إمعاندين ... إهنا إنعيش

رياض النعماني

الحوار المتمدن-العدد: 2513 - 2009 / 1 / 1 - 04:06
المحور: الادب والفن
    

إنهم ما زالوا حراساً أصلاء لفكرة الحلم , و الوجع الدهري المرير

عدنان منشد , منذر الجبوري , كاظم غيلان, ريسان الخزعلي, يوسف المحمداوي

محمود النمر , مازن لطيف, علي حداد , ستار الناصر , أبو شموس , حسين حسن

ليل .....

هذا الصبح

و إحنا مساهرين

إمرايه سوده الشمس ,

والعمر الخلص كله خسارات و حنين

وإحنا لسا معاندين

إعلى الخسارة إمراهنين

ترحل الدنيا بمدنها .... بليلها , و جيوشها

و إحنا على الما بقى شي

باقيين

إمعاندين ... إهنا إنعيش

إهنا إنموت

إمعاندين

الأرض هذ .... مو أرض

هذي سماوات ,

و درب

يوصل أل ( الله )

نمشي ويه الموت ... رَوضناه و صار الموت أحلى

إنموت لعيون النحبهم

للتراب البي ربينا

للوفه ,

و للزاويه ... اليومية

يومية تلمنا

إحنا من هالزاوية إنحارب خراب

أيامنا لسوده و ندافع بالحلم , و الكاس

على آخر حجر

إحنا كلما طاح و احد ... نكثر

ويكبر كمر

إحنا من هالزاويه أنحارب دول و جيوش

قذرة

شلنا رايات الحلم , ....و الشوك

مجَدنا الأغاني

و بالزراك البل أدين

و بالغصون

وبالغبار البلوجوه

إنكول كلشي

ونفضح النواب

و السلطة المزوره

إنغني و الأغنية يا خويه عراقية و حنينه

و حيل سمره

نهبوا ,

و باكو شوارعنا و ليالينا الحزينة

إتضيك دنيانا..... و نوسعها بسهر

و بدفو

وحب

و الظلمة تضوي

إنت لو تدري العراق إشلون راح ايكوم

راح إشلون يدوي

إتموت دنيانا بيدينا .... و إحنا فوگ الفوگ نضوي

على إعناد الباعوا الدنيا بكراسي , و على إعناد جيوش قذره

إمساهرين ....

وكوسنا, وإحنا و خسارات العمر و نغني

لأيام الصداقة

وع الخسارة إمراهنين

على هذي الزاوية السمره ,

الحنينه إمراهنين

إعلى العراق البيه تتنومس , و تتباهى السنين

إعلى المحبة ,

و زهوة الشعر العراقي

وع العذاب

نرفع (( السياب )) رايه بوجه كل هذا الخراب

إتشيل كل هذي الجيوش

إتشيل كل هذي الأرض

وإحنا نظل إهنا

ويظل هالتراب

#رياض_النعماني (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل