إلتمس العُذر

ايمي صليب

الحوار المتمدن-العدد: 4249 - 2013 / 10 / 18 - 13:50
المحور: الادب والفن
    

لما تلاقي حد بيتعامل بلطف معاك وبوضوح وصراحة
متقولشي عليه انه طيب وساذج وممكن تستغل ده
هو بس انسان قلبه نضيف وذكي وبيحاول يحب الناس كلها
لما تشوف واحدة مش باين عليها انوثة او مش مهتمة بمظهرها
متقولش عليها انها مسترجلة او دي راجل
ربما انها وحيدة في الدنيا و شايلة مسئولية كبيرة
لما تتكلم مع حد وتلاقيه مصدقك حتي لو انت بتكذب عليه
لا تستهين به وتستخف بعقله تاني او تفتكره غبي
لانه ممكن يكون ده تجاهل منه وعداها عشان مش يخسرك
لما تلاقي حد كذب عليك في الكلام مرة او اتنين وانت اتضايقت
متقولشي عليه كذاب لانك كدا وصفته بانه بيكذب علطول
وهو يمكن كذب غصب عنه ورجع ندم عليها في قلبه
لما تشوف حد بيحاول يضحك كتير وعلي الهايفة
متقولش عليه اهبل او تافه او تحتقره
ربما يكون جواه حزن كبير والم عايز ينساه
لما تشوف واحدة نحيفة جدا او ثمينة جدا اوشكلها ضخم
متتريقش عليها وتسخر منها مع اصحابك وتعمل نفسك واد جامد
لانها ممكن تكون مريضة او تعبانة نفسيا بسبب ظروف ما بتمر بيها
لما تقابل حد ساكت اوي او حد بيتكلم كتير اوي او حد بينفعل شوية
متحكمش عليه بأنه هادي او رغاي او عصبي ومجنون
ربما يكون الهدوء خارجي او بيتكلم كتيرعشان مش بيشيل جواه او بينفعل لانه تعبان
لما تلاحظ ان حد بيقعد قدام التلفزيون كتير او علي الفيسبوك او علي النت عموما كتير
متفتكرش انه عنده وقت فاضي اوي او بيتسلي او بيضيع وقت
لان فيه ناس عايزة تحس بالونس وان فيه حد حواليها وعايزة تحس انها لسه عايشة
لما تشوف حد مهتم بمظهره وشكله كويس وعايز يبقي في حاله
متقولش عليه متكبر او شايف نفسه وتبعد عنه من غير ماتعرفه كويس
ممكن يكون قلبه صافي واخلاقه عالية و بيحاول يبعد عن النميمة
لما نعرف عن بنت سنها كبير شوية ولسه متجوزتش
مفيش داعي نتكلم عليها ونتطفل ونعرف الاسباب ونوصفها بكلمة او لقب جارح
هي كل الحكاية انها مالاقيتش الانسان المناسب لها لانها بتتمني حد بمواصفات معينة
ومش عايزة جوازة والسلام وكدا افضل لها من جوازة فاشلة
ياريت كلنا لما نلاقي حد شكله مش عاجبنا او طباعه مش عاجبانا
ياما ناخد جنب عشان نتحاشاه ، او نتقبله بطباعه السيئة و بشكله الغريب
لان انا وانت وكل انسان له عيوبه عشان كدا لازم نلتمس العذر لكل واحد
وبلاش نحكم علي حد من الظاهر ، لازم نتعامل اولا مع الشخص ، ودع الخلق للخالق .

#ايمي_صليب (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات