هسع في سيرتك .. كنا بنتونس

مزمل الباقر

الحوار المتمدن-العدد: 4541 - 2014 / 8 / 12 - 09:20
المحور: سيرة ذاتية
    

هسع
في سيرتك ...
كنا .. بنتونس

أنا .. ونهى ..

هسع .. ورتني .. كيف عرفو
بإنك ..
شلت .. عصاتك
وفجأة .. رحلتا ..
ومشيت لي .... ربك

وانا ..
ما قدرت .. أحكي ..لأختي
وهي معاي .. وسيرتك..

عن صباح يوم السادس من يوليو
أو التامن من رمضان

سألتك ..
بيني وبين نفسي:
وهي .. معاي .. وسيرتك ..

بالله عليك يا أبوي
تمشي كدا ؟
من غير .. ما توادعني
ماها عوايدك!!!

بدون .. ما ترجع تاني

قبل ما تقفل باب الشارع
وتوصيني:
بعد ما تصحي من النوم .. ما تنسى المويه
لشدر الشارع

ولازم ..
تسقي .. شتلات امك
وكل ..شتولا
الفي .. الحوش

وأرجع تاني .. أملأ
حيضان الشدر .. الفي الشارع
وأسقي ..

وما تنسى ..
تجيب العيش
من ( حاج علي )
دا عندو احسن عيش ... في الحي
جيب الفول والزيت من دكان ( آدم )

واليوم.. مرقت من قدامي
- وياداب .. الشمس
بتتمطي .. ونعاس امبارح.. بادي في عيونا -

اليوم مرقت من قدامي ..
وما ودعتا
وما وصيتني
وسافرت... كدا


هسي يعني خلاس سافرت .. يا أبوي
بدون ما نعرف ..
بتين .. حاترجع؟

في كل أسفارك .. كنا بنعرف
إنك لازم ترجع

وهسع ...........

وهسع ..يعني خلاس ..
حتسافر من غير
عودة؟

انت صحي حتسافر من غير
رجعة؟

قول لي يا أبوي: أنك بتهظر وما حتسافر ..

اضحك يا أبوي ..
لحدي ما ..عينيك..
تدمع

أضحك .. وغفل ... سفر
الموت
وتعال ..

تعال .. صحيني
بدري ...
لصلاة العيد

قول لي : بعد صلينا .. ارح نغشى ..نعيد علي جيرانا .. اليوم
عشان بكرة نعيد علي ناس .. أمدرمان

وقبل ما نفطر ...
قول لي: لازم نعيَد .. علي
أمك
وأختك
خالك ...
بالتلفون

وأنا أسأل فيك :
هسع أمي ... حتأخد ( الجرعة )
بعد العيد .. طوالي؟

نقول لي: هسي بنعرف .. قبل ما نفطر ..
جيب الموبايل ... وأضرب ليها

وتخلينا ببعد ما كلنا .. عليها .. نعيَد ..
تشيل الموبايل
وتدخل .. أوضتك
عشان .. تتكلم مع أمي براحتك

وبعد ما نفطر .. وأنا بشرب في كباية القهوة
وكباية الشاي .. قعدت جنبك

تقول لي:
ياريت في الجدول تطلع ( اوف ) (1)
في اليوم التاني
عشان تمشي ...تعيد ..وتفضي يومك عن ناس جدك
بدل ما تكون في المكتب.

جاني العيد .. يا أبوي
شايل .. كفنك

جاني .. العيد
يا أبوي ..
وانت بعيد

هو .. ما كان عيد ..

كنت .. مؤجز
من الشغل..
وقاعد في البيت

هو ما كان
عيد ..
هو . ما كان
عيد

كنت .. و كنا .. برانا
رغم .. انو
أهلنا ... واصحابنا
معانا

هو .. ما كان عيد
كنت وكنا ... في (غربة روح )
يا أبوي

هو ... ما كان عيد
يا أبوي

كان إحساس .. باليتم
يادابو .. وليد

كان ..جرح غريق
نازف .. وجديد

وكان ..ما ربنا
بينا لطف

وخلا

اهلنا
والاصحاب
حولينا ..

كان .... جنينا

عارف يا ابوي ..
(عم أحمد ) (2).. أيوه ... ترزي السوق
شافك بي .. جلابية العيد
وأنا ما شفتك ..
تفصيلو أكيد .. بعجبك
ترزي .. ممتاز
من أحسن .. ترزية.. السوق


( عم صديق ) .. الصرماتي
لسع قاعد .. جمب جامع ( عبد الفغار )
حيفقد - زيي - كلامك .. ليهو
يخيط لي .. كويس
شبط العيد ..اللي اتقطع من أول لبسة

ولدك يا أبوي ... ما عندو شبط
تم شهر ... إلا واتقطع

ولابد .. يمشي لعم صديق
أو ( عم ماهر ) (3).. القبطي الماهر


عمي ( محمد ) .. الخضرجي
ينشد
في أخبارك ..
كل ما يلاقيني .. أو يلاقي أخوي .. محمد
وما يلقاك ..
أقول ليهو: أبوي .. مشى لأمدرمان
وبرجع نص اليوم
وفعلاً .. بلقاك
نص اليوم .. أو ... في آخر اليوم

بس المرة دي
يا عمي ( محمد )
أبوي مشى ... لأمدرمان
ونحنا ... لسع .. منتظرنو
وكلنا لهفة

بس ..

مشى ...نص .. اليوم

وآخر .. اليوم

وغاب شمس اليوم

وكم .. يوم

ويوم ..

ويوم ..

وأيام

ولسه .. ابوي ..في
( أمدرمان )
ونحنا .. في ( شرق النيل )
كنا .. منتظرين ..

يا سواق الحافلة
انت .. ما .. صدمت
أبونا ..
براهو

انت .. صدمت
(ذاكرة جمعية) .. لكل الأسرة

انت .. صدمت
طفولة
راعاها ..
ابوي وأمي
وصبرو علينا
كتير والله
لما كبرنا ..

انت .. صدمت
شباباً ..
كبر .. في عيونو

قبل .. ما يكبر في
أجسامنا

انت .. صدمت
سعادة .. غمرت ..
قلبو
لمن شاف
اولادو ..

بناتو ..

كبرو .. قصادو ..(4)

وعقلو

يفخر .. بيهم

ويرفع .. راسو

انت .. صدمت
أحلامو .. الخضرا (5)..
بي يوم ... بكرة

انت .. صدمت
أحلامنا ..
اننا .. نكبر
اكتر
واكتر
وهو .. وسطينا :

شدراً .. ماهل (7)
تحت ضلو .. بنجري ونلعب
( دس .. دس ) (8)

نيلاً .. زاخر
نشرب ..ونروى ..
ونغطس .. ونقلع (9)

ضلاً .. بارد
فيهو .. نقيل (10)

ولمن .. ننعس
وننعس
وننعس .. أكتر ..
والنوم .. يغشانا

نصحى
وانت يا أبوي.... كنت
معانا ..
ولسع

انت .. معانا



(1) تطلع أوف : اي تكون في عطلة .. طبعاً التعبير مأخوذ من الكلمة الإنجليزية Day off
(2) عم أحمد: هو ترزي بلدي أي خياط يخيط فقط الجلابية وملحقاتها له دكان على مقربة من جامع البريقدار بحي السوق بأمدرمان اعتاد أبي ( رحمه الله) ان يخيط جلالبيه لدي عم أحمد
(3) عم ماهر: يعمل بمنزله بحي المسالمة بأمدرمان في ورشته الصغيرة على اصلاح الأحذية مثله من عم صديق. ( رحم الله الأول وامد في عمر الثاني).
(4) كبرو قصادو: كبروا أمامه أو أمام ناظريه.
(5) احلامو الخضرا: في السودان نطلق اللون الأخضر للدلالة على النماء والتفاؤل والأمل.. وتعبير احلامو الخضرا للدلالة على ان هذه الأحلام كانت ريانة او نضرة .. مثلنا نقول في السودان أن فلان ( كراعو خضرا) حينما يعقب حضور فلان هذا ..
الخير أو البركة أو هطول الأمطار أو الأخبار السارة.
(6) شدراً ماهل: شجراً عظيماً وارف الظلال
(7) دس دس .. هي من ألعاب الأطفال بالسودان وتسمى ذات اللعبة في مصر ( استغماية ) وفي دول أخرى ( غميضة).
(8) نغطس .. ونقلع: بتعبير بعض المناطق في السودان تعني: نغطس في الماء ونطفو
(9) فيهو نقيل: فيه نقضي القيلولة أو سحابة النهار



مزمل الباقر

الثلاثاء 12 أغسطس 2014م
أمدرمان

#مزمل_الباقر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات