الملح يغسل الوجع....سارة زيادة

سارة زيادة

الحوار المتمدن-العدد: 6324 - 2019 / 8 / 18 - 10:36
المحور: الادب والفن
    

أوقات يكون السم ف عيونهم
وساعات يكون على اللسان ناشع
يسوِّد الدنيا في وش المحتاجين
ويضيق علينا عمرنا الشاسع
حبِّة كلام بيقيد حريق
ويشوه القلب البريء
عاد لجرحي يوم دوا نافع
سرسوب ضيا بيبل ريق
أو نسمه تنعش روح بقت برواز قديم
صورة لبنت بتبتسم
والبسمة تعكس دمعة القهر
اللي منقوش ع الحيطان
أو نظره طالعه من مرار السخريه
مين اللي قال قادر يشيل
الكل قال طبعا هي
او قالها للقلب اللي داب م التضحيه
كن أُضحيه
عيدك يا قلبي مهوش هنا
عيدك هناك
منتاش ملاك
ولا يوم حتبقى ف عُرفُهم
كلك لهم
و لا ليك في روحك يوم نصيب
أوقات يكون السم جوه ف حضنهم
ولا ليك حبيب
مجبور تدوب
سيبهم وفوق
ومن المرار يا الا اتفطم
دا السهم لما بينطلق
لازم يصيب
والحلم م الحمل اتقطم
قلب و صرخ من صدمته
ليه مخلي خوفك هِدمَتُه
فاكرين قلوبهم هَدَمَتُه
لكنه مصنوع من فولاز
ويادوب شايفهم كوم إزاز
يمكن صحيح يوم جرَّحوه
ميت مرة حاولوا يقهروه
لكنه عمره ما ينكسر
صورته ف منامهم تترسم
وتحول الحلم لكابوس
أنا قلبي طالع م الفانوس
هو اللي حقق لامنيات
وان حتى مر العمر ..
والا حتنتهي أزهى عصور المعجزات
أنا راسي واصله للسحاب
وجدوري ثابته متبته
وف جوفي ألف من القطط
أرواحها فيا منبته
وان كل قلب سكنته ساب
راح ابيع بلاش
دنيا اتنازلت لغيري عنها
وما عشتهاش !!
وح أرش فوق جرحي الدموع
الملح أحيانا بيغسل في الوجع
ويطهر الأرواح من اللي محبهاش
كان ليا مطرح عندكم
واصبح مليش
وفراق ايديكم والقلوب ميهمنيش
الصبر فوق كتفي ضنا
بيحبني وبخاف عليه
بسكن مكانه في الألم
وكتير أوي بيخاف ليسكن يوم مكاني
ياللي انتو سم ف لقمتي
حأرجع أعيش لكن عشاني

#سارة_زيادة (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات