ارتاح وخليني فكر

محمد زكريا السقال

الحوار المتمدن-العدد: 2792 - 2009 / 10 / 7 - 05:16
المحور: كتابات ساخرة
    

منذ فترة ليست بالقصيرة وأنا على اشتباك دائم مع هذا الوطن، يا أخي تعبت لسه جالس على ظهري ومطبق على صدري لدرجة لم أعد أعرف نفسي الجاحظ ,واللا أحدب نوتردام، وهو ما بيخلص من النق والزن على راسي كل يوم. مزقوني بالعراق، اغتصبوني بفلسطين، مرمروني بلبنان، شلخوا شعري بالسودان، داسوا علي باليمن، سرقوني بالخليج والسعودية، وانا ما بصدق وبنط مثل القرد وبرفع هالراية وبوقف على أول شارع بألمانيا. طبعا كثير مثلي معترين وخلقهم ضيق بيحملوا الراية وبيوقفوا بالبرد بالجوع ما بتفرق ... المهم الوطن وقضاياه وصوته اللي لازم يصل لكل المحافل الدولية والعالمية. والله صار الواحد منا اختصاص بالمنظمات والمؤسسات الدولية والعالمية، الأمم المتحدة، مجلس الأمن، المفوضية الأوروبية، منظمة العفو الدولية، اليونيسكو، منظمة الصحة العالمية، مؤتمر القرن الافريقي، ومؤتمر دول أمريكا اللاتينية، والمؤتمر القومي العربي، ومؤتمر الصحة العالمية، والمؤتمر الاسلامي، ومؤتمر اليسار اللينيني، والماركسي، والماركسي القومي، وعد قد ما بدك، وكلهم ولاد حلال وبيعرفوا قضيتنا وحافظينها على الغيب، لدرجة أنه صرنا معهم صحبة وبعد شوي بنصير نتعانق ونتباوس لما بنطل عليهم يا سيدي ويمكن يصيرو يقدمولنا قهوة وشاي، حتى سمعت اقتراحات إنه لازم يبنوا مظلات كبيرة نتآوى تحتها اتقاء الريح والمطر والحر وتقلبات الطبيعة.
خلص بيكفي، والله اللي صاير فيك بيعَّلم الحمار والحيوانات، شوية ذوق، معقول كل يوم بتطلعلي بمشكلة، لك شو ناقصني أنا. لك كفرتني، لك هاي فلسطين عفنت وهي واقفة فوق راسي وصرت بشوفها بمنامي مثل الكوابيس، وسلاحي اللي طل خجلان من حاله. لك ما تركوله منفذ صرصور. بعدين دخلك يعني ما انت بتعرف انه ميت مبَخِر ما بيلحقوا على مفسي واحد، وشوف كم مفسي عنا هلق.
بعدين دخلك مع مين بدنا نحكي بها الوطن، مو لازم بالأول يسمحولنا نحكي، وثانيا مع مين! مع أي عشيرة أو طائفه أو حزب أو مذهب، العمى بتتطلع بالخريطة مثل القمر مقوس وممتد وكبير، بس مو قادرين نتحرك بمتر مربع من كثر ما فيه عسكر وحواجز وحدود خايفة على الوطن ،و يمكن منا.
أخي الوطن... يا بوبو عيني انت... والله إني بحبك، بس يعني بلا مؤاخذه مو مطلوب منك شوية حب وطراوه حتى نعرف اللي إلنا واللي علينا. الله وكيلك وكيل السما والأرض كله علينا. شوية ذوق شوي.... يعني أنا بعرف وطن مشكل من تضاريس ومدن وقرى وفيه بشر. والله بحبهم كلهم وبدي عيش أنا وياهم نتقاسم المرة والحلوة، ونستعيد كل هل الأرض المغتصبه ونعمل وحدة ونصير ناكل ونشرب وننتعشى ونطل على ها الدنيا الواسعة ونشوف شو صاير وكيف الناس بتحكي مع بعضها وكيف بتنتج. لك العمى فيك لغاية الآن متمني تنتج إبرة، بعدين شو كيف انت وطن؟ وطن يعني ناس عايشه مع بعض بيعرفوا شو بدهم وشو مطلوب منهم! لك العمى شو هاد... شو اللي صاير؟ ليش ما حدا بدو يعيش مع حدا. وشو هل ماركات اللي طالعة عندك والله بتوزع فرق وطوائف واقليات على العالم، كردي، أمازيغي، أشوري، مندائي، عروبي ناصري، عروبي قومي، عروبي قومي يساري، عروبي حاف، عروبي مشَّكل، مسلم سني، ومسلم شيعي، ومسلم وهابي، ومسلم اخوان، ومسلم تحرير، مسلم على طريقة البنى، ومسلم على طريقة قطب، ومسلم على طريقة ابن لادن، ومسلم ما حدا سلمان منه، وأباضي وحيدري وأحمدي. والغنوشي ، والترابي ، والقرضاوي ، والطنطاوي ، وابن باز ، وابن جبرين .
هات لشوف يا سيدي الوطن ، شو بساوي يعني أنا، كيف بجمع ها الشظايا هاي وكيف بحرر...وليش انت راكب على ظهري ومدندل رجليك.
الله بيعلم قديش بحاول أهرب منك، بس يا أخي انت عينك قوية وما عم تخجل كثير بحاول خجلك،بس شو الفائدة لزقة ، لذلك اشتريت مراية منشان تشوف حالك، بس مافي حدا هون. بقلك صرت سلطة ما بتسمع، وبتظلك توِز وتنق، ومن الواضح إني أدمنت عليك...وحياتك أدمنت عليك. بس والله ما عندي إلا شوية ها العقل وها الكندرة عتيقة جربانة فا ألله يخليك لا تطّيِر اللي بقي من ها العقل والكندرة رح أرمي فيها كل المسؤولين عن خرابك وتدميرك، ارتاح بقى وخليني فكر.

محمد زكريا السقال

#محمد_زكريا_السقال (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل