عن لَا وَعْي المواطن المغربي في زمن فيروس كورونا المتحوِّر: تأملات باللسان العربي المغربي الدارج

ابراهيم منصوري

الحوار المتمدن-العدد: 6653 - 2020 / 8 / 21 - 22:06
المحور: مواضيع وابحاث سياسية
    

شفت البارح في واحد القهوة عامرة بالبشر واحد المجموعة كبيرة ديال "les jeunes" المتعلمين جدا والحاملين لشهادات عليا، وهما مجموعين على طبلة بلا كمامات ولا تباعد اجتماعي ولا هم يحزنون، وهما تايناقشواْ مستجدات الحالة الوبائية في المغرب وتايقولواْ كلهم بأنه خاصنا نساءلواْ ونحاسبواْ المسؤولين على هاذ الوضع الخطير!!!

آللّا، آ سيدي، احنا راه متفقين معكم بأنه خاصنا نساءلواْ ونحاسبواْ المسؤولين ماشي غي على كورونا ولكن تا على مسائل متعددة الِّلي منها شي حوايج تدارو قبل كورونا وهي الِّلي ساهمت جزئياً في تأزيم الوضعية الوبائية في البلاد؛ ولكن، آ للّا، آ سيدي، راه الِّلي ما تايساءلشّ وما تايحاسبشّ راسو ما عندوشّ الحق يساءل ويحاسب المسؤولين ولا غير المسؤولين. راه بحالكم الِّلي تايخرّج المسؤولين "الّلا مسؤولين" المتهورين المتقاعسين للوجود: واش يتسحابكم الدولة باراميتر خارجي ولّا جايّ من خارج الفضاء ولّا؟

راكم خاصّكم تعرفواْ بيلّا كاينة علاقة جدلية قوية بين المواطن والدولة لأن جودة المؤسسات العمومية وأدائها تاتتوقف على مدى وعي المواطن ونوعية المخيال والعقلية ديالو، ولأن نوعية مؤسسات الدولة تتأثر بدورها على وعي المواطن. باراكا من الفعل والقول العيّانين: انتما مجمّعين بكثرة بلا كمامات، بلا تباعد جسدي واجتماعي، وبلا معقمات ولا مطهرات، وتاتهضرواْ بحال شي علماء كبار وفرحانين على ذاك الشي الِّلي تاتقولواْ: "خاصّنا نساءلواْ ونحاسبواْ المسؤولين الِّلي ما تايقوموش بالدور ديالهم لمكافحة الجائحة".

إييه، كاين التقاعس من المسؤولين، ولكن واش انتما نيت الِّلي سايبين وكاتنشرواْ في الفيروس طولا وعرضا ما خاصّ تا واحد يساءلكم ويحاسبكم؟ ولّا زعما تاتسنّاواْ تايجي ليكم المخزن ويفرض عليكم الكمامات والتباعد والنظافة الصابونية عاد تولِّيواْ مواطنين صالحين وقاريين؟ واش بغيتواْ المخزن يدير مخزني ولّا بوليسي ولّا قايد لكل مواطن باش يولِّي كلّ فرد يحترم قواعد التكمُّم والتباعد، ولّا يتبعو المخزن تا للتواليت باش يعرف واش تايغسل بصابون الكفّ ولّا لا ويعرف شحال من دقيقة تايبقى لداخل مع صابونتو؟

راكم مضروبين بلا قياس بعدد كبير ديال المفعولات والانحيازات القاتلة (Effets et biais mortels) الِّلي منها على سبيل المثال لا الحصر:

1) مفعول "دونينغ كروغر" (Dunning-Kruger Effect ) بمعنى أن كل واحد فيكم تايتسحاب ليه بيلّا درجة الذكاء والمعرفة ديالتو تاتفوق لا موايّين جينيرال، وهاذ الشي راه مستحيل تا في الرياضيات الصرفة؛

2) الانحياز التأكيدي (Confirmation Bias: Biais de confirmation)، زعما أن كل واحد فيكم تايمشي غي مع الأفكار الّلي كاتكونفيرمي ذاك الشي الّلي تايآمن به وخّا يكون ذاك الشي غي خزعبلات تراكمية؛

3) الانحياز التفاؤلي (Biais d optimisme) حيث كل واحد فيكم تايقول بأن الإمبراطور كوفيد التاسع عشر مايقدرش يكوفدو، وغادي يمشي يكوفد غي الناس الاخرين؛

4) الانحياز الخَرُوفي ( Sheep Effect´-or-Bias: Biais ou effet moutonnier) أو "مفعول العربة" (Bandwagon Effect: Effet de mode)، بمعنى نزوع كل واحد فيكم لتقليد الآخرين في التراخي والاستهتار كموضة متخلفة؛

5) مفعول النعامة (Effet-autruche: Ostrich Effect)، أي أن كل واحد فيكم تايهرب من الخطر إلى مزيد من الخطر، بحال النعامة الِّلي تاتدفن راسها في الرملة...الخ...الخ...

راه تايبان بيلّا راكم منحازين بزّافّ (Trop biaisés) للمقاربة العمودية لحقوق الإنسان (Approche verticale des droits de l homme)، بمعنى أن كل واحد منكم تايلوم غي الدولة فيما يخص عدم احترام حقوق الإنسان وتاتنساواْ روسكم، وها انتما مجمعين بطريقة فوضوية في عز الأزمة الوبائية-الصحية المزدوجة، وغاديين تكوفدواْ بلعة ديال الناس ظلما وعدوانا، ومنهم اللي غادي يموت!!!

وزايدون، راه الأغلبية ديالكم ما تايديروشّ الصّف في الأماكن المزدحمة، حيث كل واحد فيكم تايتسحاب ليه بيلّا الخروج من الصفّ تايعني أنه قافز وزيزوار، ومنكم كثار اللي تايحرقواْ الضواوات وتايديرواْ الكاسك للموتور عوض مايديروه لريوسهم لأن ريوسهم ربما ماشي مهمين هاذ الساعة، وتايكلاكسُونِيوْاْ فولونتي في أي مكان وبالليْل وبالنهار، وتايلوحواْ الزبل في الشوارع والشواطئ...

هاذ الشي تايعني بيلّا راكم ما عندكومشّ ذرّة وحدة من المقاربة الأفقية لحقوق الإنسان (Approche horizontale des droits de l homme). والّلي ما عندوش مع المقاربة الأفقية لحقوق الإنسان راه ما عندوشّ أي حقّ باش ايكريتيكي الدولة والمسؤولين: سير قادّ راسك هو الاول عاد جي تهضر في القهاوي ولي غيزو سويو وجميع الأماكن العمومية، وإيلا بقيتِ بحال هكّا راك غادي تولِّي واحد النهار مسؤول تا انت وغادي تدركلها على البلاد والعباد اكثر من هاذ الخلايق الّلي شادِّين دابا السُّلط. الثلاث وغيرها...منكم وإليكم...فهمتوني أولّا لا؟؟؟

#ابراهيم_منصوري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات