امنيات ترفض التأجيل

حامد كعيد الجبوري

الحوار المتمدن-العدد: 2934 - 2010 / 3 / 4 - 22:32
المحور: الادب والفن
    

اتمنه ارجع طفل ، ..
......موفكر
.... ثوبي جديد
وصعد أسطوح العمر...
وتشلبَه عالنبكات
ولكط بديه النجم ،
ونشدها خزامات
أمن النوم أكعد أخوتي ....
الجيران واهل الطرف
واوكف ابنص العكد....
ورسم كمر بالسمه...
يوميه ارسم كمر...
وصيح حد ينكطع....
صوتي ، اجانه العيد
.....كعدوا...اجانه العيد
وتمنه أرجع طفل...
باليمنه احط جنطتي....
وباليسره يوميتي
ومن اطب صف الدرس...
حافظ نشيد العلم ، والمدرسه بيتي
وبالليل أقره الدرس ..
والضوه...موفانوس
وكبر أبحب الوطن ...


وينترس جيبي أفلوس
وتمنه....
اتمنه اكتب شعر، أكتب شعر شعبي
مابيه وزّن للدمع ، مابيه ابوذيه
ينكط ترافه وسعد ، مليان حنيه


بيه يقره كل الفُكر،
ويحطـَه ترجيه
وكتب شعر للهجع....
ونغني نايل فرح...
...... وندُكها جوبيه
وتمنه..اصحَه الصُـبح ، ...
فيروز تندهني ....
(نسََم عـَلينه الهوه ) ، تارس أشليلـَه دفو...
(ياعليه شو حلوين)
وقره المُظفر شعر...
السُماك ، اول شطر..
والثاني قمر الدين
وتمنه...
اتمنه اقره عـُمر، واستنطق التاريخ
أشما منكتب عن علي...
تاريخه وقره النهج
وأحفظ ابكلبي العبر
كل الرعيه سوه
ويصير نهج الوفه
وميزان جف حيدر


محد آخذ وشلته ،
وذاك الاخذ أكثر
ميزانه حق وعدل ...
..وسهمه مثـل قـنبر
لاخله حارس أله ،وبيبانه متفتحه
وجدامه كلها سوه .....
العبد والاسياد...
لاخان ذمه وعهد ، لاروَّع الاسلام
ولايبني قلعة ظلم ، من دمعة ألايتام
أسس دولته أبعدل ...وحاسب رعيته أهل..
وأمن ...


.... أمن ابأهله ونام
((والدنيه ...
الدنيه تعني علي
ومتقسمَه الصنفين...
الصنف الاول غني..
والصنف الاخر علي...
وتتوازن الجفـتين...))1
وتمنه...
أتمنه يرجع علي ، ومنضيع الفرصه
ويانه يوكف سوه،ونشوفه يلزم سره ،
ويتسلم الحصه...
أبدشداشه المركِعه....
تلهم ونين الرحه ...
ويكسّمهَا للكرصه
وتمنه...
أتمنه هذا الشعب يفتحها للعينين
ويحفظ درس كربله،ويدز رسايل عهد...
منبعها من الكلب ...ويلكاله مثل أحسين


حاجز الخوف أنهدم وتفلشت أوهام
خلونه نبني وطن ، مايعبد الاصنام
وبالكلب..
بالكلب نزرع شجر ، وتظلله النخلات
قداح هيل وعطر....
ونشيل فاس الوطن..
ونكسِّر الصبات
وتمنه...
أتمنه عندي جنح ، طيروأنوش الغيم
ونهب حبيبي الفجر، وصعد الكردستان
ورجع توالي العصر
بالبصره ، أعقد مَهـر
وشهود شط ، العرب ..


والثاني أبو (غيلان ) 2
واخِر أماني العمر...
أخر أماني العمر، وهلا يجيني الموت
أبني يعز بالوطن ، ميبلعَه بطن الحوت
يكسر رصيف الصبر، مـيـبيع جنبر عوز
والكصه غيرة وطن ،والوطن منه يجوز
وعالظلمه...
عالظلمه تطلع شمس
بس مره تطلع شمس
ويصير عندي أبو
أيحبني ويحب أخوتي.....
بيرغ هلي وديرتي
ويتنفس أبريتي...


ويصير خـُلكـَه فـُضي .....
ويشيل عني أذنوب
وأيده النزيهه يمد...
وبهدومه.....
بهدومه ماكو جيوب
...بهدومه ماكو جيوب
*******

1 : أسـتفـا ده من شاعر الفصحى كا ظم الحجاج
2 :أشا رة لـلراحل السيا ب

#حامد_كعيد_الجبوري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل