ديوان -حس بيا-

ميلاد ثابت إسكندر
(Melad Thabet Eskander)

الحوار المتمدن-العدد: 6392 - 2019 / 10 / 27 - 22:46
المحور: الادب والفن
    

إهداء
إلي كل إنسان مازال إنسان
إلي كل مَن لَوَّحَته شمس التجارب
وفقد الإحساس بالزمان والمكان
إلي مرهَفي الحس خلف قضبان الكيان
ها خواطري صرخة مُدَوية في عالم الكتمان
ميلاد ثابت إسكندر
فنان تشكيلي







1
***شَخبـَّطة***
ماعـرَفش مالـي !!! ولا حتي حالـي عارفُـه أيه !
ولا أيـه جـــرالـي !!! ولا لاقـي تَفسير للـي فيه !
حالة ذهول مُمكن تقول ، حالة ضَياع إحباط وتيه
حالة غريبة ملخبَطة ، كل اللي حاسُه شَخبـَّطة
وحـاجـات كتيررررررررر متخَبـَّطـة وده كلـه ليـه ؟!
ماعرفش مالي !!! ولا حتي حالي عارفُه أيه !!!
مابقتش حتي لنفسي عارف ،،، هَــربان وخــايف
ولا حتي شايف مين بيطاردني ،،، عَقلـي لاغـيـه
طب فين هَـروح ولمين أبوح والقلب مَليان بالجروح
مين حتي راح يفهم كلامي يمد إيدُه أمسك إيديه
ماعرفش مالي !!! ولا حتي حالي عارفُه أيه !!!
حابس دموعي جوه مني مش بإيدي غصب عني
ده أنا حتـي مـش عـارف أيه إللـي راح أبكـي عليه
أحاسيس وضاربة في بعضها ولا حتيَ عارف أصلها
ومين يقولي قصدها ؟؟؟ مَـوَّال وعايش أغنـي بيـه
ماعرفش مالي !!! ولا حتي حالي عارفُه أيه !!!
******
2
*** فارقيني بقَي ***
بَصيتلهــا من فـوق لتحـت أنا بإحتقاااااااااااااار
ولعَنتهــا ولعَنت أيامي إللي قَضيتها في مرار
أيه إللي وصلني لكدَه؟ وليه حياتي متشَتتَه
وليـه بَحس معاكـي كل لحظـة بإنهيـاااااااااار
امشي وفارقيني بقَي ، أنا شوفت وياكي الشقا
والخوف معَشش جوَّه مِني أحزاني بيكي مِتوَّثقة
مَرت دقـايق والدمـوع نَـزَفت سـيـول علـي خدها
وأخدت خطـوّة للرجـوع ، لكن عنيـا فــي وشــهـا
كــرهـت لــون الحُــزن إللــي أدمَنتـُه مـعــاكي
ولا يوم عرفت الضحكـة ما دُقتـش غير آساكي
ردي عليَّ أتكلمي ولا السكوت معناه رضاكي
ما دريتـش أنا بإيـدي وهــــــــــي بتضربهــــا بقــوَّة
وقعت مرايتي إتكَسَّرتَ وصورتي مش مَوجودَه جوَّه
ربطت إيدي من النزيف. وقلبي مَطعون ألف ســيف
لَفيت مشـيت والصــوت بيدوووووووووي جـوَّه مِنـي
******** أنت ليه إنسان ضعيف ؟؟؟ *******
‏*****



3
****بحــــر الذكــريــات ****
ولأني مش عارفلي لون، ماشي كده في أي إتجاه
عايش أنا حـالـــة جنون، عــابر سبيل أنا في الحياة
عَمَّـال أدوَّر فــي الشــوارع والحـــــــــــــارات
علي ضحكة كانت ساكنة قلبي في عُمر فات
علي حضن دافـــــي كنت برتاح فيه لساعات
علي قلب صافـــي كنت بشــكيلـه الآهــــات
علي نفسي اللي تايهــة مِنــي وســابتنــي
ويا اللــــــي رحلـــــوا مـن سُكـــــــــــــــــات
عمَّال أدوَّر جوَّه مِنـي بس الحقيقة إحساسي مات
وبقيت خلاص عابر سبيل غرقان في بحـر الذكريات
*******************






4
****تـجـــربــة مُــرَّة ****
مش عارف أبدأها منين ،، دالقلب بيبكي مش العين
ليه الدنيا بتقسيَ علينا ،،، مـش بإدينا بقينا تايهين
طعم العيشة بجد مَــرار ،،، حــيــرَة وناااااااااااااااااااااار
أسوار مش ممكن تنهار،، هو احنا حقيقي عايشين؟
ليه الصُبح ف كل يوم ،، الساعــة سابعة تَملي نقوم
ودي أجمل لحظات النوم ،، نزحف من تحت البطاطين
معركَة صعبة ومش مَحسومة، برد رصاص مَناخيري مَزكومَة
مِـنـك لله بَــقَـــيَ يا حكومــة ،، فيها أيه ماتخلينا نايمين ؟!!
مش قادر أقاوم الجاذبية ،، ف سريري قوَّة مَغناطيسيَّة
والدَفا تـحـت البطانيـــــة ،،،نعمَة كبيرة أفوتها لمين ؟!!
فيها أيه لو شُغلنا فَتَرات،، ف الصيف والشتا بقيَ أجازات؟
هـو إحـنا عُلمــــاء ذَرَّات !! ماحنا في مَكاتبنا بارشــين !!!
مش مُمكن أقوم وأخرُج بَرَّه،، راح أمَّشي كلامي ولو مَرَّة
هي حقيقي تَجربة مُرَّة ،،، بس هَناملي كمان سـاعتين
******



5
دعوَّه للحـب
حـب بقلبك حـب وعيـش ،،،، بَّيين حُبك ما تخَبيـش
حب تلاقي كنوز الدنيا ،، جَنب سعادتك ما تساويش
حب ولو كرهوك الناس ،، حب ما دام جواك احساس
بُكـرَه إللي بيكرَه هَيحب ،، لما يشوف جـواك إخلاص
حب ومـد إيديك بالخيـر ،،،،، انكـر ذاتك عيـش للغـيـر
خَليك زَي الشمعـة بتصغَـر ،، لكن نورهـا بيهدي كتير
******
‏








6
****** صُــب الشـــاي *******
دنيا غريبـَة وعالـَم أغـرَب ، ولا هَقـدر غيــر أنـي أسـتَـغــرَب
أقعُـد نرغـي أنا وأنتَ شوَّيـَّـة، وبلاش أعذار علشـان تهــرَب
لحظة هَحُط الشاي ع النار. أهو نتسَّلَي أنا وأنت يا صاحبي
أصل أنا فاضــي ليل ونهـار، والفيس بوك عَدَمنـي وطاحبـي
أيوَّه زمان كان عندي طموح، أني راح أعلَي لفـوق وراح أكبَر
وإللي قدرت أوصَّلُـه سطوح، بيت في الحــارة كمـان متـأجَّر
***هههههههههههههههههه ***
أيوَّه يا سيدي أنا بضحَـك، مالك؟! أنا لسه بعقلي وماتجاننتش
اضحك أنت كمان علي حالك، دي بداية القصة أنا ما أتكلمتش!
صُب الشاي بقَــي واسـنـد ضَهـرَك، وناولنــي أكبـَـر كوبايــــَّــة
وانسَـي الدنيــا وروَّق فكــرَّك، شُـرب الشاي ع السطح حكايّة
ارفع راسك بُـص لفـوق، عِـد نجـوم السمــا لو تقـدَر
لمـا أتأمل فيهــا بَفـوق، من أوهامي وبحمد وأشكُـر
بص يا سيدي، أنا حالي أتغّـيَّـر، كنت زمان حال غير الحال
ماكنتـش حاسس أني صُـغَـيَّـر! أحلامـي كانت وهم خيال
أيـوَّه أنا عَنـدي يامـا مواهــب، ربنا شكـلهـا فـي تكـوينــي
وف محـراب الفن أنا راهـب، كَـبَّرت أنا نفسي قُصاد عيني
تفكيري اتمّحوَّر علي ذاتي، إزاي أبقي كبير مشهور
والناس تتمـنَـي تحيـاتـي، ويشاوروا عليَّ !!! مغرور
ومعارض بقـيَ هنا وهناك، والمسـرح يستنـي لؤاك
وجــرايد تكتب وتفَشَّـر، نجـم جـديـد وسـط الأفـلاك
ونسيت أني تراب مش أكـتَـر، وحياتي في حقيقتها بُخار
يظهــر لثـوانــي ويـتـبَـخَّـر ، والوَهــم فــي يـوم راح ينهـار
وأسانســير المَجــد الباطل ، أتعَّطَّـل فـجــأة وأنا فيــه
وطموحي في لحظَة بقَي عاطل، والفكر اتغَيَّر معانيه
تجــربــَة كانت قاسية كتير، لكن درسهــا كان مفهوم
كل إللــي بيحصَل للخيـر، حتي لو كان مش مَهضوم
من يومها سَـلِمـت الدَّفَة، ورَفَعـت شراع للسما فوق
وف حبُه يوماتي بَتدَّفــا ، مهما تعتِم جـــاي شـــروق
ده سلام ربنا غطَّي وكفَّا ، أصلُه الخالق مش مخلوق
************







7
اشتقت ليكي
اشتقت ليكي قبل ما أقابلك أو أعـرفك
وحلمت بيكي ورسمت صـورة بتوصفك
يا أرق م الطفـل الوديــع فــي ضحكتك
وأحن من نسمــــة ربيع فــي طلعتـك
مـلاك ملكتــي كـل قلبــــي بخفتــــك
عصفـــور جميل جـوَّه صـدري عشِــتك
ترتيلـــــة حلــوة كـل ثانيـــــة برتــــلك
اشتقت ليكي قبل ما أقابلك أو أعرفك
******







8
اتكلمي
ياريتك كنتي تفهمي ،، كل كلمه كتبتهالك
ردي عليا اتكلمي ،، ولا حبي مش في بالك
أنتــــي أيه ،، مصنوعة من صخر وجماد
ساكته ليه ،، ماتقولي ليه بس البعاد
لو سكوتك يعنــــي رفضك ،، يبقي أستاهل عذابي
مش هلومك مش هعاتبك ،، مش هوصلك عتابي
أنا إللي كنت بخدع نفسي كنت بتخيل سراب
دي الحقيقة الذنب ذنبي ،، لازم أتحمل عذاب
*****








9
بحبهـــا
ضحكت علي نفسي وقلت خلاص نسيتها
حبـهـا كـان ماضــي وفـات صفحـة وطويتها
ارتاح يا قلبي من الأهات
حبي خلاص بقي ذكريات
لـكـن النـهـارده شـوفتـــها
وقلبي دق فـــــــي وقتها
صدفــــه غريبــة من القدر
اتاري قلبـــي إللي انكسر
لسـه حـقـيـقــي بيـحـبهـا
ياريتنــــي كنت ما شوفتها
بحبهـــــا
****




10
بتوحشيني
بتـوحـشـينـــي كــل يــوم .كـل ســاعــة كـل ثانيــة
نفسي أشوفك نفسي أقولك أنتي عندي بالدنيا ديا
أيـــوَّه عـــارف إنــــي مـــش ســاكـن فـــــي قـلبــك
أيــوَّه عــارف إنــــي مـاليــش نـصـيـب فــــــي حبــك
بــس عــايــزك تعــرفــــي إنـك أنتــي حبـــي الأصيل
مهـمـا عنــي بتهربـــي مــش راح أنســي مستـحيل
أنتــي روحــي أنتــي عمـري أنتـي نبض القلب أنتـي
أنتـــي تعذيبـــي وفرحـــي أنتـــي للأخـــر حـبيـبـتـي
*****







11
***** طــُــــــــــــــــــز*****
أيـوَّه طُـظ في كل حاجــــة ،،،، طُـظ فــيَّ وفيك يا أفندم
لو حتي فاكرها سَذَاجــــة ،،،، طُـظ تاني ومش راح أندم
طُـظ في شهـادتك وعلمك ،،،، حتــي لو كنت أنت مـيـن
طُـظ في فلـوسك وعَمَـلَك ،،، طُـظ في مشــوار السـنين
طظ في حَسبَك أو في نَسبَك . طظ في كل المَشهورين
لــو لسـَّـه مكَمِــل معايـــا ،،،، برضـو هَـقـولك طُـظ فـيـك
أيـه إللـي غَصبَـك ع الإرايه ؟؟؟؟ طُــظ تانـــي مِـنـي ليك
أيــوَّه سـامعَك . ليـه بتضحَـك ؟! مش متَّـقِـل في العيـار!
أنا حتي شارب شاي خفيف ،،،، كلامي جَد ومش هزار
ودَمي عُمـرُه ما كان خَفيف ،،،، أنا أصلي نِكَدي ليل نهار
بس حقيقي قصدي أقـولك ،،،، دنيا مالهــاش أي مَعنـي
مَهمــا يا صاحبــي نهاودهـــا ،،،، برضــو بتـزَّود وَجَــعــنا
غـَـريبَة هــي وإحنا أغــرَب ،،،،، وأدينـا بنـشَّـرَّق نـغَّـــرَّب
ولا حَد عارف أيه أخرهــا !!!! غير لما شمس العُمر تغرُب
وإللي لسَه تايـه بيسأل ،،،، هـي شطــَـارَة ولا حَظ ؟؟؟
خُدها مِني يا صاحبـي وإعقَـل ،،،، الإجابـــــة هي طُـظ
*** طــــُــــــــــــــــــظ***




12
مابقيتش عارف أي شيء
ما بقيتش عارف أي شيء....عايش غريب محتار غريق
مليون سؤال من غير جواب ... والحل فين فين الطريق
فين الحقيقة من السراب دالعقل غاب من حيرته شاب
والفكر خطي عدا السحاب ... لكن ماجاب قشه لغريق
ما بقيتش عارف ي شيء
أحداث بتحصل كل يوم .......... بتثير جدَل وتزيد هموم
وتجيب سؤال يحتارله بال ... وف قلبي نار قايده حريق
ما بقيتش عارف أي شيء
*****








13
وساويس
أيوَّه ومن غير لف كتيرررر،،، أنا حالي ملخبط وخطيرررر
سر هقولُه بيني وبينك ،،، وأوعَي في يوم يطلع م البيرررر
أو ترغي مع الناس وتعُوك،، أنا واثق فيك بس بَشُك
شوشو يوزَك ولا يهزَك ،،، تنشُره بعدها ع الفيس بوك
ماشي يا صاحبي ؟.......... طيب عال
ولَّع في الاول ع الشاي ،،، بس اغسل فنجاني بضمير
ماتقوليش بضمير إزاي،،،واتعلم اسس التطهير
وانجز علشان تسمع مني ،، مش هرغي مع نفسي وأغني
خِلص الشاي ؟........... طيب عال
اسمع بقي مع أول بؤ : نَفسي تاهت مني يا صاحبي
من يومها عقلي بقي يلؤ،، وزمانـي غَــدَر بـيَّ وطاحبي
والأحزان عمالة تشؤ ،، في كيان حتي ما قادر يحبي

أيوَّه أنا متكَتف تكتيف ،،،واليأس بينخُر في عظامي
وحياتي كابوس رعب مُخيف،،، ولا هقدَّر أوصفُه بكلامي
ودموعي من القلب نزيف،،، وسواد بيلون أيامي

حالة غريبة مُريبَة عجيبة،، بدأت بشوية وساويس
يوم ورا يوم بقي حملي زكيبة،، مَحني من مُر الأحاسيس
والعيشة بقت دوشَة زريبَة ،، وشعاري في الدنيا تَعيس

أوهام صراعات أفكار مُحبطة !!! وطقوس وعادات نفسي مقيَّدة
لخبطة شخبطة حاجة متخبَطة!!! ومنين ولفين أهرب من كدة
فاهمني يا صاحبي؟....... لأ مش فاهم

طب راح أقول من تاني بهدوء،، دي الفَضفَضة وياك مورفين
ركز بقي ويايا وفوق،،، داحنا يدوب للشاي شاربين
دأنت يا فقري ليسانس حقوق،، مال مُخك كده زفت وطين؟!
فوقت يا صاحبي؟! ... طيب عال

عارف لما تحس بطوق ،، ملفوف في رَقبتك لسنين
عتمة ف ليل ومالهش شروق،،غرقان وسط دموع وأنين
بنزل للقاع وأطلع فوق،، ولا لاقي قشَّة حتي تعين

نفسي عليلة يا صاحبي خلاص،،، اليأس سجنها بمتاريس
والخوف كلبشني بوسواس،،، وشبكني للخيبَة عريس
مات فيا بجد الإحساس،،، مدفون في تابوت الوساويس
******

14
***غووووووووووور ***
عَمَّـــال تبَرطَـــــع، ولا حتــي قادر ليك ألِـم!
وبقيت مصَّدَع، أيه الحكايَة، في أيه يا عَم؟!
علي فين موَّدينـي معـاك؟ بَــر الأمــــــان ولا لهلاك؟!
يوم تشَّرَّق ويوم تغَّرَّب، دأنا عَبد ماشي حَسَب هواك
والمشكلــة أنك غَشيم، وكل ساعـة بألف حالة
أنا عارف أنك مش لئيم، بس حياتي معاك زبالة
لو ينفع إني أصنفَـرَك، أو أزييتَـك، أيه حِـجـتَك؟!
طب حتي قولي هُويتَك! من أي خامة صَنعِتَك!
ياشيخ ما تنطَّق! أنت ماشي بأي مَنطق؟!
طب أعمل أيه يا عقلي يا أنشَـف من الصخور؟
وقَّف شويَّة، اهدا عليَّ، أو لم أفكــارك وغوووور
********* غووووووووووور *********
***********



15
عايزني أتجوز قال !!!
عايزني أتجوز قال !! طب قـول بأمــــــــــارة أيه ؟
دأنا عقلي في راسي يا خال. ومثبت ايدي عليه
عايزنــي أتجــوز قــال !!!! ازاي بـس يا سـيد الكُـل ؟
الدنيا خلاص بقيَ حالها يسـُـر ! وبلدنا بقت فُل الفُل؟

تضمنلــي بيت علـي قدي نضيف انه يكون عـش الزوجيــه ؟؟
وأن جـُـعت القــَي حتــي رغـيف نقســمُـه بينــا أنا وهــَي ؟؟

تضمـَنلـي إنهـا مـش راح تدبـَهـدل لو ركـبت مَـره الاتـوبيس؟؟
أو حتي في الشارع مشييت من زيد وعبيد وكمان عتريس؟؟

تضمنلي أن ابني يكمـِل عُمره معايا من غير تهديد ؟؟؟
يوم العيد ما أقدرش أتحمِل انه يكون ذكري ابني شهيد

وازاي تفكيري ما يشتِـش علي بنتي لو خرجت بره ؟
خطف يوماتي ياناس ده ماحدش متهَني فيها بالمَره ؟

والمشكله ببساطه يا خال . الحال مبقاش زي الحال
والخوف عشش جوه القلب . ايه تاني ممكن يتقال ؟
الله يخليك سيبني في حالي اياك تاني تقولي جواز
ده الضغط والسـُكر جاني ! ناقص احرق نفسي بجاز
سامعني يا خال ؟؟؟
16
*** كوبايـــة شـــاي ****
كُلــُه هَـيـبـقــيَ زَي الفـُل . اخلــع بـس أنت مـن الـهَـــم
اقعُـد نشرب شاي مع بعض . سيبك بقيَ من حرق الدم
أدي الشـــاي وكمــان السُـكَـــر . حُـط البراد بقـيَ ع النار
ما تقلبـش كـتـيــر وتـفَـكَــر . انســيَ الدنيــــا والأفكــــــار
انسـيَ امبـارح وكمان بُـكـرَه . عيـش الحـاضر وافــرَح بـيـه
أنا خايف م الأحزان تكرَه، عيشتك ده اللي أنا عايز أحكيه
ارفـع راسـك للسمـا فوق . وأتـمَـتـَع بجـمـــال الكــــــــون
شوف كام نجمَه رايحه وجايـَّه . والقَمر اللي جَمَاله جنون
دايمــاً بَسهَــر هنـا للفَجــر . قــدام بيتنــا فـــي الأريـــاف
أديها شاي وأرتاح م الفكـر ولا عُمري من شيء راح أخاف
ارمي حمــولك ع اللـي خالقهــا، كلُـه زايـل مايســاويش
صُب الشاي بقيَ وروقها، دي اللحظة بتمشي مابتجيش
لـو عـايـز تدخـُل ع الـنـت . عنـدي جـوَّه كمــان لاب تـوب
بـس كلامـُـه لَـت في لَـت . ناس حَبـيـبـَّـة أسـاتـذة حُـب
لأ واللي بيخنق بقيَ أمـي . واحد قال ايه أسمـه فتيلة
كل قصـايـدُه بتحــرق دَمــي . حُـزن وغَــم كـأبـــة ونيلـــة
من يومهـا بطَّلت أسمع له . وكـرهـت كمـان الفيس بوك
صدقنـي كمــان وبنَـفَـضلُه . فَـكَـرني أبقيَ أعملُــه بلـوك
أيوه اضحك بقيَ كده من قلبك . صُب كمان كوباية شاي
دي السَهــرَة هَـتـحلَّـو بـقُـربَـك . قول للهَم وداع باي باي
17
مابدهــــــــــــاش
راجعت حساباتـــــــــــــــــي لقيت
عُمـري ضـــــــــاع منــــــي بلاش
لا مال كنزتــــه ولا حتــــــــي بيت
كنت ضـــارب الدنيا طنــــــــــــاش
أصلــــي فقـــري من يــوم ماجيت
الحــظ ولـــيَ وماستنــــــــــــــاش
طب أعمـل أيــــــه ؟ كلمــة ياريت
عُمـــري ما أقولهـــا مابحبهــــاش
أيه يعنـــي هـاخــــده لــو اغتنيت
دا مافيش جيوب في كفن قماش
أنا حاســـس إنــــي كتيـــر رَغيـت
سلام بقـــــــي مابدهــــــــــــاش
...... مابدهـــــــــــــــــــاش .......




18
*** يا حبيبي ***
أزاي أزاي أزاي أوصفلَك يا حبيبي أزاي
كل ما بَزهَق بَشــرَب شــاي يا حبيبي
أنا كُنت أمبــارح زَهقااااااااااااااااان
جبت أنا باكو شاي م الدكاااااان
والسكر ع النوته كمان يا حبيبي
مش لاقــي بطاقـــــة التمـــــوين
تايهــــة منــــي بقــالهـــا يوميـن
ومُرتبي طار له جناحين يا حبيبي
مش عـــارف هَخطُبــك أزاي
دأنا فقري من يومي يا أماي
فُضيهــا سيرَة وداع باي باي
راح أوَلَّــع تانــي ع الشـــاي
****** يا حبيبي ******



19
*** يوميات موظف***
كل يوم أقوم م النوم الساعة سـابعَة
قايم مَفزوع طول الأسبوع إلا الجُمعَة
ألبِـس قَميصـي وبنطلـونـي
والنوم ماراحش من عيوني
أنزل علي طول، أجري مَسطول، من غير فطار
زَحمَــة وظـيـطَـة، وخَلطَبيطـة، والجـو نااااااااااار
أصل النهاردَة من غير مؤاخذَة، سـوق الخُضــار
توكتوك يمين، توكتوك شمـال، ومافيش نظــام
سامع صريخ، بَـيَّـاع فسيخ، وأنا نفسي أناااام
وعَم بُرَعي حَدَف الزبالة، لِبست في وشي وحالتي حالة
لسه بقولُه فَـتَّـح يا ذوق... مِسـك الساطور وقالـي فـوق
طبعاً مِـشيت وفُـقـت فعـلاً ... ده يقـدَّر يعَـلقـنـي كعِجـلاً
ده العُمـر يا با مـش بَعـزَأه ... في عنيــه شَــرار ومبــارأه
ووصلت للمَـوقَف ووقـفت. ولا فيه مواصلَــة ولا أي زفـت
والوقت مِني عَمَّال بيجري..و لازم أمضي حضوري بَدري
ومن بعيـد ظَهرت عَـرَبـيَّــة، صنـدوق حَـديـد ومـصَّـديَّــــة
وعشان تلحَـق فيهــا مكـان.. لازم تكون بُرَعــي وطرَزان
ودخلت وأنا مخنوق مُنهــار.. جَرحنـي واحــد بالمُنشــار
ماعليش أصله نجار مسَلَّح...طفل ومن طفولتُه مشَّـلَّح
ووصلت أنا للشُغـل مأخـر، وموظَـف الدَفتَر بيشَّخَر
اصحَي يا عَم الله يخليك،،، عايز أمضي أبوس إديك
قالي خلاص الوقت راح،، فُكَك مِني وسيبني أرتاح
وراح مكمِـل نومُه البيه... رُحـت مطَّـلَّـع غِلـي عَليه
كل يوم تَقفيل تَقفيل، قـوم يا فشِلَّـه يا كرش الفيل
كلمَـة مِني وكلمَـة منُـه،، والناس زَي النَمـل أتلَمـو
إللي بيهَـدي وإللي بيحّـوَّر،، وإللي بمـوبايلُـه بيصَوَّر
والأخت الغالية عطيات ،، نازله صريخ وصوات وعياط
والمُـدير الباشـــا العـام.. ساب مكـانـُه وجـالنـا أوام
وكل شيء فوق راسي اتهَد، أكيد هيرفدوني بجَد
فجـأة ورَن بصوتُـه المُزعِـج ،، أصلُه منَبَـه دايمـاً مُــرعِــب
وفضلت أضحَـك بأعلي صوت، طبعاً ما أنا فرحان مبسوط
قررت أني أكمــل نومــي... يـوم غيــاب ولا يرفــدونــــي
خخخخخخخخخخخ






20
حَـبــة احســـاس
قالوا زمان الإحساس نعمة،، يعني تراعي مشاعر غيرك
وإحنا بجــد بقينا نسـتَغـبا ،،، سر هقولــه بينــي وبينك
صفحة فيس بوكك يا خفيف ،، مش نشـــرة أخبار العيلة
خليك كده واد ذوق ولطيف، وافهم معني كلامي يا نيلَة
مش أي مُناسبــة تنزلهـا ،،، وتوثقهــا بملـيـون صـورة
في حاجات مش لازم تنشُرها،، خصوصياتك يا شَطورة
لو خَطََبولَك،، أحلي مُفاجأة ،،، مـش لازم صوَّر الأمـورة
والهَبَل إللي بيظهَر فجأة ،،، ماتخلي حكايتك مَستورَة
في شباب ياما كتير مش لاقية،، تَمَن الدبلَّة عشان مَعذورَة
وبنات فاتها القطر وعديَ ،،، راعــي الأحاسيس المكسـورة
وأنت بتتمَرقَــع ع الأخــر وقارفنا يومـــاتــي بجولييت
صدقني يا روميو ده مكياج،، امسَحُه يظهرلك عَفريت
منُه لله مــارك أفنـــدي ،،،، ابـتــكــر الفـيـس للحبيبة
حكمة وعرفتها من غاندي ،، ( صور النت دي أكبر عيبَة (
والستات العاقلــة الراســـيه،،،، ليـهـم برضو معـايا عتـاب
جريَ أيه يا وليه أنتي وهيَ،، فاكرين نفسكو لسه شباب؟!
لمي يا حاجة صوَر الماضي واقفلي ياختي يا حلوه الشات
لو كان عايـش عبد الهادي،، كـان وراكـــــــي يا عطــيــات
وأنتي يا أبلَه يا ست الكل ،، ماكفاية بقي مهرجانات
أما صحـيـح أحـوالكـو تعل ،،، كل مناسبة بفديوهات ؟!
عارفين إن الواد إتطــاهر ،،، ودبحتـم عجــل بآلافات
واتفسَّحتو ف شرم اظاهر ،، الفيديو من اسبوع فات
واتفرجنا كمان ع الفيلا،،، ياختي عليها فيها حمام!!
يوقف حالكم قولو انشاله في ناس من جوعها بتنام
حسوا بغيركم بقي يا اخوانا، ده كلام مش مكتوب وخلاص
ولا كمان ماتت مشــاعرنا ؟! وما فيش ولا حبة احساس؟!
*********













21
شحـــــــــــــــــــــــات

أنــا نــوع جــديد م الشحاتين أصلــي ما بشحتش الفلوس
ولا أقــول وأعـيد: يامحسنين حنو علــــي غلبان مَنحوس
ولا تلاقينـــي فــي الشوارع ولا حتي بَسرَح في الحارات
ولا ف المســاكـن نازل طالـع ولا ع الرصيف أنام وأبات
أنا جوا بيتــي سلطـان زمانـــي طول النـهـار ع الانـتـرنت
أتسلـــيَ بلـب وفــول ســودانـي شغـال بـعـاكس كـل بـنـت
أكــتــب الأشــعــار وأنـــزل صـــور جـمــيـلـه بـالــمـيـات
وأستني أشــوف الكومـنتـات عمَّـال أشَّـحَت فـــي اللايكـات
وأفـــرح لـمــا التــعـلـيـقـات تبقـــي أكـتـر مــــن الـبنـــات
وأفضل ليل ونهـار أعـوك مش قادر أسيب الـفــيس بــوك
مش كــده أبقــَي صحيح شحــات؟ بس بشحت أيه، لايكات

********




22
زي الفُــــــــــــــــــــــــل
كل حاجة فيكي يابَلدي زي الفُل،
النيل بيجري والخير كتير فايض ع الكل
العيش مرَطرط فـــــــي المخــــابز،
رغيف كبير أبيض جَميل مالهـوش حَـل
واللحــــمـــة أرخص من المدَمس .
مد ايـدك بلاش تغمس إلهــَـــــــط وكـُـل
والمدارس جميلــــــــــه خالـص،
الفصل فاضـــي رايق وهادي هـدوء يشل
والموصلات حاجـة روعَـــــة
لاتلاقي زحمه ولاحتي زوعـَّـه ولاشـيء يعـل
والمساكن مش لاقيـــة ساكن
شقه واسعة إيجار رخيص تعالــي طُل
والوظايف منغيـــــــــــر عـَدد
أنابس خايف من الحســــد أحسن تقـل
ومُـرَتبــــــات بالألافـــــــــــات،،،
لوهَفضل أحكي معاك هَبات ومـش همل
والصحة أيه تمـام يابيــــــــه
لافيــه وبائـــي ولا تلاقــــــي أمـراض تـذل
والختام أجدَع ســــــــــــــلام
لكل مصــــــــري قـادر يعيش لسه ماضل
زي الـفـــُـــــــــــــــــــــل
23
أيه يا نفسي؟!
عايز أبكـي كتير،،، بس مش لاقي الدموع
جوَّه يأسي أسير،، والحزن ما بين الضلوع
أيــه يا نفســــــــي أيـــه جـــــــــــرالك؟!
ليـــه عــَــــــــذابك ليــــه مـــَــــــــرارِك؟!
ليـــه حَكمتـــــي أعيش فـــي صمتي؟!
ليـــه مـاغـيـَّرتيــش قــرارك؟!!!
أيــوَه هـصــــــرخ بــس مين
يســـــمع الصــوت الحـــزين
غيـرك أنت يارب ســـــــامع
نبــض قلبـــــــــــــي بالأنين
إشتياقــــــــــــــــــي ليك كبير
انقذ العبــــــــــــــــــــد الأسير
فك كل قيــــــــــــــــودي ربي
وف سماك خلينـــــــــــي اطير
***********



24
أيوَه عرفت
أيـوَه عــرفـت ماحــدش يقـــَدر . غيــرك أنت يـارب يـغَّــيَّــر
بعد ما عشت حياتي المُرة . بعد ما عشت سنين متحَّيَّر

يامـــا حـاولت كتيـــر بإديــا . إنــي أغيــَّر كل ما بــيَّ
كل طباعي خوفي صراعي كل الضعف الساكن فيَّ

بس عــرفـت ماحــدش يقـــدر . غيــرك أنت يـارب يـغَّــيَّــر
بعد ما عشت حياتي المُرة . بعد ما عشت سنين متحَّير

كنت بفَـكَـر إنـي راح أقـدَر . أهدم كل حصون جوايا
إللي بناها العالم وأكسر . كل قيودي وأرميها ورايا

بس عــرفـت ماحــدش يقـــدر . غيــرك أنت يـارب يـغَّــيَّــر
بعد ما عشت حياتي المُرة . بعد ما عشت سنين متحَّير

كل كياني ده ملك ايديك . اخلق فـيَّ حياة ترضيك
بدل ضعفـي بقوة روحك . خليني غُصن وثبته فيك
أصل عــرفـت ماحــدش يقـــدر . غيــرك أنت يـارب يـغَّــيَّــر
بعد ما عشت حياتي المُرة . بعد ما عشت سنين متحَّير
***********
25
أيوه تقدَر
بَصـرُخ إليـك والقَلـب مَطعون ألف سيف
والفكــر تايــــــه وســط أمـــواج كل زيف
طَعم المَرارَة في حَلقي ودموعي نَزيف
يمكن بجَهلي انا سيبت ايدَك واكتَفيت
بالـعـقـل وَحـــدُه وبالـعــلــم احـتَـمـيـت
ناكر وجودَك حُبك وجودَك بغيـرَك رضيت
أفكــار لداروين كانت الطــوق للنَجــاة
والإرتقـــاء كـان الخــلاص لعـقـل تـاه
مابَقتش محتاجلَك يارب مافيـش إله
لكن الحقيقــــة ان التَطَـور مـش اكـيـد!
مين اللي جاب أول خليــَّـة بالتَحـديد ؟
ورجعت للحيرَّة ويأسي مافيش جديــد
الكبريــــــاء خـلانـــــي أرفـُـض أي إيــد
مَمدودَه تهديني لطريقي أصلي عَنيد
جرَّحت ياما في ربـَي بغَبائي الشديد
لـكن أنت تـقــدَر تحتـوينــي يارب فـيـك
خُدني في حضنك ضُمني انا بين ايديك
مـحـتــاج حَنـانك رُدنـي انا كُـلــي ليــك
***************



26
راح أصلي
راح أصلـــي مهمــا حصلـــي لو جوَّه أتون النار
لو حرقوا حتي كنيستي أو عملوا عليها حصار
راح أدخـل وعلــي رمـادهـا أسجد لإلهـي البار
ولا شــئ أبـداً يمنعنـي راح أصلــي ليـل ونهار
ده إيمانــي جـوه فـي قلبـي ولا يوم أبداً ينهار
وهـرنـم أحلــي نشـيـد وراح أعـــزف ع الأوتــار
فـرحــــان بالــرب أكيــد وبقــولـهـــــا بإفـتـخــار
أنا قبطــي يعنـي مصري وإن دمي سال أنهار
راح يروي الأرض وتـنـبت بالحـب أجمـل أزهـار
راح أصلي ليل ونهار
******************







27
ببكــــي حالــــي
بالدمـوع أنا ببكـي حالــي، والدموع ما تـُجيب سؤالي !
بـس أيـه يطفــي لهيب النـــار ويضمنلـــي آمـالـــــي ؟
نفســي أعـيش فرحـــــــــــــــان ولو حتــي لثوانــي .
وإن بكيـت ....... ألاقــــــــي إيــــد تضُمـنـــــــــــــــي .
نفســي أرجـَع أعـيش طفــولتـي يا نفســي تانـــي .
نفســـي أحــس بضحكــــة صادقـــــــــة تـهــزنــــي .
بـس فين وسـط الشجــون ...ألاقـــي بسمة للعيون ؟
هي نفسي للحزن عايشه ولا حزني ده من الظنون ؟
*******








28
علي بابك ياكنيسة
علـي بابك يا كنيسـة صـــاروا أولادك شهــداء
صرخـــة فـي قلبك حبيســة علـي دم الأبرياء
كانــوا خــارجين فرحــانين بعد الصلاه بالدموع
والشــر عامــل كامــــيـن لولادك يا يســــــوع
زي ما دقوا المسامير في أديك يا يسوع زمان
برضــو أصــــــاب التفجيـــر كل ولادك كمـــــان
ســـال الــدم البــرئ غطــــي كل الجــدار
والأجســاد عـ الطريـــق وقلوبنـا قـايـده نار
طفلة بتصرخ يا أمي سيبتيني لوحدي ليه
أخدوكي بغدر منـي والجرح أيه هيداويـه ؟
فاكرين هيخوفونا مساكين دول مخدوعين
دالرب يسوع حامينـا علي كفـه منقوشين
وإن متنا برضو معـــاه ولا شيء يفصلنا عنه
هـو طــريق الحيــاة وحياتنا بكلمـــه منـــه
*******




29
***** ضَلمـة جُحور ******
باسـمـك دَبـَحـنـا وقـتـلـنـا وصحـنـا
وعَــرض الغلابـــة كمـان اسـتَبَحنـا
باسمـك حَــرقنـا ،، بيـوت العبــادة
سـرَقنا ونهبنا ،، وأصبـَح دَه عــادة
باسـمـك تاجـرنا ،، وكبـرنا وصـرنـا
أفاضـل وفاضل ،، كتيـر راح يجيلنـا
باسمـك نطـقـنا ،،، بأبشـع كـلام
طمسنا الحقـايق صنعنـا الخصـام
باسمك سكتنا علي الظُلم يامـــا
رضينـا بظلـم البـَرئ واليتـامــــــيَ
باسـمـك رفـعنـا ،،، للحقـد رايـــَّـة
زرعنا التعصُب ،، حَصـدنا الضحـايـا
واسمـك مـحـبـــة ورحـمَــــة ونــور
وعايشين لسَّـه في ضَلمـة جُحور
ونـورَك هَـيفضـل بعيــد عن عـنينـا
طـول ما بنبنـي من الكُـره ســــور
*************


30

إلي كل مثقف شريف
انسف وحَطم أي سور،، صـارع برأيَـك للظهور
لو حتي ليل الجهل طال،، فَجَّر بفكرَك لينا نور
إياك تسير ويا القطيع،، أو يوم تخاف إنك تضيع
عقلك تَمَلي بوصلِتك،، وتَمَلــي حصنك المَنيع
زلــزل بـعـِلـمـَـك القـبــور،،، امسـك إيديـنـا بينــا ثـور
احيــي النفـوس الميتــه،، افتــح عنينا نطيــر نسـور
فـي الجهل عيشنا كتيـر دهـــور،، آن الآوان عنا يغور
ورغم أنف الحــاقدين،،، الخــوف قَلَعـنــاه م الصــدور
الجهـل خـلانا حـطــام،،،، بـغـبـغـان حــافــظ كـــلام
زهقنا نكون زَي النعَام،،، أو حتي خرفان في الطابور
انسف وحَطم أي سور،، صـارع برأيَـك للظهور
لو حتي ليل الجهل طال،، فَجَّر بفكرَك لينا نور
*************




31
********* لا حياة لمَن تُنادي *********
بلادي بلادي بلادي ،،، أين أنتِ من اضطهادي ؟!
مـصـر يا أم البــلاد ،،، هَـجَّــرونــــي والـــولاد !!
وصُراخي في ازدياد ،،، ولا حـيـاة لمَـن تُنادي !!
بلادي بلادي بلادي ،،، أين أنتِ من اضطهادي؟!
مصر أنتِ أغليَ دُرَة ،،، بس عيشتـي فيكِ مُـرَّة
يابلادي حسي مَرَّة ،،، ولا ظُلمك ليَّ عادي؟!!!
بلادي بلادي بلادي ،،، أين أنتِ من اضطهادي؟!
نفسي أصَدَّق أنك أمي،،جوَّه حضنِك ليَّ ضُمي
ليه بإيدك سافكـة دمي،،،كُنت أنا بالحـب بادي
بلادي بلادي بلادي ،،، أين أنتِ من اضطهادي؟!
عايز أقولك مش هَسيبك،،،أنتِ أمي بكل عيبك
واللي هَيصيبني يصيبك، بيكِ برضو لسه راضي
******************





32
يعني أيه ؟؟؟
يعنـي أيـه أنــي أعيــش مـن غيــر حقــوق ؟
يعني أيه عشان مسيحي أتخنق بألف طوق ؟

هو مش من حقي أعيش دأنا زييكُم إنسان بَشَر؟
ليــه حياتــي ماتساويـش ليـه قلبُكم مَليان بِشَّر؟

يعني أيـه أعيـادنا تتحول دمـوع ؟
يعني أيه نطفي بأدينا الشموع ؟

يعني أيه إبنـي الوحيد يمـوت شهيد قُدام عنيا ؟
يعني أيه بنتي حبيبتي تتخطف ومافيش قضية ؟

يعني أيه أشوف كنيستي بيحرقوها ومافيش عقوبة ؟
يعني أيه تهجيــر يوماتـي فين يا ناس بـس الحكومة ؟

يعنـــي أيـه لـو حَـبيت أصــرُخ يكتمـوا جـوايـا صوتــي ؟
يعني أيه يدهسوني ويباركوا للي أتسبب في موتي ؟

هو مش من حقي أعيش دأنا زييكُم إنسان بَشَر؟
ليــه حياتــي ماتساويـش ليـه قلبُكم مَليان بِشَّر؟
*****


33

مش أشعاااااااااااااااااااااار
لو بتحب حقيقي صحيح هَديت ليه كنيستي ف أطفيح
ودَبحت عيالي بتصريح دووووول كُفــااااااااااااااااااار
علشــان عقلك فـكـرُه رَدئ ،، تـقتـل تسـفُـك دَم بَــرئ
تنـهَـب تســرق وتقـول فــئ ،، يـادي العااااااااااااااااار
لو فــي ذرة حُـب فــي قلبك ،، كنت عـرفت إنــي بحبـك
ده إللي خلقني يا صاحبي وخَلقك واحد باااااااااااااااااااار
تعاليمُــه مَحَبــة أبديــة ،، مش غَــدر وسَلب الحُــريـــة
مش قَـهــر بأسم الشرعيـة وحَــرق ونااااااااااااااااااااااار
جَرَب ترمي السيف من إيدك طَهَر قلبك صَحي ضَميرَك
إزرع بذرة حُب لغيرك تكبر تطرح خير وعَمااااااااااااااااااااار
بالسيف برضو أنا ممكن أحاربك وأخطف وأقتل وأحرق قلبك
والعين بالعين زي ما عندك والبادي هو الغداااااااااااااااااااار
بس إلهي قاــلي أحبك ،، وأصَلـــي يا صاحبـــي من أجلك
علشان كده من قلبي مسامحَك مش أشعاااااااااااااااااااااار
مش أشعاااااااااااااااااااااار




34
مين اللي قالك ؟؟
مين اللي قالك ان الجهاد قتل البَشَر
ده الـدم غـالـي ولو كـان لعــابـد حَجَر
مين اللـي خَدَعـَك مين اللـي غَشَك
ميـن اللـي طَفـَّـيَ النـور فــي وشـك
لو كـان إيمــانك ع الــدم مَبنـي
راجع حقيقتُه من تاني يا ابني
لـو كـان سـلاحــك هـو غـــايتك
صدقنـي بيه هتكـون نـهــــايتك
الله محبــــــــــــة لـكـل البشـــر
لو حتـــي كـــان عـــــابد حَـجَـر
************





35
مش خَجلان
انا مش خاااااااااايف ولا خَجلان
أيوَّه بعانــــي من الإدماااااااااان
دي حقيقة ومش مُمكن أداري
كل الدُنيـا اكتَشَفـت عـــــــاري
من كاااااام سنه وانا علي دالحال
عُمري أهو ضاع وعَذابي طــاااااال
ودموعي ف صوتي بتمَنيَ موتي
وبَـغَنـي هَمـي ف مواااااااااااااااااال
ايـوه انا مـش مُـدمن هروين
ولا بانـجــو ولا زفـت الطـيــن
أنا إدمانــي من نــوع تـانـي
ادعولي بالرحمَة قولوا امين
ايــوهَّ انا عــــارف انـك بتـشُـــك
في كلامي يا صاحبي وهَتفُـك
اصبُر لَحظــة هقــولك سرررري
أنا مُدمن زَيـَّـك فيس بوووووووك
***********

36
*** أيـــوَّه نفســــي ***
نفسي أقفل بقَي اللاب توب ، وأعمل لكَسلَي بجد أستـوب
نفسي أدي للسرير شَلـوت، نفسي أخرُج بَـرَّه أُوضتي وأفوت
دالعُمـر عَـدَّي مِنـي وفــــات، و مَحبـوس لسَّـه جــوَّه الشــات
والعقل اتـبَرمَجت خلاياه ، فـي النت غـــرقان مني وتاه
وصوابعـي زَي الإكسبريس. ع الياهو والجوجل والفيـس
واليوتيوب ده لوحَدُه حكاية ، بكَمِل بيه باقي السَّهرايـَّـة
ولا حتي قادر أقوم للشغل ، وبقيت تخين أوي زَي البَـغـل
والضغـط عالَـي من الأخبــار ، قـتـل، نكــاح، وحـــرب، ونـار
والناس مش طايقَة بعض خلاص، ومات الحب والإحساس
ده غير المَنشـورات التييييت، أسلوب مُستَفـز غَتيت
سوسو مزَعَلَّة الجمهور، ظهرت بشورت مش مَستور
خُـش شوف بنت فلان ، شكلهـا بجـد تُحـفَــة جنــان
إلحقـوا النجمَّة ياختي عليها ، ده نيو لوك ولايق فيهـا
يا ولاد التيييت كفايــة خَــراب ، مالنا بزفت طين وهبــاب؟!
إحترموا شويَّة عقل الناس، ولا العقول هي إللي خلاص؟!
ده غير صــراع الفضائيات ، والفكـر الحُـر و التَفاهات
واخدين بالكـو أقصد أيه؟ تمام بالظبط خُدوا لايكـات
كفاية بقي أحسن صَدَّعت، ونفسي أشرب شاي مظبوط
هَسيبكوا ساعة ولو مارجعت، يبقي أديت نتي بالشلـوت
37
آه ياني
حاجـــة عَجيبــَة غَريبـَـة مُريبــَـة ،،، مليـون مـَره ومـش بتعلم
اسلوبــــي عَفـَويـــَّـــة وطيبـَـــة ،،، واللي ف قلبي بيه بتكلم
مش عـارف دي يمكن خيبـَـه مانا طول عُمري ساكت ومبَلـِم

وأما اتـعلمـت إنــي أبـوح ،،، وأخـُد وأدي فــي أي حـوار
حَسيت إني كتاب مَفتوح ،، وما ينفَعـش أشيل أسـرار
يخرب بيتي بقيت مَفضوح ، ده كلام جَد مافيهش هزار

سوكتوم بوكتوم يا ابن الهابلَـة ،،، لاموأخـذَة أنا قصدي لساني
أصلُه خلاص ودَّاني في داهيـَه ، أنا مش عارف أيه إللي جرالي
أنا محتاج لشوَّيــة حكمــَـة ،، يا أرجع أعيش من تاني وحداني

حاجــة عَجيبـة غَـريبــة مُـريبـة ،، أنا طول عُمري خايب آه ياني
*********



38
ألف آه !!!
عافـر وكَسَّـر وإكـدب وفَسَّـر ،،، بـس المُهـم تبـان
اخلق حَكـاوي اجـرَح وداوي ،،، لازم تكـون طـرَزان
كَبَر في كرشك كَتَر في قرشك اوعيَ تبات غلبان
أيه الحيــاة غير مال وجاه !!! من غير كده هتنهان

إلبس قنـاع ارفَـع شـراع ،،، مـركبـك هتسيـر
بوس الأيادي طبطب ودادي ، هدفك أهم كتير
زييف حقايق اضرب وضايق ، ومش مُهـم الغير
انسيَ الفضيلة بلا هَم نيلة مافيش وراها خير

آخــر الحكايــة أيــه النهايـــة ؟ عـــارف مصيـرك فـين ؟؟؟
مـوت الضميــر خـلاك أسيـر ،،،، تايـــه مـن التـايـهـيـن !!
كل إللــي فـــات وهـم وآفــات ،،،، باطـل تَعـب السـنيـن
ومافيش جيوب في كَفن هيدوب جسدك معاه يامسكين
وألـف آه علـي الحيــاة ،،،، مـيـن إللـي يفهم مين ؟؟؟!!!

**************
39
******* أدي اللوحـــــــة *******
قالولي بالإحســــاس صَـوَّر لينا يا فنان
صـورة جميلــة فيها تعَـبَّـر عن الإنسان
أدي اللوحة وادي الفرشـة وادي الألوان
مسكت اللوحَـــة وحَطيتها علـي الحامل
رَكـنـت هـمـومـي غـطـيـــتها وبتحــامل
حبست في نفسي شكوتها وراح أجامل
راح أرسم إللي يفرحهم ،،، كفـايــــــة قســــوة الواقع
بلاش إحساسي يجَرَحهم ،،، ولو ع الصـــدق هَـتـراجع
هَمد شراعي علي ريحهم ، شوية يا نفسي لكن راجع
خطوط بالـطــول وتحـتـيـها رسـمت الأرض
إيدين مَمــدودة بالأسـود خـطـوط بالعـرض
شــمـس ورغـم قسـوتـهـا شعــور بالـبرد
خطوط رايحة وخطوط جايـَّة وشوك ف الورد
ونهــر ومَيـتـُه حلـوَّة لكـن عـطـشــان
وشوش بالصدق مرسومَـة لكن بَهتان
قلـوب م الحـب مَعدومَة ومـش بتبـان
ووسط اللوحة بقي واقف وحيد حيران
****** أدي الإنســــــــــــان *****
رجعـت كام خَـطــوَّة ،،، وبصـيـت تانـــي ع اللـوحـــــة
لقيتني رسمت إحساسي ، وحالتي بجد مفضــوحَــة
حاولت أكذب مافيش فايدة ، مشاعري مطفطفة زايدة
وجـوَّه القلب نار قايـدة ، ونَفسـي ياخـلـق مَدبـوحَـــة
******** أدي اللوحــــــــــــــــــــة *********

40
أنت مين ؟!
حَسيت في مَـرَّه أنك لوَحـدَك
وأنت حواليك ناس كتيــر ؟؟!!
جرَّبت تنسـي حتــي نفسك
في اليأس تبقــي مَحبوس أسير ؟!
طب قوللي لو مّرَّة بَكيت، أو إنحَنيت
من حِـمـل فــوق ضَـهــرَك كـبـيـــر!!
جربت تمشي في الشوارع وأنت مش عارف لفين ؟!
وألف فكرة في عقـل ضايع، فين شمالك من يمين ؟!!
وبعد توهَّة تلاقي نفسك لسَّه في مكانك! أنت مين؟!
ده سؤال سألته لنفسي ياما بس ماسمعتش ردود؟!
مستـَنـي أسمع يوم إجابة، !!نفسي أعرَفلي حدود!!
أنا يعني عايش ولا مَيت ولا أيه مـعنــي الوجــود ؟؟!!
****************



41
*** سلام يا دُفعة ***
سلام يا دُفعة يا احلي اصحاب
يا عشــرة عُمــري يا أحبـــــاب
مش هنســاكم أنتو في قلبي
طــول العُمــر إن طـــال أو غاب
ســلام يا سيـد ســلام يا حنا
أيامــي معـاكــو كـانت جنــــــة
إللــي مصبرني علي فراقكـم
إني في حضن أمي راح أتهنيَ
بـس كفــايـــــة عيـاط يا أخوانا
ده مصيــر الحـــــي هيتلاقــيَ
هتجونــي فـي أجازتكـو الجايا
مستنيكو عشـــان نتشاقــيَ
راح أفرحكــم قبل ما أسيبـكم
أمــي خطبـتلــي محـــروســه
يوم العيد فرحي وراح أشوفكم
يالا ســلام بقــيَ , أخـر بوسه
***** سلام يا دُفعة *****
حادثة إغتيال 25 جندي في سيناء



42
ســـــور كبيــــر
كُنـت بفــرح لمـا أشــوفهــا
لمـا تحكـيـلــــي ظـــروفـها
وأفضـل أحكـي معــاها ياما
كـان بيـهـرب مـنهـــا خوفها
تبتســم مـن تانـــي روحـها
دمـوعـهـا بإديـا مـاســــحها
والســــاعــــات بتـمُـر بـيـنا
كُنـت أنا بلـســـم جـروحـها
كُنـت بـفـهـم مـن عـنيـهــا
كــل كلــمـــــــة بتـداريـهــا
عنــي لو مكســوفة منـــي
كُنـت حاسـس باللـي فيهـا
بــس كـان بينــــي وبيـنهــا
سـور كبير يمنعنــــي عنهـا
أصلــي ما أملُكش إلا حبي
والحيـــاة قـافـلـه بيـبانهــــا
قُلت مش راح أشوفها تاني
مــش هـكـون أبـــداً أنـانـي
بُكـرَا تنـســَي حبـــي ليها
ليـه بقربــي تعيـش تعانـي
مـَـرت الأيـــــــام ســــنـيـن
جــوَّه قلبــــي صــراع،أنيـن
نفسـي أشوفهـا لو ثوانــي
طول حياتي هعيـش حـزين
*****











43
إلي من أحبه قلبي
مـن قلبـــي بتمـنالك الخيــر حتـــي ولـو مــع إنســان تاني
أصل الحب ده معني كبير وعمري ما كنت في حبي أناني
مش راح أقولك برضو وداع أنتــي في قلبــي طول العُمـر
حبــي ليكــي ما كانش خـداع مــش بسهـوله هنسـي الأمـر
كنت أتمنـــي تكونـــي معـايا تفرحــي بيا وأفـــرح بيكـــي
أيـوا الجــرح كبيــر جوايـا بـــس حقيقــي فرحـان ليكـــي
صـورتك مـش هتفــارق بالــي ولا يوم هنسـي أفكر فيكي
أنتـــي ساكنــه حقيقـــي خيالـــي مـــش بإديـا ولا بإديكــي

******






44
***مستني أيه ؟؟ ***
ريشة في مَهَّب الريح في ليل طويل مالهوش نهار
عابر سبيل من غير دليل نفســه يرتاح جــوَّه دار
مركب وضاع من غير شراع، ولا حتي دفَّة للمَسار
جُندي جبان خايف يبان ولا عُمرُه داق طعم انتصار
وقلب سكران مُر الزمــان وكمــان متقل في العيار
وعقل شاب من حيرته غاب ولا حتي في إيديه إختيار
واليأس خلاني حطام، خلص الكـلام أنا في إنهيــار

لكن عنيا للسما مَرفوعة ليك ماعرفش ليه
دأنا حتي مش واثق في نفسي،وإيماني بيك يأسي لاغيه
لكن أنت قلت أن الدموع تصعب عليك ،طب أعمل أيـه؟
هي اللي لسه باقيَّة فيَّ بتناديك مستني أيـــــــــــه ؟
محتاج لحضنك من زمان، نفسي أنا في لحظة أمان
محتاج أغمَّض عيني أنام أنا بين إيديك وأنسيَ إللي كان
********مستني أيه ؟؟*******


45
**** مِـدلـــي إيــدك****
أنا مش عايز غير تَحريرَك ... من كل قيودي إللي كاشفها
مش هيأس لحظة إني أجيلك ... كل ظروفي أنت عارفها
يامـا حاولت كتيــر أتغيـَّـر ... لكن ضَعفـي يارب مانعنـي
وبَقيت قُدام نفسي صُغَيـَّر . حزن شديد في القلب مالكني
أيـوَّه يارب ماحــدش غـيـرَك ... يقـدَر وبكلمــة يغـَيـَّـرنـــي
خـُدني فـي حضنك مدلي إيدك عَن كل سنيني عَوَّضني
أنا مش عايز غير تَحريرَك ... من كل قيودي إللي كاشفها
مش هيأس لحظة إني أجيلك ... كل ظروفي أنت عارفها
*************






46
مــد إيــدَك
أنت عــارف إنـي ماليـش يارب غـيـرَك
وأنت شايف ضَعفـي مش قادر أجيلك
يأســي إمتلكنــي حـُزنــي هَلَكنـــي
ودمـوع عنـيــا تَوهـتنـي عَن سَـبيلك
أنت قُلتلــي إني مَحفوظ جوَّه عينَك
نبـض قـلبـــــي ليك بيـُصـرخ بينـاديلك
وصــوت بـُكايـــــــــا أنت شفــايــــــــا
ليك ياربي بَمِد أيـــــــــــدي مد أيدك
******* مـــــد أيـــــدك *******





47
هعيش العُمر ليك
وياك راح أكمل مشواري ،، وف حبك هَكتب أشعاري
********** وهعيش العُمر ليك **********
أنا جاي وواثفي في قراري ،،، متغَرّب ولقيتك داري
******** يا إلهي أنا بين أيديك **********
مش لاقي سلام للقلب يكون ،،، فرحة لحياتي دأنا مسجون
غرقان بفكري في بحر شجون ،،، واليأس ســور من أسـواري
وياك راح أكمل مشواري ،، وف حبك هَكتب أشعاري
********** وهعيش العُمر ليك **********
أنا جاي وواثفي في قراري ،،، متغَرّب ولقيتَك داري
******** يا إلهي أنا بين أيديك **********
صــرخـــة دمـوعــــي بتـنـده ليـك ،،، محتــاج لحـضـنـك مــد أيـديك
شيل حملي ربي دي الراحة فيك ،،، يانور في ليلي وشمس نهاري
وياك راح أكمل مشواري ،، وف حبك هَكتب أشعاري
********** وهعيش العُمر ليك **********
أنا جاي وواثفي في قراري ،،، متغَرّب ولقيتك داري
******** يا إلهي أنا بين أيديك **********
همسك في وعدك واثق فيك ،،، منقوش في كَفك جوَّه عنيك
حبيبي أنتَ أنا ليك وبيك،،، هتعيش في قلبي وف أفكاري
******

48

نفسي أرجَع
كل يوم بَبعـد لأني ، عُمريما حاولت إني أعود
كل يوم بَوعد لكني ، عُمري ما وَفيت بالوعــــود

بس نفسي يارب أرجَع،أترمي في حضنك وأنام
مــد إيدَك، عـني ارفع،، حملـي واملانــي سلام

دي الحياه في البُعد عَـنَـك ، نار لهيب مُر وعذاب
والنعيــم إللي افتـكـرته ،،، بَرا بيتك كان سراب

بس نفسي يارب أرجَع،أترمي في حضنك وأنام
مــد إيدَك، عـني ارفع،، حملـي واملانــي سلام
*******



49
*** وادينا عايشين ***
وبنخسرأغليَ مالينا وادينا عايشين
الحـَســرة ماليا عنينــا دمــوع وأنين
،،،،،،،وادينا عـايـشـيـن،،،،،،،،
يوم نفارق أب كان غالـــــــي علينـا
ويوم بنفقـدابن كان ضحـكـة لعنينـا
وأيـــه بإديـنا غـيــردمـع الـعـيـنين؟!
،،،،،،،،،،وادينا عـايـشـين،،،،،،،
أصــل الـفُـــــراق مـكـتـوب عـلـيـنــا
مــهـمـا عــــدينـا الســنــــــــــــــين
يـــومـنـــا بـُكـــرَه أوالـنـهـَــــــــارده
واللـــــــــــي بـَعـدُه هيكـون لمين؟!
،،،،،،،،،وادينا عـايـشـيـن،،،،،،،
وهــــو ده حالنــا معـاكـــــــــــــــي
يادنيــا وَخدانــا فــــــــي هـواكــــي
فيكـــــــــــــي أيــه حلـو وجميـل؟!
ده إحنـــا منـك مَســـــــــــــــروقين
ياريتنـــا فيكــــــــــــــي ما اتولدنــا
،،،،،،ولاكُـنـا فيكي عايشين،،،،،
50
*** مافيش فايدة ***
مافيش فايدة ياناس مَاليت
من العيشه وحقيقي ناويت
علي الغُربَة ومش راجع
ومن وشِك خلاص هَجيت
أدي الباسبور وادي الشنطة
كفاية بقي كده أوَنطة
يامركب تايهه في التوهة
حياتي فيكي كانت غلطة
في قاع القاع دهور عايشين
وحالنا ضَياع وكدب سنين
يا أم الدنيا بقي كفاية
هنستعبط كتير علي مين ؟؟!!
خربتوا عقولنا بالشعارات
كلام فاضي لناس أموات
تاريخ مغلوط ومتزَييف
ومتظَبَّط ومتأييف
وطعمُه ما عادش بيكَييف
زهقنا خلاص من البوهَرات
كلامي واضح ومش تخاريف
ماليش في اللف والتأليف
ولو حتي كرهتوني
وبالمجنون وصفتوني
ماعادش يهم،،قرفتوني
خنقتوني بأم الزيف
وجوَّه القلب نار قايدة
ونفسي بالشجون زايدة
وقولت كتير هَتتعَدل
من الآخر مافيش فايدة
مافيش فايدة***
***
51
*** ليه صعب؟ ***
ليه صعـب إنك تحـب بـجَـد؟
أوجسرالمحبة كمان يتمَـد
هات إيدَك ف إيـدي وجــرَّب
نضرَب فوق جدارالكُره ،نهِد
انسَـــي أي قيـل أوقـال
عـن عـلان وقـبلُــه فـلان
دي الكراهية م الشيطان
الله محبــــة ده أجمل رَد
الكراهيــــة نار بـتـقـيـد
راح تحرق حياتنـا أكـيـد
قوم بالحب مـــــد الإيد
وافتح أي باب اتسَــــد
ليه صعـب إنك تحـب بـجَـد؟
أوجسرالمحبة كمان يتمَـد
هات إيدَك ف إيـدي وجــرَّب
نضرَب فوق جدارالكُره ،نهِد
***************




52
******* هَتـفــــرِق كتيرررررررررررر *******
هَتفرِق كتيررر، لو قلبنا علــي بعضنا، هتفـرق كتيررر
هَتفرِق كتيررر، لو كُـنا ضاميـن بَعـضنا، هتفرق كتيررر
طَب فيها أيه؟! ماهي دي وصية ربنا، طب فيها أيه؟!
طَب فيها أيه؟! نظهــر لبَعــضنا حُبنــا، طب فيها أيه؟!
ماهو أنت أُخويا وأنا برضو أخوك، طب فيها أيه؟!
وأبويا آدم هــو أبـوك ؟! رافضـنــي ليــــــه؟!
قولوا للي بيفَّـرَّق : حرااااام ، ده الدم واحد مش كلام
والإنسانية أمنا، دينها السلااااااااااااااااااااااااااااااااااااااااام
******** هَتـفــــرِق كتيرررررررررررر *********









53
*** حـس بــيَّ ***
عــايـز أقولك حـس بــيَّ وبمشـاكلــي وبظـروفــي
مش هقول جايين عليَّ مش هقول زودتوا خوفي
بـس لـو تـقـدَر ثوانــي، تحُـط نَفسَك أنت مكــانـي
عيش حياتي ولو في فكرك، وأنت تعرف إزاي بعاني
شوف يا صاحبي إزاي بَعيش، عيش حياتي وقولي رأيك
ولا صـاحبـَك مايسـاويـش ؟؟!! لـو ثـوانــي مـن كل وقتك
داحنا عايشين في البَلد دي ،، أرض واحــده بتسـد جـوعنـا
والمَيَّه إللي في النيل بتجري، هي اللي بتفيض من دموعنا
داحنـا أخوَّه فـي الإنسانيــة، أب واحد أم واحدة .
يعني دَمي هو دَمك، ليه القلوب آسيَة وجاحدَة ؟!
عايز أقولك حس بيَّ، حس بالظُلم اللي شايفُه
ولا راضي أكون ضَحيـة، فكـر جــاهـل أنت عــارفُـه
ده الإلـه قاضــي وعـادل، هَيقـاضيك يـوم القيـامة
لو سِكِت عن ظُلم صاحبك، لو عَمَلت زي النعامة
ده الساكت ع الحق دايماً، زي شيطان أخرَس جبان

واللـي بيقول الحقيقــة، رَب الحقيقــة ليـه مُستعان
حس بيَّ، حس بالدَم اللي نازف من قلوب طاهرَة نقية
قـلـب أم علـي إبنهــا ... مـات شَهيـد كـان الضـحـيــــة
أم تانية بنتها، مخطوفَــة منهـــا ومـافـيــش قَـضـيَّـــــة
مين يـرَجـَـع عَــرضـهـــا ؟؟؟ مين يــداوي جــــرحهــــا ؟؟!!
ميـن يحــس بنـار وقــايدة فــي قـلبهــا المسـكيـنــة ديـا ؟!!!
حـس بـيَّ، حـس بالقَهـر اللي لَفلِف قيد شـديد حوالين إديـا !
والصراع مَـزَق كياني، عين بعين؟ ولا المحبة واحترامي للوَصيَّة ؟
حــس بـــيَّ
****







54
الفهرس
1: شخبطة
2: فارقيني بقي
3: بحر الذكريات
4: تجربة مُرَّة
5: دعوَّة للحب
6: صُب الشاي
7: اشتقت ليكي
8: اتكلمي
9: بحبها
10: بتوحشيني
11: طُـــز
12: مابقتش عارف أي شيء
13: وساويس
14: غـــور
15: عايزني أتجوز قال!!!
16: كوباية شاي
17: مابدهاش
18: ياحبيبي
19: يوميات موظف
20: حبة إحساس
21: شحات
22: زَي الفُل
23: أيه يانفسي؟
24: أيوَّه عرفت
25: أيوَّه تقدَر
26: راح أصلي
27:ببكي حالي
28: علي بابك يا كنيسه
29: ضلمة جحور
30: إلي كل موظف شريف
31: لا حياة لمَن تُنادي
32: يعني أيه ؟
33: مش أشعار
34: مين إللي قالك
35: مش خجلان
36:أيوَّه نفسي
37: آه ياني
38: ألف آه
39: أدي اللوحة
40: أنت مين ؟!
41: سلام يا دُفعة
42: سور كبير
43: إلي مَن أحبه قلبي
44: مستني أيه
45: مدلي إيدك
46: مد إيدك
47: هَعيش العُمر ليك
48: نفسي أرجع
49: وادينا عايشين !
50: مافيش فايدَة
51: ليه صعب
52: هتفرق كتير
53: حس بيَّا

#ميلاد_ثابت_إسكندر (هاشتاغ)       Melad_Thabet_Eskander#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات