الارض الجديدة Kepler-452b

روماني سمير
كاتب, باحث, شاعر, مبرمج
(Romany Samir)

الحوار المتمدن-العدد: 4876 - 2015 / 7 / 24 - 22:37
المحور: كتابات ساخرة
    

بخصوص الكوكب الشبية بالارض .. قررت ادلو بدلولي انا كمان واساهم في تحطيم امال الملايين .. الكوكب اسمه Kepler-452b .. ودا واحد من ضمن 1030 كوكب نظامه الشمسي شبيه بنظامنا .. مرشح منهم 521 لاحتمالية وجود حياة .. منهم برضو 12 كوكب قطرهم زي الارض او الضعف .. بس خلينا في في المولود الجديد دلوقت .. ناسا بتقول انه المسافة بينه وبين شمسه مناسبة لاحتمالية وجود حياة .. كمان لسة مش عارفين هو صخري ولا غازي بس احتمال يكون صخري .. الكوكب الصخري اللي هو زي الارض كدة والغازي كله غازات بعيد عنكم .. كرة هواء مفيهوش حتة تقف عليها .. كمان احتمال يكون فيه سائل .. ويعتقد انه احتمال يكون متوفر عليه الشروط لوجود حياة .. قطره اكبر من الارض بنسبة 60% .. وبيبعد عننا مسافة 1400 سنة ضوئية .. الكلام دا كله نقلنا عن موقع ناسا الرسمي.

- هعرض كام نقطة في السريع كدة ..

-عد كام كلمة احتمال جات في كلامهم ..؟!!!
الموضوع كله احتمالات .. وكأن واحد بيقول احتمال يكون فيه كوباية ماية في قرية فوق الصخرة اللي في الصحراء اللي في الناحية التانية من الارض .. دا لو فرضنا ان الصخرة دي صخرة اصلا من كومة رمل ..

-الصورة المنشورة للكوكب دي من رسم خيال فنان .. انما علميا وعمليا الكوكب بيبقي متشاف عبارة عن نقطة منورة باهتة علي شاشات ادق التليسكوبات .. وبيتم عمل تحليل طيفي لنقطة الضوء دي لمعرفة المواد اللي متكون منها الكوكب .. واغلب الاوقات حتي بيبقي مش متشاف وبيتم حساب احتمالية وجوده نتيجة تاثير جاذبيته علي اقرب شمس لية ..

- لو فرضنا انه حقيقي وساوينا كل احتمال بمؤكد .. انتوا عارفين هنوصله في اد اية ... اقصي سرعة وصلتلها مركبة فضائية بتحمل انسان كانت 40 الف كيلومتر/ساعة (ابولو 10) .. بس عشان الاصفار كتير هنحولها لثواني عشان في الفضاء السرعات مهولة والثواني بتفرق .. يعني 11كم/ث .. واقصي سرعة لمركبة بدون انسان كانت 17كم/ث (فوياجر 2 ) .. انا حاولت اعمل الحسبة دي وبسراحة عينيا صفرت من الارقام .. هعرضها عليكم وانتو احسبوها ..
مسافة السنة الضوئية الواحدة بتساوي 9,460,730,472,580.8 كيلو متر اقسمها علي 17 اقصي سرعة .. واقسم الناتج علي 86400 عدد الثواني في اليوم .. وبعدين اقسمها علي 366 باعتبار ان كل سنينا كبيسة .. بعدها اضربها في 1400 عدد السنية الضوئية .. الناتج كله هيكون 24638198 سنة عشان نوصل للكوكب المنشود .. الي اللانهائية وما بعدها .. نكون اتطورنا وبقينا سحالي.

-هتخيل اننا اكتشفنا ثقب دودي يختصر المسافة .. للعلم بس الثقوب الدودية لسة مجرد خيال .. وعن طريق الثقب الخيالي دة وصلنا .. الكوكب اكبر من الارض ب 60% يعني تقريبا الجاذبية هتبقي الضعف .. ياتري هنستحمل الحمل .. طب وبالتالي الوزن هيبقي الضعف .. انا بالنسبة لي دي ميزة .. انما البنات اية نظامهم .. البنت بتبقي 70 او 80 كيلو ومتعقدة وبتقول انها تخينة اومال بقي هناك لما تكسر ال 160 كيلو ع الميزان هتعمل اية ..

-الخلاصة واللي عاوز اقوله .. ان ناسا كل سنة بتكتشف كم كبير من الكواكب .. وفكرة اعلنها كل شوية عن اكتشاف كوكب شبية بالارض الغرض منه دعائي او ترويجي اكتر منه اعلان اكتشاف .. ولانه بيساهم في زيادة التبرعات والدعم سواء من القطاع الخاص او العام .. و من وسط المستثمرين ورجال الاعمال اصحاب الملايين المهوسين بالفضاء ..

وسبب الضجة الكبيرة في مصر للاكتشاف دة وخصوصا اوساط الشباب .. هو انه حقيقي كمصرين احنا بؤساء بما يكفي .. بؤس تعدي فكرة الهجرة من مصر .. و الكوكب كله .. والمجموعة الشمسية .. وما بعدها ..

#روماني_سمير (هاشتاغ)       Romany_Samir#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل