قصيدة : -شافيز- .. يا راجل

طاهر كمال عبده

الحوار المتمدن-العدد: 2887 - 2010 / 1 / 13 - 01:21
المحور: الادب والفن
    

ـــــــــــــــــــــــــــــــــــــــ
حرام عليك يا شافيز صعبّتها عليهم
وسحبت كل البساط من تحت رجليهم
الرقّاصين ع الحبال كعبلتها فيهـــــــم
هما اللى جابوا الهوان لبلادنا بإيديهـم
******
المدبحة أما إبتدت الكل بان محتـــــاس
الفتحاوية اللى بانوا شمتانين فى حماس
وحماس تشلفط ماضيهم وتتهم عبـــاس
والأنظمة المُفلسة باعت قواضيــــــــهم
تتباكى ع المجزرة وتقول :حلال فيهــم
ده رافض التسوية وهوّه عينه فيهـــــــا
واللى بيحلم بها ويقولك : إلغيهـــــــــــا
وده رفضها وقال : أنا فيها يا أخفيهـــا
واللى يصب الزيت ويقول بأطفيهــــــا
والشعب هارش كده ..ماطلبشى حرب وكََََرّ
قال بس معبر رفح يبقى لغـــــــــــــزة ممر
والغاز مايبعتوهوش دعم لجيوش الشـــــــر
واللى فى بلده ســـــــــــــفير برّه البلد ينجر
******
إتلملم المتعوس على اللى خايب رجا
ومعاهم الموكوس اللى زمانه إنقضى
والمكرفون إشتغل والكل قــام إنبرى
بالشجب والطنطنة يستنكروا المجزرة
الكل حامى الحمى بالكلمة والحنجـــرة
والكل من جيب جيرانه يبدأ الفنجـــرة
يتخانقوا مين البطل والخيبة متصدرة
ويخوّنوا بعضهم لما بقت مســــــخرة
******
يا وكسة الأنظمة والعجز كاسيهم
واقفين بيتفرجوا متشطفه إيديــهم
وفجأة ذاعوا الخبر إن السفير إنطرد
من فنزويلا الصديقة لمّا الضمير إنتفض
جات م الغريب البطل ولا جاتشى منيهم
حرام عليك يا شافيز صعّبتها عليهم
الرقاصين ع الحبال كعبلت رجليهم
*******
طاهر كمال
يناير 2009

#طاهر_كمال_عبده (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات