من ساعتها وحلفت اشرب سجاير (قصة)

صموئيل رمسيس سليم

الحوار المتمدن-العدد: 3688 - 2012 / 4 / 4 - 17:30
المحور: الادب والفن
    

كان يوم ملهوش شمس .. لما لبست بدلتي الصبح وانا نازل مقابلة مع مجلس ادارة شركة من الشركات اللي بنتعامل معاها تبع شركتي ... وبدل ما اوقف تاكسي .. قولت اجرب اركب ميكروباص زي عامة الشعب
وفعلا رحت الموقف وطبعا لابس بدلتي وفي ايدي اللاب توب بتاعي ... ولقيت ميكروباص والسواق بتاعه يعني شاب تقريبا في سني او اصغر كان واقف بينادي علي المكان اللي هروحه
المهم بصيت للسواق وسالته في مكان ... ردي عليا ايوه طبعا يا بيه اتفضل .. رحت علشان اركب وقولت بدل ما اركب قدام اكون زي عامة الشعب واركب من ورا .. لكني فوجئت ان السواق
السائق : اتفضل يا بيه اركب قدام
انا : لا معلش انا هركب ورا
المهم لقيته مسكني من الكم وفتح الباب اللي جنبه
السائق : عليا الطلاق لتركب قدام يا بيه
انا : خلاص حاضر هركب قدام (قولت كده لاني خايف علي مراته الغلبانة اللي في البيت قاعدة تطبخ وتمسح وتربي العيال وبعدين تلاقي نفسها اتطلقت كل ده علشان مرضتش اركب قدام .. المهم ركبت وانا حاسس اني متضايق وخصوصا لاني عاوز اركب من ورا لكن للاسف ..المهم لقيته طلع سجارة ودار الحوار بينا :
السائق : اتفضل سيجارة يا بيه
انا : شكرا يا اسطي مش بدخن
السائق : الله ينور عليك يا بيه .. انا نفسي ابطلها من زمان بس الزمن اللي احنا فيه الواحد لازم يشرب سجاير
انا : الدنيا صعبة علينا كلنا لكن انت حاول تبطلها
السائق : ابطلها ازاي يا بيه اذا كنت كل يوم بقابل بهايم لا بيفهموا ولا عاوزين يفهموا
انا : تمام فعلا كلام صح (طبعا قولت الكلام ده وانا مش فاهم هو بيتكلم عن ايه)
السائق : تصدق يا بيه انا نفسي ابطلها بس مش قادر .
انا : كويس انت ممكن تبطلها وتشرب اي حاجة تانية
السائق : انا فعلا ناس كتير نصحوني بكده انت تعرف مين نصحني
انا : مين يا تري !!! وانا متعجب بجد من طريقة حواره الغريبة
السائق : بنت عمتي بس هي الصراحة حاطه عينها عليا
انا : يا راجل انت متجوز وعاوز تتجوز تاني
المهم جت بنت شكلها في الجامعة وفوجئت بالسواق اللذيذ بيقولي ..
السائق : معلش يا استاذ ممكن تركب ورا معلش علشان الانسة تركب هنا علشان هي مش بتحب تقعد جنب حد ... اقولكم بصراحة حسيت ان اتكسفت جدا .. لكن انبسطت برضوا اني هقعد ورا زي ما انا اتمنيت ... بس وانا نازل قولتله
انا : هو انت كده طلقت مراتك ... لقيت ضحك ضحكة عالية وقالي يا بيه انا مش متجوز ... قولت في سري ... يعني انت بتحلف بالطلاق وانت مش متجوز اساسا دا انت واد رخم
المهم رحت قعدت وكان جنبي واحد فلاح وابنه ... ودار بينا حوار
انتظروني الحلقة الثانية .. قريبا

#صموئيل_رمسيس_سليم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات