دعاء العطار
الحوار المتمدن-العدد: 4550 - 2014 / 8 / 21 - 14:31
المحور:
الادب والفن
انا مسلم
لكن بلسانى وبطاقتى
بعيد جدا عن الاسلام
في تكوينى
انا العاصى
انا البايع حروف اسمى
عشان مفتون
كتابي يقول سلام رحمة
وانا ساكن ضلام الكون
عصيت ياما
وعمري ما زرت بيت الله
ولا صليت ولا سبحت للرحمن
ولا أديت فروض دينى
لكن حبيت جميع الناس
لا خنت في يوم
ولا مديت إديا على اللي مش حقي
ولا استنيت يموت الناس
عشان ألحقلي كام كرسي
وعمري ما قلت إنى إمام
ولا هادي
ولا إنى رسول من عند رب الناس لكل الناس
عشان يهدى بشرع الله
أنا عاصى
وأملى إن رب الكون في يوم يهدينى للرحمه
يوجهنى في يوم للقبله
ويفجر في قلبي خشوع وتسبيحه
ويغفرلي وانا كنت انفلات الكون
متلعننيش في تفكيرك
انا عاصى لكن شايف
ولو كان كل عاصي يشوف حدود ذنبه
مكانش الظلم يتمادى لحد السيف ودبح الناس
وتبقى الكدبه بوابه تنقط دم ع الكراس
وتطلع بعد موت أطفال بعمر الورد تتمسكن
تقول قسمة
تلخصلي أمل عمري بكام ملطوش
واقول نعمه
وهقبل بيك عشان قالو دي شرعيه
لكن عمري ما هقبل في اللي راح ديه
ولا عمري هسامح لو هتدبحنى باسم الدين
لأن الدين بريء منك ومن دمي ومن أهلك
انا عاصي لكن دمى هيفضل طوق على رقبتك
#دعاء_العطار (هاشتاغ)
كيف تدعم-ين الحوار المتمدن واليسار والعلمانية
على الانترنت؟