شكال بهلول البارحة ؟؟ومن سيكسب المليون ؟؟

نوري جاسم المياحي

الحوار المتمدن-العدد: 4212 - 2013 / 9 / 11 - 09:09
المحور: كتابات ساخرة
    

اكيد انتوا سامعين بعبارة ( أشكال بهلول ؟؟) ..اللي يرددها العراقيون هواية ..وفي بعض الاحيان بمناسبة وحتى بلا مناسبة..و عادة تقال هذه العبارة عندما يتنبأ القائل بحدث ما ..وفعلا يحدث هذا الحدث ..في حين لايصدقه الاخرون ..وقد يكون القول على شكل نصيحة يقدمها الناصح للاخرين او على شكل وجهة نظر لمن يحتاجها ..حينها يقول الناصح ( ها ..شكال بهلول ) ..
ولكي نبتعد شوية عن السياسة ودهاليزها وملاعيبها ...واللي لعنت ام وابو العراقي هذا الفقير المسكين ..كلت اليوم وي نفسي .. خلي نغير شوية بالحجي ونحجي حجي اهلنا بالجلفي اي بالعامية .. لان روحنا طلعت من حجي العربي الفصيح ومحد يسمعه ؟؟
ومن السياسة والسياسين اللي ما عندهم شغل ...غير بس اللغف والخمط .. والخطابات الرنانة والوعود الجذابة ووم بس هاي ؟؟ما عندهم مانع من قتل الفقراء .. وظلم الناس ..وجمالة قاتلينة بالطائفية ..هذا النائب اللي ما يستحي يهدد الناس بالذبح .. وذاك النائب يرد عليه بحجي طايح حظه واثنينهم حرامية ..ولا يعرفون الاسلام ...ولا يخافون من الله ؟؟
والله اني حرت حيرني زماني وحارت كل الناس وما تدري شيتسوي ؟؟..واحد اختلف وي ابن عمه وقبل 1400سنة ..احنا شعلينة .؟؟. وياهو مالتنه ؟؟..احنا ناس انجبرليه وحايرين بعشيتنا وخبز الحصة الجايف كاتلنه ..بربكم هاي عيشة بشر ..والله حتى البقر مايقبل بيهه ؟؟مو ملينه وبلوة وابتلينة ..
وانتبهوا يا اخوان ويا اخوات ( واحدد وااكد بالاسم يا اخوات حتى لا يروحن يزعلن علي الحلوات المحبوبات واللي اعبدهن عبادة ..العذارى منهن والمتزوجات .. الارامل ويا مكثرهن والمطلقات ..واني اخاف منهن ..لا يروحن يوكلن عني ..هذا الحجي تالي عمره ورة ما كبر وعجز كام يفرق بين الزلم والنسوان .. يا حبايبي الحلوات والمو حلوات ...العوانس اللي فاتهن القطار واللي توهن مفلفلات ..الله وكيلكم والعباس ابو راس الحار كفيلكم .. .. ترة اني ولو شايب كركمة ..اموت عليجن واحيا على النسوان ..هن الروح والرية .. وكل الساسة (بس الحرامية ) خرية و بعدجن عارية وبعد عيونجن الحلوة وشفايفجن اللي تكطر عسل وبهنية .. وراح اطب الكبر وما انسى فضلجن عليه ) ..
وأرجع لقصتنا وأكول لمن لا يعرف من هو بهلول ؟؟..فقد بحبشت الكم بالمراجع المتاحة ..ولكيت ..ان بهلول .. يقول البعض انه شخص وهمي ..والبعض الاخر يقول انه انسان حقيقي ..وتبقى شخصية البهلول شخصية هزلية غير معروفة بدقة او محددة بزمان او مكان معين، فهناك اختلاف كبير على نفس الشخصية وزمانها،
يقال ان البهلول هو أبو وهيب بهلول بن عمر الصيرفي الكوفي، ...ولد بالكوفة في زمن هارون الرشيد.وكان من أصحاب الاِمام الصادق ( ع) وأنّه كان يتظاهر بالجنون ( اكيد جان ملاحق سياسي وفق المادة 4 ارهاب )..وتوفي سنة 190 هـ، وقبره ببغداد ( لو اندله لجان اخذت العجوز مراتي ...هم نقرة الفاتحة على روحه وهم نوزع جرة ماي بثوابه ) ...
فهو ولسذاجته يوصف بالفطارة ( مثل ما يكول البغادة ..فطير مثل الشجر ..يحجي الحجاية ويسوكه بتبنه ) ،وهذا خلاف ما مشهور عنه انه كان ينطق بالحكمة في كلّ حين محذرا الناس من عواقب الأمور؛ ويقال إن الرشيد قال له يوما ـ عظني. فردّ على الفورـ بماذا أعظك ، هذه قصورهم وتلك قبورهم!
المهم وحتي لا اطول عليكم وادوخكم ..وانتوا ملتهين بالموبايل الكلاكسي ابو السبع ورقات ..ارجع لسالفتي ..بالسياسة ..
والله ابتلينا بلوة بالسياسة والسياسيين .. نروح ..نروح ونرجع للسياسة الملعونة ....وكال اوباما ..وحجه بوتن ..والمصيبة اجه المالكي ووياه النجيفي ووياهم الروزخون وخلو روحهم بالنص .. عبالهم احد يدير الهم بال ( مثل من شافت النملة الحمار جا ينعلوه ( يوله نعل حديد حتى لاتسوف لحوافر مالته )..النملة هم شالت رجليهه وكالت نعلوني )..
اخ منك يالساني ..ما علينه ..لا بالمالكي ولا بالنجيفي ولا بالروزخون ذوله كلهم ينتلون واني رجال فقير ..لا أروح انتل ..وتعال عمي شيلنه ..واني ما بيه حيل وتروح روحي تطلع من اول نتلة ...
ارجع واذكركم بالمقال اللي نشرته قبل فترة المعنون ( الخيار السوري ..استسلام باقل الخسائر ..او صمود انتحاري ) ومقال اخر جديد نشرته االبارحة بعنوان ( وا اسفاه ..اسرائيل كسبت الجولة الاولى )..
واليوم مقالي هذا.. حول من سيكسب المليون اي (الجولة الثانية ) من الصراع السوري الاسرائيلي ..
البارحة كلت الكم الامريكان راح يطبقون نفس السيناريو العراقي براس الشعب السوري المسكين ..الحقراء الفرنسيين ما صدكوا سمعوا بموافقة الروس والسوريين على نزع السلاح الكيمياوي ..وركض قدم مندوب فرنسا في مجلس الامن مشروع لنزع السلاح الكيمياوي السوري ..ويشترط نفس القازوق العراقي وباشراف مجلس الامن وتحت االفصل السابع من ميثاق الامم المتحدة المشؤوم والسيء الصيت والسمعة ..واللي دمر بلدنا وقتل شعبنا وضيع سيادتنا ونهب ثروتنا النفطية والوطنية ..باسم الفصل السابع هذا المشؤوم ..ويذكر العراقيين شلون نتحمل الكفخات وبرضانا .. فكل ماكان يعجب الامريكان التخلص من صواريخهم قبل ما تصير اكسباير ..كانوا يطلقوها على روس العراقيين ويقتلوهم بحجج واهية ,,,هم ياكلون وهم يكولون لنفسهم عوافي ..الما يخافون من الله
وهنا لابد لي من ان اشيد بالموقف الروسي الشريف في المجلس ..حيث رفضوا هذا المشروع ..واجل اجتماع مجلس الامن الى اليوم ..ولكن الامريكان كما اتوقع سيبقون يضغطون بحجة المهلة حددوها خلال اسبوع لازم ينزع السلاح ..
الخبراء الهسكريين يعلمون ان السلاح الكيمياوي السوري مو جديد وعمره 40 سنة ..وامتلكته سوريا لردع السلاح النووي الاسرائيلي ( 300 رأس نووي ) ..
الامريكان اليوم وتحت التهديد بالعدوان ..يريدون فرض شروط خيمة صفوان العراقية لمهينة على السوريين .. وهذا يعني اذلال ومهانة وبالاخير يقتلون او يعدمون اقطاب النظام السوري ..
ولاسيما وان الايرانيين قد تخلوا كالعادة عن حلفائهم في سوريا وحسب المبدأ القائل ( ياروح ما بعدج روح ) ..وبنفس الوقت نجد الامريكان يطبقون نظرية ( اضرب على الحديد السوري وهوساخن ) ..فحددوا المهلة باسبوع واحد ( حكم القوي على الضعيف والله ينتقم من السعوديين والخليجين لان هم طمعوا الامريكان بالسوريين )..
بربكم مصير شعب كامل ..نساء واطفال وحياتهم ومستقبلهم ..تحصر بمدة اسبوع ...اتدرون لماذا .؟؟.لان قرار العدوان متخذ ومنتهي ؟؟من قبل اوباما وربعه .. واصطدم برفض الشعوب لفكرة الحرب والعدوان ....وبدأ يكذب عدوان محدود أو غير محدود ..
ان شركات السلاح الامريكي وراء قرارات الحرب والسلام ..لقد خططت للاستيلاء على اموال النفط السعودية والخليجية التي تراكمت خلال السنوات العشرة الماضية مقابل اطلاق صواريخ التوماهوك والكروز الامريكية ..ويذلك يضربون عدة عصافير بحجر واحد ..
اولا – القضاء على سوريا وجيشها العربي كما فعلوامع العراق واخرجوه من الصراع العربي الاسرائيلي
ثانيا – تحقيق خطوةجديدة في حماية امن اسرائيل
ثالثا – التقدم خطوة نحو نزع سلاح مقاومةحزب الله الذي ادخل كمنظمة ارهابية ..ومتى سقطت سوريا ..سقط حزب لله ..
رابعا – التقدم خطوة للتخلص من جعجة النظام الايراني وكلاواته واهمها المسمى بالملف لنووي
خامسا – ادامة عمل شركات السلاح الامريكي من خلال الاستمرار بالانتاج ..لان تسليح جيوشهم الاستعمارية يجب ان يستمر باحدث الاسلحة بعد التخلص من القديمة ..
سادسا -- الاستيلاء على مليارات الدولارات النفطية المكدسة واستراجاعها من السعودية والامارات وقطر والكويت
اخواني انتبهوا لحقيقة اخيرة ومرة .. ان مات مليون مواطن سوري او عراقي او مصري فهي مسألة لاتعنيهم ..ولايهمهم ذلك ..انما المهم عندهم ان شركاتهم لاتخسر ولايموت امريكي واحد ..ويهمهم فقط امن اسرائيل وامنها والسيطرة على منابع النفط العربي ..
والاغبياء العرب وحميرهم من القادة لايهتمون الا لمناصبهم وكراسيهم وثرواتهم ..وتراهم يحثون على الفتنة الطائفية ويقتتلون على امور طائفية ملعونة وحقيرة اكل عليها الدهر وشرب منذ 1400 سنة ..
واخيرا يقول بهلول لقادة سوريا ...كونوا حذرين من الافخاخ التي ينصبها اعداء الشعب السوري ..واستفيدوا من اخطاء من سبقكم وورط الشعب العراقي ... اما كيف ..فحياة شعبكم هي اهم من المناصب لو كنتم تعلمون ؟؟
اللهم احفظ سوريا واهلها ومعهم كل العرب
اللهم احفظ العراق واهله ..اينما حلوا او ارتحلوا ..
روابط المقالين اعلاه هي مايلي
http://www.ahewar.org/debat/show.art.asp?aid=375224
http://www.ahewar.org/debat/show.art.asp?aid=377241

#نوري_جاسم_المياحي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات