وايه يعني

جورج المصري

الحوار المتمدن-العدد: 1353 - 2005 / 10 / 20 - 13:31
المحور: المجتمع المدني
    

الميه بتنزل من الحتفيات لونها اصفر ومعفنه و وفيها دود وقلنا ايه يعني بتحصل في كل الدنيا. واهو الدود بروتين ببلاش
العيش مليان نشارة خشب ومسامير وحبال ولونه اسود وقلنا ايه يعني علي الاقل ادي احنا بنلاقي ناكل
الشوارع حالها يغم مطبات وارصفه مكسره وتراب وزباله في كل حته وقلنا ايه يعني هي دي مصر.

العالم يضرب في بعض ليل نهار وكل واحد بيشتم ويقول للتاني انت حمار سواقه وبرضه بنقول ان المصريين احسن سواقين.
المريض يخش المستشفي يتخرب بيت اهله ويموت ونقول دفن الميت سترة وايه يعني ماهو كلنا حنموت. وعندنا احسن دكاتره في العالم.
كرتونه البيض بقت اغلي من الذهب ونرجع نقول احسن من عالم كثيره اهو نصف الشعب جعان و النصف الثاني بيشاور عقله. وبرضه لسه عايشين وعمار يامصر .
اللحمه بقت موسميه بتطلع مره كل سنتين للسواد الاعظم من الشعب ونقول اللحمه مضره للصحه نحمد ربنا ان أعطانا الفول .
نسبه الاصابه بالسرطان في ارتفاع غير عادي في الاطفال ونقول اصل المبيدات الحشريه المغشوشه هي السبب حنعمل ايه في المافيا اصحاب الحكومه المسنودين ربنا علي الظالم
الحكومه حرميه وبيسرقوا قوت الشعب نرجع ننتخبهم ونقول اللي تعرفه احسن من اللي متعرفهوش .
العيال طالع عينهم في المذاكره وكأن مصر مابقتش محتاجه عماله ماهره وبرضه الموظف لسه بيشحت و العالم بتجري علي التعيين في الحكومه ويرجعوا يقول الواحد مطلعش سباك ولاميكانيكي مش كان يكون احسن.
التلوث و الزباله في كل مكان ومفيش حد عنده اي وعي نقول طب ايه الجديد هي مصر كده .
برامج التلفزيون خايبه وتافهه وخلت العالم مستوي ذكائها ينخفض نرجع نقول ياعم الحياة غم عاوزين نضحك شويه.
الادويه اسعارها بقت نار ومفعولها بقي رماد وياريت موجوده.
الصحف المصريه متحكم فيها شويه عواجيز ونصابين وبرضه نجري نشتري الجمهوريه بالليل الساعه 10 ويضحكوا علينا ويقولوا لنا أنها اخبار بكره .
العيال نشتري لهم الموبايل ونرجع نقول مش عارفين نتلم عليهم.
العالم مكتومه وبتتحط في المعتقلات لو حلموا ان الحكومه اتغيرت .
القضايا في المحاكم ما بتتحلش وموت ياحمار علي مايجيلك العليق ونقول مصر احسن حاجه فيها القضاء.
القوانين بتناقض بعضها ولكل قانون قانون تاني يوقف العمل به ولو الدنيا أبتسمت في وش حد واخد حكم لصالحه يموت و الورثه يموتوا علي ما الحكم يتنفذ .
مش قادرين نتكلم بحريه ونواجه مشاكلنا ونقول اصل عندنا اسلوب مختلف في الحياة في مصر لازم يكون عندنا حكمه ومنعملش فضايح وخلي الطابق مستور .
الاقباط مابيحصلوش علي وظائف حكوميه ومش ممثليين في محلس الشعب
وبعد كل ده نقول للي بيحاول يحل المشاكل مشاكلنا مايحلهاش غيرنا وعلي راي المثل اللي بيقول الاعمي قال انا شايف الحل وكل المفتحين يقولوا والله الراجل ده مفتح .
الكل خايف من مواجهه المشاكل و الكل خايف وسايبها علي غيره يحلها وبس حد يعرف ان فيه واحد اتحرك علشان يحل حاجه الكل يبقوا علامه ويطلعوا بحلول اسمها لاحلول ... ايوه فيه مشاكل واحنا حنحلها بنفسنا طيب حلوا المشاكل ... يقولوا لك مشاكل ايه هو احنا عندنا مشاكل طب ماهو الدنيا فل الفل والريس انتخبناه و شرم الشيخ ميت فل وعشره و الفسح تمام في مصر .
علي راي صباح وبمناسبه الشهر الكريم بتفكروني باغنيه الراجل ده حيجنني.
وعلي نفس الوتيره "الشعب ده حيجنني ... حيجنني"

#جورج_المصري (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل