شلع قلع

كاظم الخليلي
(Kadhem Alkhalili)

الحوار المتمدن-العدد: 6402 - 2019 / 11 / 7 - 13:49
المحور: الادب والفن
    

شلع قلع .. شلع قلع
کلهم حرامیة
هم باگوا النفطات وهم حرگوا الزرع
شلع قلع
حدهه وصلت هالقضیة بهالبلد
ظلم وتعدي ومهزلة ما الهه حد
يشیب الرضیع وهوه بعده بالمهد
وما عنده غیره الیقبل بهذا الوضع
شلع قلع
اجتي ساعة رفعة الراس
وأبناء الشعب للوطن حراس
السیاسي یخسه وبالقندرة ينداس
وکل حرامي بأسم دستور وشرع
شلع قلع
ینجلي غیم القهر وتروح هالبلوه
وترجع الوادم خوات وأخوه
ویدیر الوطن أهل الغیره والنخوه
مو مستفید ومنتفع
شلع قلع
صدگ وتصیر وتطب الناس للخضرة
تکنس هالوسخ وتشمره بالحفرة
ویصیر الچبیر یگدي من فگرة
وبأید الشعب هذا الحکم ینخلع
شلع قلع
عید وعرس یوم النشوف الناس
تحاکم النواب و الساسة الأنجاس
وتشلعهم من شرشهم والأساس
ویشرد الواوي گدام السبع
شلع قلع
حکم الشعب حکم حق وعدالة
ولو کلهم سفلة وخیسة ونذالة
یا شعب شغلهم وأقضي عالبطالة
وأرفع عن التعیین کل رفض ومنع
شلع قلع
شي عینهم بورشات توگف عالمکاین
وشي بالأسواق تفتر بالعرباین
وشي خلي تختص بغسل الحضاین
وبعد ماکو بوگ ولا بلع
شلع قلع
عین موفق بکیه یم سایق سِکن
وعلاوي یشنگ عجینه بالفرن
والعطیة ینظف ظروگ بأبریگ ولگن
والعامري یمثل معرکة بسیف ودرع
شلع قلع
نوري مفتش بمستشفی نفسي للچلاب
وزیباري حارس بمتحف صیاخ الکباب
والیاور بحقل الگنافذ چرخچي بالمشخاب
غیر البچم ما من وراه زود ونفع
شلع قلع
مشعان یقدم لبلبي بأحسن البارات
وعمار یستلم حانوت بأبتدائیة بنات
حنان معقب معاملات الراقصات
وبرهم یوزع غاز بعربانة دفع
شلع قلع
أبو مازن يسرح بالهایشة والغنمات
والخنجر یلم العلف ویشده باگات
وفائق یضحک صخول ویسوي نکات
والصغیر یم برج الحمام، والعتاوي من وگفته تخترع
شلع قلع
للمهندس بسطة جگایر حب علچ
والمطلگ یکسر ثلج عد أبو السمچ
والجعفري بسوگ الغزل یلظم تچچ
والهایس یبیع باسورگ براس الفرع
شلع قلع
وتعین النجیفي تیتي بقطار البصرة
والدایني تُمنح شرفاً عربانة خضرة
الصیادي حارس بباب المقبرة
یتناوب ویاه عبعوب الما ینجرع
شلع قلع
الزوبعي ینظف کرش عد أبو الپاچه بالسوگ
والکربولي یصلح قنادر عالجسر ویلزگ فتوگ
ناصیف تلف لفات پتیته وبیض مسلوگ
والخزعلي يصلح کتالي برتبة مخترع
شلع قلع
الحلبوسي صانع چایچي بباب الشیخ
ولسلیم لوري حمل رگي مبسمروبطیخ
وللأعرجي چمبر سبح وحرمل وزرنیخ
وقداوي یلعب أشقیاء وزیاگه دلع
شلع قلع
لعدولة بحصان أربطولة ربل
وأظن العبادي صعب تلگوله شغل
ویظل یفتر مفخج مثل أبو الجعل
یصیر بي سکر وضغطه یرتفع
شلع قلع
وأحجزلهم یا شعب فد منتزه بی يلتقون
کل خمیس العصر حتی یرفهون
یتناقشون ویتفلسفون ویتعارکون
بس هالمرة من جوع مو من شبع
کلهم حرامیة .. شلع قلع

#كاظم_الخليلي (هاشتاغ)       Kadhem_Alkhalili#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات