رباعيات وجع القلب والفرفرة.. عامية مصرية... شعر.. سمير الأمير

سمير الأمير

الحوار المتمدن-العدد: 7199 - 2022 / 3 / 23 - 15:09
المحور: الادب والفن
    

شعر سمير الأمير
رباعيات وجع القلب والفرفرة.(بالعامية اامصرية)

1

كنِيت ف حضنك زي طفل بريء
ف الحلم طبعا مش،بحق وحقيق
ومفيش لا دنيا ولا بشر بتلوم
نفسي أقوم،الاقي نفسي جرييء
٢

وربي ما فيك لا حاجه واحدة تتعيِّب
عمرك خفيف ع القلب وحلو وقريِّب
بس الزمن ياجميل عداك وعداني
لو يجي من تاني،عمر نشاني ما يخيِّب

٣

ماشي لوحدي من غير هدي أو علامة
لو خدت راحتي، اضمن منين السلامة
خايف ياخدني البوح،ف دوح الربيع
الاقي نفسي باضيع،ويقومولي القيامة.
٤

يعني اطمئن واقول وحشتيني؟
ولا ساعتها تغضبي و تطلعي عيني؟
وتقولي ناقص رباية، والدنيا تهددني
ولاحد يستجرا وينجدني لو قتلتيني؟
٥
و(احشني)، لوقلتها ما يسألوش عن سبب
و(حشاني)،تبقي قليل الأدب
وضع الألِف،هوه السبب ف الحريقة
منطق سخيف الحقيقة،وحاجه ليها العجب
٦


عديتي كام م العمر،كتر خيرك؟
راجع بطيء وكئيب قوي من غيرك
بس مواسيني،رغم قلقي وهمي
إن انتي باقية ف دمي،كتر خيرك.

٧

خبيني حب وحنان،لا عار ولا خيبه
كلي مشاعر جريحة،كلك مقدرة وطيبه
هربان لحضنك من زمن اجرام
خلط الحلال والحرام،معادش فيه عيبه
٨


خدلك يومين شمسار مُهج واقعة
روح اتلهي علي خيبتك الناقعة
بكره نقابلك ف اخرة الأيام
عاري من الاحلام، بتكتك من الساقعة
٩


من انهي سكة تحبها ياحزين؟
دي فرفرة احلام وفاتها سنين
كمل يومينك جنب حيط الصبر
القطر عدى،راح تجيبه منين؟
١٠


يادي الزمن بالراحة ما تجريش
انا عجوز"هلكان"ونفسي اعيش
شغلت خالي صبيه دشدشت قلبي
مش ذنبي،لو رجليا ماتشلنيش!!
١١


لا حِس فيِّا لا بجسد ولا روح
كأي كرسي قديم فوق السطوح
لاحد بص عليا ولا عبر المنظر
وياريتني أشعر ،حتي بألم وجروح



١٢

منك لباب السما،ياريت يكون مفتوح
دعوة ترد الحبيب،تشفي فؤاد مجروح
يا رب لا يعجزك ترَّجعه تاني
صحيح ف طبعه أناني،لكن يرد الروح

١٣

كأني باصرخ ف البريِّة واهاتي
لا منها سِمعِتني،ولا مني عشت حياتي
والشعرا خافوا اختفوا،مابانش،منهم حد
إن جيتوا بقي للجد،رعبتهم رباعياتي!

١٤

ولولا هيه كنت غنيت فين؟
صوتك سحرها ب ياليلي ياعين
نامت بتحلم بالغرام والحب
قايمه تِشِب،ازاي بدون رجلين؟
١٥

ولولا هيه،كنت انا ضليِّت
وكفرت بيها بعد ماصليِّت
دي بنت صافيه،كل روحها جمال
زرعت آمال ف ضميري،وانا حبيِّت.
١٦

قلم الحساب مفروض يترفع عننا
مهما جرينا بنلحق ايه ف سننا؟
حتي ان مسكنا عمرنا ما بنعفق
لا مؤاخذة لو نعشق، بنشتغل نفسنا
١٧

الطيبه في وشها،زلزلت قلبي
فطب في حبها، انجدني ياربي
هوَّه اللي مال يمَّها،هوه اللي يتأدب؟
حرام أنا اتعذب، بذنب، مش ذنبي
١٨

عديتي، عدي روحي يا ختي لحالك
معادش باقي ف عمري ما يبقالك
رجعت ملامحي، كنتي ضيعتيها
كلبشت فيها،حاعمل ايه بجمالك؟
١٩


العمر كان سيرُه ف ضل مسيرِك
رجع كئيب وبطيء قوي من غيرِك
بس مواسيني،رغم زهقي وهمي
باقي هواكي في دمي، كَتَّر خيرِك !

٢٠

عديتي طير الدوح وطير جارح
واحتارنا بين دي الوقتي وامبارح
مرة كنسمة صيف ومرة كالإعصار
مع بعض جنه ونار، مرار طافح !!
٢١


عديتي فوقنا،كام مانيش فاكر؟
لا المخ دفتر ولا ف الحساب شاطر
كتير ما شاء الله،عشاقك الضايعين
ضحايا قلب لعين،مفتري وقادر !!
٢٢

عديتي فوق العمر ست سنين
يوم جنه،يوم نار،وكفر ودين
وِتفتري وترِقي، قسوة وحب
وتقطعي ف القلب بالسكاكين

٢٣
و ياما غدر دهستي طين ونبات
ورسمتي طيبتك سهتنه وسُكات
غلبانه بتربي ف عيال أيتام
وحقيقة الاجرام،تاهت ف الابتسامات
٢٤


عديتي فوقنا واحنا مش قضبان
اتخن ما فينا كان غبي وغلبان
نسي تاريخك، خش ع المستقبل
كان يعمل ايه الأهبل،الحب كله جنان؟

٢٥

عديتي كام من صنفنا المتنيِّل؟
جننتي كام عاقل وخطفتي كام عيِّل
كراكة تغرف من قيعان الدنيا
ولا ثانية بتغفل،ولا تقيِّل

٢٦

تاكلو جاتوه، ليه ما تكلونا؟
الطعم أحلي، ياللي نسيتونا
والستر أجمل واحنا وياكم
وكنا صنَّاكم وصنتونا !
٢٧

خفي شويه، انا روحي وجعاني
ياما جننتني ف دنيتي أماني
وانتي جمالك منبع الإجرام
وكمان، حرام، في العمر ده أعاني !

٢٨

الحب بالقصد، رَعي جمب الحِما
وأغلب الظن،آخرُه هم ودما
لكنُّه لو طَب ع القلب،لا تعانده
ده رحمه من عنده،وحنان م السما
٣٠

الحب بالقصد إجرام و وز شيطان
ولو طبيعي لوحدُه يبقي أحلي جنان
يارب أوعدني بقدر ونصيب
وقلب مخلص حبيب، ينجدني م الحرمان!
٣١

فيه م الجمال مجرم ما يرحمشي
مجرم بريء طبعا ما أجرمشي
هوه وجوده كده عامل قلق ف الكون
جنني وانا مجنون،أهبل ما بعقلشي

٣٢

وبرغم سنك جميله يخرب مطن الجمال
لحد امتي جمالك يسحر ويسبي الرجال؟
يخلق أمل للغلابه ويملا ليلهم أماني
وقلوب كتيرة تعاني والحلوة سايقه الدلال

٣٣

البنت دي متفرقه علي كل معني جميل
خضار عيدان الشجر وطمي النيل
بنت العروق والعرق والحلم بالانبات
عروسة ف الحكايات وصبيه ف المواويل


٣٤

لو موتي دمعة ف عنيكي
حابكي ف قبري عليكي
وانتفض ، واقطع الأكفان
ميت وصابه جنان،راجع يعزيكي!!

٣٥
البنت دي بالحق مش موجودة
واعجب ما ف الأمر انها محسودة
كافة قصايدي ف عشقها أحوال
يا محرومين م الخيال دنيتكو محدودة


٣٦

بصراحة كل ما قلته كدب ف كدب
لو يعصروني ما يلاقوش غير حب
ع الدم كل اللي حسبته فات
و نار حرايق الذكريات،بتشوي القلب

#سمير_الأمير (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل