خواطر حول العملية الإرهابية بتونس العاصمة هذا المساء

بلقاسم عمامي

الحوار المتمدن-العدد: 4996 - 2015 / 11 / 25 - 01:52
المحور: مواضيع وابحاث سياسية
    

الضربة متاع لعشية في شارع محمد الخامس غيرت من ألوان الصفحات عالفايسبوك ومن محتوياتها وريت موجة مال"وطنية" كبيرة برشة حتى من ناس نعرفهم بيوعة وقوادة في ممارساتهم متاع كل نهار... وذكرتني بموجة "التدين" اللي ترافق رمضان وفمة شكون حتى ايطول اللحية ويلبس كبوس و"هركة" (كايني الصيام ما يكتمل كان بالكبوس والهركة) ويمش للتراويح زادة وليلة ما يقولو غدوة عيد ايبات يقلب في لحكك ولى ايكدس في الشقوفات...

قلّبت الصفحات متاع الناس اللي تحب تونس (كيفي.. تي راني انا زادة نعشقها ونموت عليها تونس) صديقاتي وأصدقائي وخويا الأستاذ وأهلي وحذام بنتي وصفحات أخرى ولقيت روحي كايني أنا مقصر صفحتي فقيرة لمنشورات تهاجم في الإرهاب وتعدد فيه وفي رعاتو والروس لكبيرة اللي تسطر وتنفذ... عاد خفت لا نكون "موش وطني" ونكون تحت طايلة "المحسوبين على الكفر بالوطن" وترصيلي نفسر ونبرر و"نتذوبن" (الإحساس بالمذلة تقولش عامل عملة؟) فحاولت نكتب ونجاري الجماعة والتلفزة وقانون حظر التجوال ونبدا "نعيط وكشاكشي طالعة وأنا نسب في الشيخ ووليداتو وكل منهو توة "يجبدو البحث" لكن الكلمات القوية والمعبرة ما حبتش تخرج من حلقي...

حاولت نتعسف على روحي ونتسلف كلام من هنا ومن غادي لقيت روحي واحل في فكرة ما حبتش تبعدني ولا تفارقني: "ضربة اليوم رجعت حالة الطوارئ وخلت الاتحاد يلغي روزنامة الاحتجاجات "ضد حكومة النهض/داء" وملت قلوب المواطنين بالرعب."

فبحيث نحس اني في عرض متاع "السحار" لا ندري ياخي اللي نشوف فيه "خفة يدين وإلّى طلاسم في العينين" واشبيه ركح المسرح توسسسسسسع لين كل شي ولّى غامض وداكن وما تعرفش الضربة منين بيش تجيك مالجنب؟ مالظهر؟ عالمسلان؟ عالوجه؟ (نحكي على مستوى يتجاوز ذاتي...) شكون ايحرك في اللاعبين؟ وشكونو "السحّار"؟ ومازالش قدام عيني خيط أمل في "الثّورة"؟؟؟؟ وما نعرفش علاه هكة ومن غير ما نفيق نلقى روحي كايني نتفرج في فلم "الذئاب تهاجم بعضها" les loups entre-eux" un film de José Giovanni avec Claude Brasseur

مانيش بيوع ولاني خاين ومانيش خايف ولاني متملّح والأهم مانيش مسلم في حلمي بيش تكون بلادي سمحة ومليانة ألوان وحب وحياة وغدوة لو تتشكل "لجان شعبية" للمقاومة نكون فيها (ويخلف على تجربة رجيم معتوق) أما بلحق ضربة اليوم تزيد تكبر الخوف على غدوة موش فقط مللي نعرفوهم بل مللي ما نحبوش "نعرفوهم ونعترفو بجرايمهم"

#بلقاسم_عمامي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات