صلاح الداودي
الحوار المتمدن-العدد: 4448 - 2014 / 5 / 9 - 18:50
المحور:
الادب والفن
يا وطْني غارق الأجراح
لا ترمي دمّك في الرّملة
لا تغربل تصفير أرياح
ما ضايع كان اللّي وطْنَ
حضبة كلاب وكمشة ضفادع
الصارف أكثر من العوّام
والبارك أكثر ملحارك
الشارف أكثر من العارف
لا تفرز راسو مْكِرْعيه
يا وطْني غارق الأجراح
لا تمّن من باعك جملة
لا تعطي سرّك لنباح
لا تملى يدّك من خردة
سمسار مكسّر لَجناح
هو يعبد في الجندرمة
وانت تعلّي في الأصراح
يا ناري على دمّ أولادي
تا يقولوا يجينا الدغباجي
وينو عرقهم وينو شقاهم
تا يقولوا يا بن غذاهم
تا يقولوا غدوة فلاقي
آذاكا صباح وهذا صباح
يا وطني غارق الأجراح
لا ترمي دمّك في الرّملة
لا تغربل تصفير أرياح
ما ضايع كان اللّي وطْنَ
حضبة كلاب وكمشة ضفادع
الصارف أكثر من العوّام
والبارك أكثر ملحارك
الشارف أكثر من العارف
لا تفرز راسو مْكِرْعيه
#صلاح_الداودي (هاشتاغ)
كيف تدعم-ين الحوار المتمدن واليسار والعلمانية
على الانترنت؟