نفسى أقولها من قلبى...... عيد سعيد

حسام شادى

الحوار المتمدن-العدد: 1714 - 2006 / 10 / 25 - 10:25
المحور: الادب والفن
    

مش عارف كتبتها وقولتها لناس وأصدقاء العيد جى أهه عيد سعيد لكن فكرت فيها لقتنى بقولها وأنا مش مقتنع سعيد إزاى يعنى وكل حاجه تقرف فى مصر يعنى كفايه حالات الكوليرا إللى حصلت فى قريتين قريبتين جداً من قريتنا وناس ماتت وناس لسه هتموت مع إنها مش مستهله كوليرا-مش عارف كوليرا إيه فى القرن الواحد والعشرين- بس علشان تموت فى مصر مش مستهله كوليرا ولا وباء أكيد هتموت من الخنقه دخان وتراب مالى الهواء والميه زفت والأكل متنيل ولو ممتش مخنوق من الجو هتموت مخنوق من البلد وحالها وحالك إللى مايل مع حالها يعنى ملايين مش لاقين شغل وإللى شغال لا سمح الله يا بيعانى من قلة المرتب دا لو مستوظف عقبال أمالتك يا بيعانى من قلة الشغل وإنعدامه لو شغال حر لو مش عاجباك الخنقه دى علشان تموت هتتخنق من حاجات تانيه هتتخنق من الناس وأحوالها وإنتا وأنا منهم طبعاً كل واحد بيبص لنفسه بس وطظ فى الأخرين وكفايه عليك المثل الشعبى الأصيل المتعمق فى جزورنا بيقولك بكل بساطه -لو جالك الطوفان حط إبنك تحت رجليك -شفت الحلاوه كل واحد لواحده أهم حاجه هوا مفيش حتى حاجه بتجمعنا مش هنقول كلام خنفشارى عن مشروع وطنى أو قومى لكن هنقول بكل بساطه ملناش زى شعبى ملناش غنوه واحده بنحبها وبنغنيها كلنا ملناش لعبه شعبيه ملناش مشروب وطنى حتى البيوت كل بيت له شكل لواحده وبعدين فينا إيه حكايتنا على فين يا هوا مودينا حتى موضوع التغيير والقوى الوطنيه منحصر فى إطارنا زمرة الساسيين أو المشتغليين بالعمل السياسى أو كما ندعى بيسموه الشارع السياسى شارع إيه دا زقاق أو زى ما بنسميه فى الفلاحيين زقه شارع سد وسكانه قليلين ومع ذلك مش متسع لهم لكن المشكله الحقيقيه إن نادر لما حد بيروح القاق من براه الشعب إللى إحنا منه ميعرفش حاجه عن الحياه فى الزقاق ولو عرف دا لو عرف بيصهين بيطنش بيدى تلاهى -وأنا مالى يا بوى وأنا مالى- غنوه أصيله برضه أهل الزقاق إللى هما إحنا طالعين كلهم من الشبابيك وبيهتفوا ضد سكان ناطة سحاب عصابه كبيره ومتلمعه ساكنه فيها وبيرموا زبلاتهم على الناس أمراض وعبارات بتغرق بيهم وبيمصوا دمهم وإحنا بنزعق فيهم وعتريس كبير السكان عامل فيها كبير على الكل وناس بتهلله ولسه برضه ساكن فى العلالى ولا كأنه سامع أنين الناس وهيا بتموت والمصيبه إن سكان الزقاق بيتخانقوا مع بعض كتير وبينسوا عتريس وعصابته ويا عينى يا عينى يا عينى على الولد وصوت تسجيل شغال مصحوب بدخان أخضر رائحته كريهه وبيقول العنب العنب العنب
وعيد سعيد
إزاى معرفش

#حسام_شادى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل