ظلت عله هاي! زورتو الأنتخابات النيابيه اللي راحت وكتلتو مرشحين من القوائم الما تعجبكم وحرَكتو مقراتها، كلنه هم ميخالف، يجوز هذا ثمن المظلومية الجانو الجماعه يعانون منها، والنوبه بأنتخابات المحافظات سرقتو 65 % من الأصوات الجانت مو إلكم واللي إنطتها الناس لغيركم، كلنه هم ميخالف يجوز الجماعة ما قرو القرآن زين، وما شافو السورة اللي تكول ( والسارق والسارقة فإقطعوا أيديهما جزاءاً بما فعلا، نكالاً من الله )! وفوك هذا الضيم كله حرمتو العراقيين من الماي والكهرباء ومن كل الخدمات اللي إتقدمها الحكومات لشعوبها، والنوبه خلقتو مشاكل جديده ما جان العراقي سامع بيها، مره نفط ماكو ، مره بانزين مكطوع، مره الأختلاط ممنوع، مره الشارع مسدود، وهم كلنه ميخالف، الجماعه بعدهم جدد، ودوله صدام إنهارت كلها، والعافيه بالتداريج، ومن بدت الناس تعرفكم على حقيقتكم، وإنكشفت كل أوراقكم كدام العراقيين، اللي شافو شلون همه عايشين وشلون إنتم عايشين! وقارنو الفرق بين بيوتهم النكضانه وأثاثها السكراب، وبين بيوتكم وأثاثكم بالمنطقه الخضره، وشكد معاشاتكم ومعاشات حماياتكم وتكاليف سفراتكم وإيفاداتكم بالدولار الأخضر وبالدينار العراقي، وبين معاشات المكاريد من الموظفين والعمال، وكتها صاحت الناس الداد منكم، لأن ريحتكم وصلت الذاك الصوب، وإنتم خوب مو غشمه، بسرعه إلتاف سكانكم، وصرتو تشتمون الطائفيه، وتسبون المحاصصه وتبرون ذممكم منها ، وصارت الوطنيه ودولة القانون شعارات ترفعوها فوق قوائمكم، والمشكله بعض الناس بعدها غشمه وعبر عليها هلحجي، وهم إنطت أصواتها لنفس الحراميه بإنتخابات المحافظات، لكن أكثريه الشعب مفتحه باللبن، و التكرصه الحيه مره إيخاف من شوفة حبل، والناس اللي إنكرصت مرات قررت هالمره تراويكم قدركم، وتحط لكل واحد منكم طينته بكصته! وصوت الناس عِلّه وصار مسموع، لكن يبين أوراق اللعب البديكم ما خلصت ، والكراسي الكاعدين عليها ما تنعاف، ونكطة الحيا الموجوده بالكصص هم إنزاحت، لذلك جانت لعبتكم الأخيره، لعبة شاطر، وهذا التمطط والجر والعر بتعطيل قانون الأنتخابات كل هالمده، وإختراع ( مشكلة كركوك ) شطاره، تنحسدون عليها! لأن الناس إلتهت بقوانة كركوك، ومن جوه رجلينهم، وبجلسة هرج ومرج، محفوظه بكل الفضائيات صوت وصوره، دهديتو قانونكم القراقوشي! واللي يدلل بكل صدك على إن دولتنه ( دولة قانون! ) وأحزابنا اللي تحكم من سبع إسنين هي الأحزاب اللي تطبق القانون وتحكم بالقانون، وهي اللي تعرف قيمة ( الديمقراطيه ! ) وإجت للسلطه حته تنَّسي العراقيين صورة صدام! وزمن صدام !! وقوانين صدام! وحزب صدام ! وتعيد الحقوق لضحايا صدام ! والناس لازم تعيد إنتخابها!
اكول الصدك، اللي شاف جلسة البرلمان باليوم المشؤوم اللي صِدر بيه قانون الأنتخابات يستحي من يمه، لأن الصياح والهرجه: وإكعد أنت.. وإسكت إنت، وتره أرفع الجلسه، صارت بيومها عله فلس، والنوبه التعديلات الجديده عله مواد القانون، العبرت بنص الضجه والصياح، جانت فضيحه مالها إخت!! وبالأخص الماده الأولى اللي إعتبرت العراقيين البلخارج درجه عاشره، ولكل مليون منهم، مقعد واحد بالبرلمان الجاي! والنوبه المادة الثالثه اللي إتعيد نفس بوكة إنتخابات المحافظات، وتحول أصوات القوائم الما توصل للنصاب للكيانات الجبيره!! وعينك عينك ! وبدون خجل ولا مستحه!
عمي إنتم يلي صدرتو هاي التعديلات علقانون، شنو تعتقدون العراقيين غشمه ؟ لو راح يسكتولكم؟ وهم يرجعون ينتخبوكم، ويمشون وراكم!! ويخلوكم إنتم التقودوهم أربع سنين جديده!؟ عمي العراقيين عدهم عقل ووعي والقانون اللي صَدّرِه برلمان أهل الجوازات الدبلوماسية وكيعان نهر دجله ورواتب الملايين!!! هذا القانون حته لو مر من مجلس الرئاسه، هم ما راح الناس تنطي أصواتها، وتمشي وره إلباكوها سبع إسنين ويردون يبوكوها أربع سنين جايه !!
ذيج السنه البعير طكت روحه، كال آنه ليمته أظل ساكت ومتحمل؟ آنه لازم أحجي ويه الخلقني وجابني لهالدنيه، شافله علوه زينه صعد فوكها، ومد ركبته، وشال راسه لفوك وكال : من دون كل الحيوانات الخلقتها خليتلي حدبه، كلت يجوز إلك بيها إراده! ذبيتني بالصحراء وخليت حصره عليه كطرة الماي، هم كلت يجوز إلك بيها إراده! شكيت شفتي وخليتني آحمّل ذهب وآكل عاكول، رديت كلت يجوز إلك بيها إراده! ومن دون كل مخلوقاتك، المالها حساب، خليت بولي ليوره وسويتني مَثَل بحلوك الناس، هم كلت يجوز الك بيه إراده! إلا من تمشي القافله تخليني أمشي وره المطي هاي شِلَك بيها ؟؟!

#داود_أمين (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات