المؤسسة .... زجل

رضوان أفندي

الحوار المتمدن-العدد: 7980 - 2024 / 5 / 17 - 12:06
المحور: الادب والفن
    

المؤسسة ...
ــــــــــــــــــــــــــــــــــــــــــــــــــــــــــــ



رزقنا الله لكياسة

ونعمة المؤسسة

وجانا لفرح المزور

بالمايه وياليل ياعين

بثقلو نزل يتكور

على رقص مقص التدشين

واللي حسبناه مقدر

وحلمنا غدا يطلع زين

يبقى ف الغيب يتجرحر

وغدا يبقى بين وبين

والغطاس ولد الغطاسة

يغرق ف بحر المؤسسه

تفرق القوم ف سلوم

لتحت بحر و لفوق نجوم

زحام لتحت مقبره

للي ما يعرفش يعوم

جنان لفوق شكارة

منفوخة ف كرش لمتخوم

و يسبق عمي ونسيبي

ولد لقبيلة وحبيبي

والمعلومة للمعلوم

ونصيبك ونصيبي

بشرع لغابة مقسوم

تّمس لفرح تعاسة

طلع كحل من بوكاسا

اللي صحيح مرص ف الصف

واللي مريض يموت واقف

واللي تفكر يتناسى

واللي بدل وخالف

يتشاع ويستانف

السخون دواه يتكلاصا

بنفسو الخوف طلع طلع خايف

والأمان من لخرايف

والناس نجرهم كراسى

منشار المؤسسه

لسلف مؤسسه

العلف مؤسسه

الصف مؤسسه

مؤسسة ف الزنقه...ومؤسسه ف الدار

ضحك بأوامر .....وتنفس بمقدار

ونعس بقوانين ...وحلم بلا أسرار

المحبة بالحساب

والزريبة للكساب

والزنزانة للتعمار

وحق عليك تفرح

يمكن حتى تشطح

وما عندك ماتختار

واللي عاش أكبر من الهم

يموت أصغر من درهم

واللي ختارو لمقدم

ما يكبر يصغار

طاح الدم نقطة ف سروال العار

وراحت القطة عروسة للفار

والزغراتة والعراسه

شراهم صندوق المؤسسة

على ضو القنديل

خارج المؤسسة

طاح ف لمدينه الليل

كونطوار وعساسة

ودخلت الرهيبة بورديل

وشعشع لخمر ف الطاسه

غرق الدماغ ف الكاس

طلعت الضبابة للراس

ف المخ فلقة

ف لقلب مشنقه

شحال خصني من وقت

باش نقدر ننساه

الحلم اللي الصمت

طواني وطواه

مازال يعاند

باقي يتوالد

ويفرح بلاه

يصارع بحرو يعاكس مجراه

صعاب عليه يحفى موس ف جواه

أو يدوب ضواسا ف كناش المؤسسة



ــــ زجل : رضوان أفنذي ـــ المغرب

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل