ليلة القبض على خلف الدواح _ 2

ناصر الياسري

الحوار المتمدن-العدد: 2709 - 2009 / 7 / 16 - 09:08
المحور: الادب والفن
    

أقنعت صاحبي خلف الدواح في سرد رواية بأتفاق مبدئي ينص على ( الخمر مقابل السوالف !! )
فعاد مره أخرى يحكي لي قصته قائلا
_ طركاعه عليكم يالساده .. تعرف شلون تكمشوني من ايدي المكسوره !
فأجبته بتودد
_ أفه عليك يخلف غير انته أخوّي ودافنين سوّيه !
فراح يتسائل :
_ ما تكلي وين وصلت بسالفتي ؟
_ وصلت من جنت تاكل الأخضر واليابس !
_ بسراحه وصلتني أهواي طلبات من بعض الاصدقاء في بعض المحافظات بخصوص فتح فروع فيها بعد النجاح المنقطع النظير لهذه التجربه في محافظتنا المقدسه وكمت وأسست شركه بأسم ( شركة بركات أهل البيت للخدمات الخاصه ,,, شركه مساهمه محدوده وخليت 50% من الأسهم بأسمي و 25 % بأسم شنونه 25 % خمس للساده
_ و الطلبات هذي من اجتك ؟
_ كاكه شيرزاد خابرني من اربيل !
_ شرزاد هذا منو ؟
_ هذا مستشار ...... لشؤون الاستثمار لكن ما أتفقت وياه لأن شروطه ان تكون ...... نسبة ارباح لا تقل عن 60% من حاصل المشروع وهو غير مسؤول عن الخسائر !!
بعدين خابرني كاكه زوزك مستشار ........ وجان متواضع في طلبه حيث طلب ففتي ففتي بشرط تكون لكاكه زوزك الأولويه في الطلبات وحرية الاختيار !!
_ شنو يعني ( الأولويه في الطلبات وحرية الاختيار )
_ معناه فلوس العقد والمهر على حسابي !!
_ وانته قبلت ؟
_ عمي شلون أقبل .... اذا يوميه يريد عشر نسوان ... تريدني أطلع كسر
لكن مستشار وزير التجاره لشؤون المرأه عرض عليا خوش عرض
_ مستشار وزير التجاره لشؤون المرأه ... هاي شلون دبرتها ؟
_ اسمع العرض مال المستشار ومالك غرض .... كال آني أجيبلك بنات من سريلانكا وياّ شحنات جاي البطاقه التموينه بصفة عاملات بشرط ان تكون لي نسبه 30%
آني قبلت بسراحه لأن الشغله مربحه لكن خفت يجيبلي بنات أستوكات لو الأكسباير مالتهن منتهي مثل شغلة جاي الحصه ... على اي حال اتفقت وياه على اول شحنه تجي بالبواخر مع الحصه التموينه ... ما اجذب خبر من وصلن لميناء البصره خمسه منهن حبلّن بالطريق من وره البحاره الهنود والخمسه الباقيات اعمارهن فوك الخمسين وخمسه منهن بيهن آيدز. كمت وعاتبته المستشار كّتله مولانه هسه قبلنه بالمواد الفاسده والمسرطنيه فوكاهه مستورد الآيدز من لعنتله على بو خيركم ويابو وزيركم . كام وحلف بقبر ابو لؤلؤه بأن هذه الشحنه مومالته مالت الوزير المستقيل واخوانه ... على اي حال خسرت بالصفقه بدفترين !!
_ يلّه خيرها بغيرها !
_ لا سيدنه رب العالمين ما يكطع بعبده ... ذيج الليله لن صاحبك علي بديوي يخابري وراد مني ان افتح فرع بالبصره !
_ علي ...... هذا يا هو ؟
_ صديج عبد الله ......
_ ولك الأول قابل عرفتا حتى الثاني تريدني أعرفا ؟
_ شنهي السالفه سيدنه علاوي وعبودي يشتغلون اعلاميين بأذاعة المربد بالبصره .. وسألوني عنك !!
_ على اية حال أكمل سالفتك
_ كول رحت للبصره ... وشفت الجماعه ومكانك خالي على ذيج الكعدات الحلوه والّدك والركص والمشروب للصبح ... يوم الثالث كمت واجّرت مكتب وفتحت فرع بالبصره والجماعه ماقصرو
اذاعة المربد سوّت دعايه للمكتب مجانا . الشباب علي بديوي وعبد الله المنصف جابو زبائن . خصم الحجي المكتب كام على رجليه خلال اسبوع ... وآني ما جذبت خبر كمت وعلمت علي ..... وعبد الله ..... اصول الشغله وانطيتهم ربع بالوارد ورجعت لأهلي !
_ شني ... الجماعه لكفوا الشغله بالعجل ؟؟
_ بسراحه سيدنه يمكن عدهم خبره متراكمه .... عمي أسباع ما ينكحمون !
_ ولك خلف أشو طالت عليا السالفه ... أريد الزبده ؟؟
_ سيد لا تستعجل .... أجتك الطركاعه .... قبل اسبوع من الكبسه خابرتني صاحبتك أم منتظر
_ أم منتظر منو ؟؟
_ صدك جذب سيدنه .... نسيت جماعتك بالعرصات
_ منو أم كوركيس ؟
_ أي .... هي وبناتها سيمون وداليا
_ لعد أسم ام منتظر شني سالفته ؟؟
_ عمي للتمويه ... غير جيش المهدي يركضون وراهم وخطفو زوج سيمون ولحد الان محد يعرف شي عنا .... خصم الحجي أجت ام كوركيس وبناتها أشتغلن وياي بالمكتب ... وره يومين شافهن شيخ فرهود ولزك لزكه كال الا اريد تعقدلي على ام كوركيس .... أم كوركيس ما جذبت خبر قبلت من اول حجايه !!
_ جا الكبسه يمتا ؟
_ أجتّك ... من كبسو عليك نار جهنم ... فد رايد كسران الركبه ... ما تكلي شلون راح تكابل ربك بياوجه ...؟؟
ذيج الليله أجاني شيخ فرهود وكال يخلف تريد الامام المهدي (عج ) يعّجل بظهوره حتى يملي العالم عدلا وقسطا
كتّله سلام الله على الامام جا ليش اتأخر مو الدنيا انترست جور وفساد وجنا ننتظر الفرج بعد صدام .... اشو الساده طلعوا اظلم منا ... ما تشوف الكتل على الهويه والتفجيرات والتهجير وكّسمو خيرات العراق على عمايمهم ... هاي ألك وهاي ألي ... وبعدين يريدون تقسيم العراق هذا اقليم الشمال وهذا اقليم الوسط والجنوب وهذا اقليم ابو ريشه
جا كل هذا الجور وبعده منتظر ... ما تكلي شيخنه الامام شمنتظر ؟
كال شيخ فرهود ... شوف خلف يبن دواح احنا مجموعه يسمونه السلوكيين وحنا نحاول التعجيل بظهور الامام من خلال ممارسة الفجور بكل انواعه ومنه حفلات الزواج الجماعي وتحليل وطىء الغلمان بحيث كل واحد لو كل وحده يجّامعون براحتهم !!
سيدنه بسراحه آني اخترعت من هاذ الحجي ... كلت شنونه يجامعها واحد غيري .... شلون يصّير؟
على أي حال شيخ فرهود أقنعني بالموضوع ...وكال ذبها بركبتي
واني رحت وعقدت على سيمون بنت أم كوركيس
اجا الليل وشيخ فرهود جّمع جماعته وكل واحد جايب وياه وحده أمبركعه ما تنعرف زلمه لو حرمه !!
بعدها راحو يحششون هّما ونسوانهم وبعدين طفوا الكهرباء وصارت الهوسه والناس زلم ونسوان عرايا .... ناس تجر ناس والصراخ واصل للضالين
يسيد ..... صدك بجذب لنّ شنونه تدفع الباب وتدخل علينا وفتحت الضو وجان جايبه الشرطه للبيت ..... خصم الحجي اخذونا عرايا لمركز الشرطه لكن شيخ فرهود جان صاعد فوك السطح ونايم يم غلام وفلت من التوقيف
آني كلت يوم يومين وينتهي الموضوع .... لنّ الشغله طالت اسبوع أسبوعين شهر شهرين
أخابر الجماعه ولا واحد بيهم يجاوب .... لا حجي قلي .... لا شيخ فرهود ... لا علي كبابي
كلهم تبرو مني .... ولا واحد شريف أجه شافني
لا تكلي ولا أكلّك ...... ونام ثلث تشهر بالتسفيرات
وما طلعت الا بعد فرقوا الدعوه وانطيت عشر دفاتر للمحامي وعشره للجماعه وطلعت بحجة ألأشتباه !!
_ وباقي جماعتك ... وين صارو ؟؟
_ الشرطه جاي يحلبوهم حلّب ... واحد واحد !!
_ ومرتك شنونه ؟
_ أخذت لجوء من القنصليه الأسرائيليه بالمنطقه الخضراء !!
أنتهى
ملاحظه /
قصه حقيقيه حدثت في زمن الأحتلال الأمريكي الأيراني للعراق

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل