مصر عاوزة عريس (رئيس جمهورية) (مقالة بالعامية)

صموئيل رمسيس سليم

الحوار المتمدن-العدد: 3691 - 2012 / 4 / 7 - 12:39
المحور: كتابات ساخرة
    

مصر دلوقتي بتدور علي عريس يووووه ااقصد بتدور علي رئيس .. بس .. يكون جدع يقدر يتكفل بيها ويكل اولادها . يا تري في حد يقدر علي مسئولية مصر
ناس كتير سحبوا استمارات علشان يترشحوا للرئاسة ... فعلا ناس كتير منهم زي الفل وميعرفوش الالف من كوز الدرة بس اهو مصر فيها رجالة وستات كمان عندهم استعداد يودوها في ستين داهية
منهم فلاحة سحبت الاستمارة اكيد كانت فاكرة انها استمارة علاج للفراخ .. ومنهم مدرس ثانوي .. يظهر كان فاكر مصر عاوزة دروس خصوصية . وناس كتيرة زي كده
يخرب بيت الديمقراطية اللي جابت مرشحين للرئاسة منهم مجانين او رد سجون او بتوع هشك بشك ... يعني بعد ما مصر كان بيحكمها ملوك وخلوها ام الدنيا ... تيجي ناس عاهات عاوزين يعملوا نفسهم رجالة علي مصر .. كانوا فين الناس دي وقت الثورة .. تقريبا ميعرفوش ان في ثورة قامت بس اهو اي هبل والسلام
الغلابة في بلادنا كتير والجهلاء برضوا كتير ... كل واحد دلوقتي بقي يتكلم في السياسة حتي لو ميعرفش حاجة .. في مركز من مراكز محافظة في الصعيد قاموا باعتصام وقطعوا الطريق علشان موضوع ازمة انابيب البوتاجازات .. والغريب مش في اعتصامهم لكن الغريب في اللافتات اللي كانوا ماسكينها كانوا كاتبين "نداء الي مبارك لحل ازمة الانابيب"
المشكلة الاكبر في الناس اللي مش عايزين يفهموا ان في مصر ناس كتير علماء حصلوا علي جوائز عالمية ومن وطنيتهم عاوزين يعمل مشاريع تنمية في مصر طبعا الجاهلين والمتخلفين هيقولوا انها مؤامرة خارجية
علاقتنا بالتنمية معدومة .. علاقتنا بالديمقراطية معدومة .. علاقتنا بالثورة كمان معدومة .. لكن علاقتنا بحجب المواقع الاباحية مش معدومة لان المواقع الاباحية بالنسبة لينا حرام ... ومش حرام الضرب والسحل والتعذيب والدهس وكشف العذرية .. كل ده مش حرام .. حرام ان البنت تطلع من البيت ومش حرام التزوير والتدليس
علشان كده بندور علي رئيس لمصر يكون عنده كرامة ويرجع لينا كرامتنا اللي اتنهبت مننا من زمان .. يرجع مصر انها تكون منارة للعلم و تكون ام الدنيا من جديد ويطورها ويكبرها ويعظم شأنها .. علي فكرة كبيرة ومحدش يقدر يصغرها الا الجهلاء اللي كل فتواهم فرض الحجاب والنقاب ومنع المواقع الاباحية ومنع الحرام وتحريم المايوهات علي اساسا ان الشعب المصري شعب عاهر بيمشي دايما عريان وسكران .
الرئيس اللي جاي لازم يكون رئيس شبعان من القيم الانسانية ومتعطش للتنمية .. المشكلة ان اللي اترشحوا وفيهم المواصفات دي ابعد جدا من الفوز لان الشعب قدامه اختيار واحد هو ياما ينتخبوا شخص تابع لتيار ديني او شخص من المعروفين ودول كانوا في حكومة الفاسد
كرسي الرئاسة عامل زي لعبة الكراسي الموسيقية ... يا تري مين اللي هيقدر يقعد علي الكرسي بعد ما الموسيقي تقف ..
الايام اللي جاية هنشوف مين اللي هيكون عريس لمصر

#صموئيل_رمسيس_سليم (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل