للصم والبكم جبهة إنقاذ وطني لله وإلا راحت البلد

طلال الشريف

الحوار المتمدن-العدد: 5910 - 2018 / 6 / 21 - 20:12
المحور: القضية الفلسطينية
    

الغريب يا أخي كلهم شايفين وسامعين وشو بيستنوا مش عارف، البلد واقعة علي رأي جارنا ومن بوم ما قسموها وصارت كل حارة من إيده إلو للأحزاب طبعا مش للشعب.

لسا بيجروا ورا المال والمساعدات والكوبونات لأحسن يبطلوا عنهم ولادهم والتابعين وزي الجدي اليتيم من وين ما كان بيشحدوا علشان يقولوا هينا موجودين نعم وكبر حيله اللي هان واللي هناك تقولش ناتج عن ذكاء سياسي خارق.

برم برم عالفاضي وبيقلبوا في الكلام وبيعيدوا وبيزيدوا والبلد قفاها عريان والنار بتاكل فيها ولا مستعدين يفهموا كل واحد زي جمل الحراث رابط عصبته وبيتمتم شعارات والله يمكن ما هو فاهمها لا بتسمن ولا بتغني من هالجوع والبهدلة وملهاش هية ولا طهباج.

في رام الله بيضحكوا علينا وقال بيشتغلوا في المجال الدولي والامم المتحدة بدهم دولة وعاصمة وبيشحدوا علي قفانا مال ومساعدات وبيشتغلوا موصلاتية وبتقمزوا علينا كل يوم بتصريح كإنوا من بيارات أبوهم بيصرفوا علينا وكأنو أرضنا الفلسطينية حرام علينا ضيعوها الله يضيع رقابهم ويبليهم بحكة في كل بدنهم ليل نهار الله يسم بدنهم بلكي يحسوا بمعاناة شعب قاسمينوا وواخدينو رهائن.

الله وكيلك تبعين رام الله بيقعدوش سبحان الله سفرات شمال وسفرات يمين واخدينها مقاولة وسياحة وكويس اللي عندنا مسكر المعبر وإلا كان المشايخ قلبوها التانيين لسياحة إسلامية رايح جاي علي تركيا وايران والوقت بيمر والبلد بتضيع واللي بيستفيد يستفيد وملعون أبو الشعب واللي فيه اللي حاوي أمثالهم قال بدهم يجابهوا المحتل لتحرير الأرض بالتنسيق الأمني مع الخواجة ويا ما أشطرهم في قولة يا خواجة.

وفي غزة اللي حاكمك عاكمك وبالحديد والنار وأخيرا ما قدروا يخبوا وهتفوا علي عينك يا تاجر واللي فيا فيا "علماني برا برا" ورجعت الكرا وفهمهم في السياسة علي قد الحال ومش عارف وين موديينا وطبعا هما كمان مش عارفين وين رايحين لو عارفين لراحوا وهالله هالله ياجملون وكل مرة بيدقوا راسهم في الحيط وبيصير عندهم ارتجاج في المخ ولا بيغيروا ولا بيبدلوا وبيزايدوا علي الشعب ولا عامليلوا قيمة يا عمي إنتوا مش الشعب الفلسطيني لحالكوا، والبلد مش مطوبه بإسمكو،الشعب بيفهم اكثر منكو ومن اللي في رام الله يا ضراير خربتوا ديارنا ومش بس هيك انتو اللي معوقين شعبنا وكمان دمرتوا مستقبل أجياله بنقول ثور بتقولوا إحلبوه يا عمي لازم يتوحد الشعب والا كل شغلكوا عالفاضي انتو فاهمين شو بنقول والا فاقدين السمع؟ إنتو مش طردتوا الناس هديك عشان تحررونا بشوف تحررت القدس من الناحية التانية مش من ناحيتنا شو بدكوا تعملوا لترامب من غير وحدة وترك السلطة ومن غير احترام لشعبكو.

كمان مرة الخارطة السياسية في غزة سبعين في المية من النظام السياسي وأكثر يا بتعملوا جبهة انقاذ وفش حد اكبر من حد الكل فاشل صغر حزبه أو كبر وبلاش كبرة عجرة ومحاصصة مرض منها الشعب الفلسطيني وصار في الإنعاش وجبتولو الدور. بكفي خلاص غوروا وسلموها يا بتعملوا جبهة إنقاذ .. بيقلك ما حدا بيعترف فيها طب وإنتو من غير جبهة إنقاذ مين معترف فيكو؟

خلاص إسمعوا مني جبهة إنقاذ علي قدم المساواة وقيادة من سبعة أو تسعة ومنكوا بس واحد في القيادة والباقيين من الناس الكويسين من هالشعب وتتشكل جبهة انقاذ تعمل في السياسة بس وتصحيح النظام السياسي وسيبونا من الحرب الآن ما راح تفيد بشيء بدون تصحيح النظام السياسي اللي هو أساس البلاء واللي خلاكو كل واحد إلو قيمة وبتعرنطو إنتو وهما علي باقي الناس لإنو النظام السياسي كله فاسد وبيجيب لأهله المسبة والكل منكو مبسوط علي حالو صارلو قيمة

يا عمي الوطن بيروح انتو لسا بتتخانقوا مين اللي بيفهم اكثر يا عمي طلع مفش حدا بيفهم لو في حدا بيفهم بعد عشر سنين من الانقسام الجاهل المفروض دب حالو في البحر ..

جبهة انقاذ وطني معروفة القيادة يلتزم الجميع لبرنامجها هدفها اسقاط عباس وتصحيح النظام السياسي الفلسطيني وانتخابات وبعدين لما تصير إلنا قيادة جديدة تصدوا لترامب وصفقته وروحوا عالأمم المتحدة وقاوموا لو اتفقتوا عالمقاومة بس انظل هيك هادا هبل وجهل وبتضيعوا وطن وشعب عن الخريطة وانتو قاعدين تكابروا واللي فاكر حاله قوي الزمن بيصنع اللي أقوي منو، القوة نسبية وما حدا عبر التاريخ ظل قاعد عالكرسي بالقوة ولازم ييجي أقوي منو ويشيله وان ما جاش راح ينكسر الكرسي من تحته وهو مش داري .

كفاية الوطن بيروح وإنتو كلكو مغرزين في نص الطريق ومعطلين مسيرة شعب وحياة ناس وكمان تقرير مصير وطن كامل يلعن أبو السياسة هادا لو بتفهموا سياسة .. أخ كان واحد صاحبي بيفهم في السياسة منيح بس خلاص لإنو بيفهم مخه ضرب عقبال عند اللي بيفهموا في السياسة ولإنهم كلهم بيقولوا عن حالهم بيفهموا في السياسة النتيجة ولا واحد مخه ضرب، إبيفهموووش سياسة شايفين إحنا بعكس الناس وبنضحك عحالنا وعلي بعض وماشيين بعكس السير.

أبوك يا وطن اللي كل قادتك أذكياء لإنو مش بس اليهود قسموك كمان أولادك قسموك وبهدلوك وخلوك حزب ودينار ودولار وراتب نتن وعلبة تتن ونجوم عالاكتاف ودفع رباعي وكابونات وصرر وهيات وهمبكة وشغل لفتك ما لفت خرب علي الأجيال والعايشين وحتي الميتين تعبانين منكو .. حلو عنا كلكو خلينا نشوف وجه الله الله لا يسامحكو في اللي عملتوه فينا.

#طلال_الشريف (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل