أغنيات عراقية للمطر والشوق والحب

وليد المسعودي

الحوار المتمدن-العدد: 7453 - 2022 / 12 / 5 - 13:36
المحور: الادب والفن
    

جوه المطر

جوه المطر
انه احسب ايام وليالي وانت غايب يا.عطر
كل شمة منك حيل اترد حياتي بلا خطر
ملهوف ادورك دوم حظي وياك مل وما نطر
جوه المطر جوه المطر

جوه المطر
كلمن يمر يوصفني من بعيد وردة وذابله
الفرح وسط الغيم ما يرهم ابد ما صاحله
وبين المناطر والدرب نظرات بس مزاعله
العاشگ يجي لا ما يجي حتى الورد گلبه انفطر
جوه المطر جوه المطر

جوه المطر
اغفرلك النسيان والهجران بس مر وتعال
على طيوري ينام الليل وبجيتك غنوه ودلال
هذا گلبي دمعه دمعه
واقف عالگ شمعه شمعه
يطفه العمر
جوه المطر جوه المطر

آه يا برد منك لفه
على ترابك شفت الجفة
چم مرة ادگ باب الوفه
مثل ميت نساه الشوگ بالغربة انتحر
جوه المطر جوه المطر

جوه المطر جوه المطر
انه احسب ايام وليالي وانت غايب يا عطر
كل شمه منك حيل اترد حياتي بلا خطر ملهوف ادورك دوم حظي وياك مل وما نطر
جوه المطر جوه المطر






**********




اوراق الشوق



يا هو العينه على اوراقچ يا سمره
حرگهه الشوگ وانت بوسط جمره
تدلين العشگ للمايعرفون
وعلى ابوابچ حيارى شگد يدگون
يدگون يدگون
وانت بحر ولا واحد يعبره
ياهو العينه على اوراقچ يا سمره

ياهو العينه ومنو يصدگ تحبين
غزل واشعار على الناس وتدارين
بعد ما يفيد مضموم
تبين كل شي ثاريه
الحب بالگلب نار
ونهر فاضت مجاريه
طير انت وتطيرين
والگاع الچ خضره
يا هو العينه على اوراقچ يا سمره

يا هو العينه وخله الشمس تندار
على العشاگ تضوي اسرلر واسرار
العشگ يا بير
هذا انت وتضميه
يحترگ بالنار
كل هايم يغطيه
وعليچ تذوب حسرة الف نظره
يا هو العينه على اوراقچ يا سمره

يا هو العينه على اوراقچ يا سمره
حرگهه الشوگ وانت بوسط جمره
تدلين العشگ للمايعرفون
وعلى ابوابچ حيارى شگد يدگون
يدگون يدگون
وانت بحر ولا واحد يعبره
يا هو العينه على اوراقچ يا سمره


***************


حلاوة الروح




يغلبني
بحلاة الروح
هذني المرن بگلبي ومشن
ما تركن اثر ما حفّرن بي ختم ضحكه
يبيعن وما يشترن

يغلبني
وانا المغلوب وياهن
ما حضرت درسي
وعفت الورق ابيض
عليه اعيونهن تكتب
وانا أعيد وانا أعيد
باجر تعال وخلي الغروب
سبع شمعات يضون بالمواعيد
واجيهن الگه بس صفنات الدروب
مل الوكت ودموعه صبن
وباقي ذاك العاشك بگلبي
شگد ينتظر
كل سوالفهن جذب
يبيعن وما يشترن .

بغلبني
بحلاة الروح
هذني المرن بگلبي ومشن
ما تركن اثر ما حفّرن بي
ختم ضحكه يبيعن وما يشترن

يغلبني
واعوف اشواگي يمهن
ما بي حيل
اركض وراهن والعشگ عدهن
صبح وليل
خطواتهن زخة مطر
وانه الندى بيناتهن
وشيلحگ بزخة مطر طير
امبلل ومكسور الجناح
كلما يمرن يحسبهن ندى
بوسط الهوا امعلگه الافراح
باجر تعال وخلي گلبك نار نار 🔥
ندفه بيهه بالشتا
وما بين حنيتك نذوب نذوب
وكل حضن عندك يكبر دار دار
ما تسمع ابد ونته
واجيهن الگه بس صفنات الدروب
مل الوكت ودموعه صبن
وباقي ذاك العاشك بگلبي
شگد ينتظر
كل سوالفهن چذب
يبيعن وما يشترن

يغلبني
بحلاة الروح
هذني المرن بگلبي ومشن
ما تركن اثر ما حفرن بي
ختم ضحكه يبيعن وما يشترن




**************

لا حبيت ولا انحبيت



لا حبيت
وهذا گلبي مثل طير
يرفرف بشوگ اليحب
لا حبيت
وهاي روحي مثل ضحكه
ورافعة عيون الدرب
وكل السنين مناطرك بس
يا حلو گضيت
لا حبيت ولا انحبيت
ولا ضون ايام العشگ
شمعة بزوايا البيت
اشموع بزوايا البيت
لا حبيت ولا انحبيت
لا حبيت ولا انحبيت

لا حبيت
وكل النذور
تدگ سمايه هواي
لا حبيت
وكل الوجوه
تريدلي الجاي
نهر وبصفه بستان
وعليه الورد شميت
شميت وتعديت وتعديت
ويم حسنك لفاني
الصبح وانسيت
كل الابواب مفتحة
وكل الضوه
شمس وضحه
وما جني عطشان
وخضرت ورويت
وما چني عطشان
وخضرت ورويت
لا حبيت ولا انحبيت
ولا ضون ايام العشگ
شمعة 🕯 بزوايا البيت
اشموع بزوايا البيت

لا حبيت
واگولن لليجيني بلا گلب
صفنات راحن واجن
وانه بحلم وياك
نركض وايد بايد
وچم مرة نغرگ بالتناهيد
وعلينه المطر نازل بالمواعيد
وضلت اهناك ابعيد ابعيد
جلمة الياريت
وضلت اهناك ابعيد ابعيد
جلمة الياريت

يا ريت يا ريت
ما اعضن بالشفايف
واكول الگلب خايف
لا حبيت ولا انحبيت
ولا ضون ايام العشگ
شمعة 🕯بزوايا البيت
اشموع بزوايا البيت



*************


طبي يا بنية


طبي يا بنية

طبي يابنية
الشمس خجلانة من ضواج
والگمر ذايب ذايب
ويريد ملگة
محسود بهواچ
طبي يا بنية
العشگ مو مستحيل
بس درب هاي المدينة
ليل يكبر
يلملم اچدام وسوالف صافية
تشوف الرحيل
بعين نجمة وغافية
بسد النهر
وما تعرف تشيل
ايدين لو رجلين
لو حتى النفس
ما ينطي روحه معلگ
بحزن المدينة
شكد بخيل
شگد بخيل

طبي يابنية
الضوه
يا هو اليوافيه
لو ضاع من عينچ
وما يجافيه
ذاك گلبچ
الله يدري بالدمعات
نهرين صبن
للملگة حنن
الف شبگة تنام زعلانه
المخده مفارگة الوردات
والنظرات
وبدمچ سؤال الليل
ما ينتهي حيل
يا هو اليشافيه
هذا الدرب
حتى المطر ينزل عليه
بغيمه فرحانه
ويا هو اليعافيه
حتى الحبيب يمر
يمر ندى
وفارش احضانه

طبي يابنية
بلكت يجي باچر
سوالف صافية
واجدام تمشي بدرب
حلمانه كلش غافية
بيهه الحبيب الورد
شمة عطر
والبرد
ما شاف عينچ
طافية
ما شاف عينچ
طافية




.

#وليد_المسعودي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل