متى تنتهي اخر قطرة نفط في العالم ؟

سوادي الناطور

الحوار المتمدن-العدد: 3664 - 2012 / 3 / 11 - 18:29
المحور: كتابات ساخرة
    

نرتاح وترجع وسائل النقل البدائية العربانة الي تجرها الحصان ويصير سعر البغل بالملاييين وما يتحصل بس نرتاح اقلها ونخلص من الدول الطامعة الي كل يوم جايينا على هالنفطات لا خلصانيين من العربان ولا خلصانين من الطغاة والدكتاتوريين , ترة النفط يطيل عمر حكم الدكتاتور هذا العراق اليوم محد اجه السواد عيون شعبه كله جذب اكو نفط ومليارات ومال عمك ميهمك, وبالمرة نخلص من دول الجوار الي ظل العراق طول عمره البقرة الحلوب انريد نرجع عالحصان وايام الفروسية والقتال بالسيف حتى بذاك الوقت نعرف الزلم الخشنة من الزلم الي بس طول وما بيهم خير وجبناء وكادرين بس عالفقير الي مالة غير الله على رأي الشاعر اسدٌ علي وفي الحروب نعامة فتخاء تنفر من صفير الصافر , وصدكوني راح كل العقد تنحل ونخلص من المشاكل ولا بند سابع ولا حصار بعد يفيد ويانا وحتى أمريكا بعد متكدر تجينا بيش يجونا بالسفن الشراعية يرادلهم فد سنة يلا يوصلون وصدكوني ماكو لا طاقة بديلة ولا هم يحزنون وحتى لو أكو متسد جشع الانسان وحب الهيمنة والتسلط وحتى ظاهرة الاحتباس الحراري وارتفاع درجات حرارة الارض تنحل ويرجع الهوى نقي , ونرتاح اقلها كم سنة مو احنا المصيبة مكروهة وجابت بنية هم عدنا نفط وهم مسلمين بذاك الوقت تخلص هالنفطات الي ما شفنا منها شي ويبقى بس الدين عود يبين بذاك الوقت الخوش ادمي من الموخوش , و وترجع بغداد قبلة العالم ودار الثقافة , والايام الصعبة الي مرينا بيها بينتلنا منو الصديق ومنو العدو ولا تجونا بعذر كافي لا نعود ولا نسامح عودوا لايام التجافي لا يكون العتب جارح على كولة ياس خضر, وصاحب الوكفة الطيبة انخلي فوك الراس والردي وابو الدكة الناقصة لا نشمت بيه ولا نذلة ومو طبعنا انذل احد بس اذا هو لوكي هاي بحثا اخر وصراحة ملينا من اللوكية ومنريد صور لاحد ملينا من الصور والتماثيل واذا خلص النفط بعد على شنو يجونا اشو العراق صاير جولة وتصحر واغلب اراضي العراق الزراعية صارت ملوحة وصبخة وكله نستورد من السعودية الخيار وسوريا الطماطة والامارات صايرة خوش بلد زراعي , هاي تاليها ارض السواد يستورد خضورات من العربان وياريت يغزر بعينهم ويستحون شوية عفية بشر ما يسد عينة بس التراب اشو حتى بضاعتهم الكاسدة ديمشوها علينا وهم يكرهونا ومخلصانين منهم اتمنى الله يبليهم ونخلص من شرهم , واتمنى العراق يصبح الصبح وما اعرف شلون و بقدرة قادر صاير جزيرة بنص المحيط الهادي يم مثلث برمودا ونصبح لا ايران ولا تركيا ولا الدول العربية و عود ما اوصيكم هم لحكونا ودزولنا التكفيريين والبهائم المفخخة من العرب الاجلاف و خرفان البادية, والعراق عيني هم يصير عنده بحر اقلها تطلع الوادم تعوض سنين الحرمان وتشوف العراقيين كلهم نايميين عالبحر ., والله منخلص تجيك قناة الجزيرة والعربية وراك وين تروح مو صرنا خوش سبق صحفي على دماء هالناس البريئة الي كل يوم يخضبون العراقي المسكين بدمه ويروي ارض العراق الي لون ترابه صار احمر من الدم وياريت مصاصي دماء الشعب العراقي يشبعون من دمه وتأثر بيهم المناظر البشعة لاشلاء الضحايا الي ما نكدر انميز بين سني او شيعي او كردي او تركماني او مسيحي , يا عراق الدنيا دوارة وما دايمة لاحد والتاريخ ميرحم ومراح ننسى كل الي مرينه بيه ومنسامح احد وماكو عفى الله عما سلف دم العراقي الي اليوم أرخص من التراب في نظر البعض هو عند الله غالي وعزيز وميروح شي (وعسى ان تكرهوا شيئاً وهو خيرٌ لكم ) اخوكم من ارض المنفى .

#سوادي_الناطور (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل