رسائل الى الكبير مظفر النواب وغيره من الشعراء

جبار عودة الخطاط

الحوار المتمدن-العدد: 2455 - 2008 / 11 / 4 - 04:30
المحور: الادب والفن
    

مكاتيب
رسائل الى الكبير مظفر النواب والى غيره من الشعراء
( وهى بالاصل مجموعة شعرية تحت عنوان – مكاتيب - )
ماأجمل الشاعر الذي ينزف شعره الصافي بعذوبة تأخذ الالباب وهو ينثر فوق أغصان ارواحنا المتعطشة ندى إبداعه في صدق فارع و (كذب فني )أخاذ وما أبشع ( الشاعر ) الذي يجثم فوق قلب المنصه ليبصق شعره الفارغ من فم إستمرئ الدونية والابتذال !
______________________________________________
* في البدء لابد أن نلقي نظره شعرية على حقيقة الشاعر وكنه القصيده ومحاوله إكتناه الخيط السري الذي يربط بينهما بوشيجة من نور قوامه الالم الجميل والمخاض النبيل وبعدئذ يصبح من اليسير علينا تذوق رحيق الشاعر الحقيقي والقصيدة التي إستلهمت غنجها وعنفوانها اللذيذ من أثيرية الشعـر 0
جبــار عودة الخطاط
* الشـاعـر :
عشكه
لاوراقه عجيب
وموعجيبه لو حمد
اتغزل بوجنات غيده
عيد عده
من تغازل روحه
جنية شعرتضحك بهيده
لو رسم عالورقه
مرجوحه شعر
والمعاني عالورق تنزع هدمهه
وتلبس ابفرحه النفانيف
الجديده
المعاني تلعب
وتركص ابعيده
كلبه ابيض
من بياض اوراقه لحتضنت
تقاسيم القصيده
يعيش هم الناس كلهه
وبوجع كلبه ابد لا ما يحس
يرّكب اعيونه تراجي للشمس
يريد شمس الله
تطش اخيوطهه
شوباش
وتبرعم عرس
يريد كل الناس
تصفه إبسفره وحده
وتنسه امس
يسكي ابد معاته شتلات الوفه
ويطرد ابشعره خفافيش النحس
يريد يمسح
كل هموم البشر بيده
لو عصر كلبه
ونبع من جفه
ينبوع القصيد
* القصيــده
تكتبني القصيده
واجمد بنار
وتطك بجتافي اجناحين
طيرورافك
اطيور المحبه
بصبح الاشجار
ويا طبعهه ياغزل هاي الطيور
كلوبهه
كلش جبيره
اجسامهه كلش ازغار
يا غزل هاي الطيور
ياطبعهه
إشكد بريء ..
شكد حلو ...
ابيض مصفه
مو مقنع
عشك شفاف وفلا يعرف اسرار
***
ياعشكهه
شعر اخضر
والسمه صارتله ديوان وجريده
والمعاني والصور
كلهه جديده
ومني شهكت
روحي من شافت ربعهه
العصافير السعيده
شهكت الروح بطبعهه
وصاحت اعيوني
ودمعهه
الله شكرا
ياقصيده
***
القصيده
تطلع احديثه شفافه
اتحف هدب كلبي
بترافه
وعفه كلبي مدري شنهو يصير بيه
بيوم تكتبني القصيده
بلا كلافه 0


( الرســـائل )
1 0 الى المبدع الكبير الرمز مظفر النواب :
ياريل وصل حمد
مني سلام وشوك
كله الشعر ياحمد
الصايته ايلوك
ياملح شعر العرب
يلشعر راسك شلب
سافر ابجسمك سفر
وروحك تظل ياوفي
مشتوله وي الكصب

***
ياطير من ينذبح يجفل
يغرّد تعب
يسكّت اغراب النعب
رفة إجناحك سحر
رفة إجناحك شعر
عندك قصايد نوك
عندك فخاتي شجن
عَ النجمه غنن فوك
عَ النسمة ناحن شوك
***
آنه ارد اروح الحمد
ماروح انه الغيره
وأحجيله 00
صارت صدك
وباعوني إبليرة
والليره طلعت شبه
واشتعلت الحيره
والناس تنطر حمد
يرجع بريل السعد
محمّل اشعار ورد
ويكحّل الديره
انه ارد اروح الحمد
ماروح انه الغيره
***
ياريل وصّي حمد
خل يطوي ليل السفر
ويجمع تصاويره
ياريل شنهي العذر
ماتعباه السفر .. وهو
بجحيل العمر
والدنيه فريره
***
ياريل بلكت تمر
توصّل سلام الشعر
وبوساتنه إبكجه
ياريل اوصل حمد
ياساحر الحسجه
ياريل لا تشتمر
اضلوعي الك سجه
***
( ياريل صيح بقهر
صيحة عشك ياريل
هودر هواهم ولك
حدر السنابل كطه)
ياريل خاف إتعثر
بخيال ذيب السطه
اليحوف نص الليل
ياريل حّمل نده
من هور الغموكه
واخذ الجفن لو رحت
سويه غلك فوكه
وضم النده والدمع
الحوشيه لتبوكه
***
الشعر عندك وطن
والوطن عندك شعر
الوطن عندك جرح
الشعر كمر الصبح
والشعر كيمر ملح
عالناس خضر ضوه
فتّحت باب الشعر
خليته يشتم هوه
حسيت بيه مخنوك
خاويته من الزغر
وكل ساعه بيه محروك
الشعر عندك شعر
يجري بسواجي الفجر
وعد غيرك اصبح سوك
***
ياحمد هلبت تمر
ويشتعل بينه الحيل
وإنرد ندك اكهوه
ويرجع يشمنه الهيل
مر بينه مره حمد
وصافح صبحنه اريوك
ياريل بلغ حمد مني سلام وشوك
2 الى الشاعر البهي الراحل كزار حنتوش :
يسأل
عليك الجسر
والماد إيده إبقهر
يتناك
صبح وعصر
يسألني شنهو الصار
يسألني
وين الشعر
يسألني وين إكزار
معقوله تصحه وتهج
00 تنفطم من السكر
تنثر إنجوم العمر
إبروجات شط السمه
وروحك غدت طشّار
00000
معقولة يمشي إكزار
ويعوف بت الزار (1 )
رسميه
والاشعار
وضحكاتك إبكل كتر
مشتوله وسط الدار
00وأوراقك الما هدت
ليل
وإنس تذكار
ويا ليلك الدوّخك
ياليل
شنهو الصار
إسألته شنهو الصار
جاوبني
صارت صدك
وسواهه بينه إكزار
هد روحه من الجسم
وإضلوعه
صـارت بلم
وإتعله راح وطار
راح
وطار00
طـار 0
3 0 الى المبدع المدرسه عريان السيد خلف :
ردي ردي
يا قصايد أبو خلدون الي فتحت
كل شبابيج الكلب
وغنّت بنص كلبي نسمه
تاخذ بروحي وتودي
ردي ردي 00
ردي خلي الدنيه بيهه
وبمسير الليل تحدي
ردي خلي ( كمر ديرتنه * )
يشكبن بالمواويل وعلينه
بيهه كل ساعه يبدّي
ردي ردي
يا شعر طرزه السيد 00
فوك إخدود الورد
ينكط ترافه إشكد ترف
الله لو صار الزلف
مرجوحه تلعب بالهوه
إتغازلك سيد خلف
تغمزلك إحديثة ضوه
000 وبمراسيل الغزل بالهوى أتودي
ردي ردي
ردي ردي 0
04 الى المبدع الجبل كاظم إسماعيل الكاطع :
شنهو العمر إبلا شعر
شنهو العمر كلي إشيظل من العمر
لو زعل
لو ( غاب الكمر * )
لو ( شمس بالليل * ) الضوّت
إتغيب و إتطرّك ضواهه
وتمشي لا حس
لا خبر00
جا منهو غير الشمس
لو غير الكمر إيكوم ويشيّع إبحركه
من يمر ( نعش النهر * )
متكلي لو راح الكمر
إشلون نتنطّر إبلهفه ( العيد أبو إهلالين * )
إيدك بابنا00
او نلبس إهدوم الشعر
05 الى مجنون الحلة والشعر الطفل الكبير موفق محمد :
بعدك إمبربع بالنهر
بعدك إمسودن بالنهر
كالو تزوج روجه من روجات نهره وصار
مجنون الشعر
كالو عشك
كالو شهك
كالو غرك
كالولي أمك يافحل
كالولي أمك ياطفل
جانت ترضعك دوم وبوكت الفجر
مميه من مي النهر
00 ومكمّط وبيهه إسكرت
مي النهر عندك عرك
وشبّيت مجنون الشعر
كالو عشك
كالو غـرك
0000
يا كيمر الحله الصرت من طينته
دمك حليب
وخضّر الكيمر على راسك شعر
6 0 الى الشاعر الشفاف رياض النعمـاني :
شِعر أبيض
وشَعر أبيض
وغابـه من ضي
الجنوب
بيهه
غزلان الشعر
تلعب وتركض
بيهه
دمعـات السحر
تضحك وتلمض
نخلــه
تعبّهه العراق
إعثوكهه
إفراكين بيهه
الوجع يتلتـل وينبض
00000
شعر أبيض
وشعر أبيض
وكلب أبيض 0
7 0 الى الشاعر المبدع المتأمل جمعه الحلفي :
مليت
وشمليت 00
ياطير وتعنّه إلديرته
وطش عمره لحديثاتهه من السمه
وجكليت
ومن رديت يلكضيت
حفنه إسنين عمرك بالبعد
شايل الثوره وياك
شلتهه إبجنطتك
وسط الكلب ضميت
و من رديت
جنت تايه 00 صرت منفي إبنص البيت
وأضن لميت خطواتك
عليهه أتحسفت وأبجيت
آني الجيت والما جيت00
وأهيس إتكلك الجلمات
مخنوكه أبهوى العشاك
أنه مليت
مليت 00
و إشفافك تصير إعيون
تبجي إشموع
تضوي إدموع
في إتصير للجلمات
ترد مليت انه المليت 00!
8 0 الى ( الشاعر ) الذي أنتقد شعري لانه بنظره ( فبلم تراجيدي ) :
يا دمعتي إمجكنمه ومعتبره
يا دمعتي مزنه تصعد
تسكي غيم الناس
من جفني الجره
كبل ما تلبس ضحكتك قندره
يا دمعتي
لو شفايف عيني بيهه مره تبسم
00 إتهب تجي كل العصافير البريئه
تصير جدامي سره
9- الى الحاضر الغائب أبو سرحان :
تابط شعرا...
..وراح
اتسلق ارموش الشمس
من مشه ابدرب الصباح
وصاحت الناس التحبه
دير بالك
دير بالك
وين رايح
وفاج روج السمه ما همه الصياح
وكام يصعد
صار من الشمس يكرب
جان عن الكاع يبعد
لاجن إبدربه العجيب
إعترضه إغراب اسود
اغراب بس صوته غريب
جان لاهو فحيح
ولانباح
وكف جدّام الغراب
طكّه ابو ذيه جريئه
وشهر اوراقه البريئه
جا نت اوراقه السلاح
سلاح ينكط عطر وردي
رازقي وجوري ..
قداح
وفجاة الغراب داخ
ومن سماه العالي اطوطح وطاح
وراح طاير ..
طاير اعل بساط جني
وصعد ادربه يغني
00 بصوت حني
( لوليله فتح طفل .. ياروحي عشك الراح
عشك الراح
ودمع التبرزل عسل ,,وعثوكه ما تنلاح
ماتنلاح )
ما تنلاح ..
ما تنلاح ..
... رسم ابكلبه خريطه
للعناوين اليحبهم
للاعزاز الي اكل جدمه دربهم
حجي زاير الدويج
وابو معيشي
وابو سرحان وحسبته
وغني محسن
اوعصاميته الخطيره ..
جانت الناس التراقب
عينه تنشد ابحيره
وين رايح .. وين راح
شافته ركّب اوراقه
فوك جتفه
وصارت اوراقه الجناح
وطار مسعد
وكام يصعد
وصار ابعد
ابعد .. ابعد ..
ونزلت من اجناحه الابيض
قطره حمره
وخضرت
بجفوف ربعه
قصه مكتوب بجراح
***
تابط شعرا ...
... وراح
راح .. راح


10 0 الى الشاعر الشهيد غني محسن :
صدك إتروح 00
صدك اتروح
وتصير ابعيد 00
تعوف اعراقك المزروع
وسط الروح
صدك تروح
مثل عود البخور الينطفي
وينشر عطر مجروح 00
مثل عود البخور
الطول عمره يحترك
وبهمه ابد مايبوح
يلكلك غني
بس ماملكت إفلوس
جنت عندك قصايد
بالجمال اصروح
يلحنيت بيبان القصيده
بدمك المسفوح
يرويحة حلال ومن يطكهه الضيم
تسكر بالحلال
وكاسهه من فوح
ياناي الجنوب
وطيبة الملحان
ياابن المدينه
الخضرت شجعان
صدك تروح
ابعيد
ابعيد
يافنان
وتعوف اعراقك
المزروع وسط الروح
صدك تروح
مثل طير اليفرفرح
من يغرد
عالوطن مذبوح
صدك تروح 0


11 0 الى شاعر القضيه جواد الحمراني :
جواد عايش
شعجب عايش ؟!
وإنت تدري الدنيه صارت
غابه مزروعه شعارات وكلايش
والمصيبه هواي ناس
00 اليوم إتفلسف مصايبهه ومصالحهه
إبمسدس محشو
دي ي00مقراطيه
لو رادت تناقش
بعد أخوك شلون عايش !0
12 - الى جوقة الشعــ00 من (فرسان المنصه ) الذين خطفوا ساحة الشعر الشعبي :
جنت أضنه
بعيني بستان السحر
بعيني بستان الشعر
بيه اوراد ومراجيح وثمر
وبيه اوراد وعصافير وقصص
جنت اضنه
بعيني بستان السحر
بيه يتشابك خرير الماي
وي خصر الشجر
من تجي الاشجار مشتاكه 00
إلنجمات النهر
وسط كلّه إخيوطهه من الفجر 0
لكن الغصه الجبيره بدت
من طبيت جوه
طلع مو بستان اخضر
طلع سوك 00 شلون سوك
اتقاسموه
وفرهدوه
كلمن امكوّر
على ورج وحصص
واليريد يفوت بيه
اليريد ( يبيع ) بيه
خلي ينزع كصته من راسه
ويظل إبليّه كصه
حته ايحصّل على بسطيه
تتسمه جذب عدنه منصه
جنت اضنه بعيني بستان الشعر
بيه اوراد وعصافير
وقصص
طلع يا وسفه طلع سوك الكصص 0


13 0 الى الشاعر المهرج وبطانته من ( المصفكجيه ) :
بديوان الشعر
أكو شاعر وشعّـار
وبين الشاعر وشعّـار
محيطات
ودول
وأنهـار
بين الشاعر وشعّـار
شعارات
وصور
وأشعـار
حد مد البصر
ماتدركـه الابصار
حد وفاصل وعنوان
جبييييير بكد
نزيف إعراقنه المحتار
الشعر نخله
وحلو كلبه بياض الفن
من يثمر جرح جمّـار
من يثمر شعر جمّـار
والشعّار
يطك وسط الورد صبّار
من يلبس قناع أزهار
الشاعر ناي
والشعّار طبل أجوف
نشاز ويطرب الغربان
لو هزهه نهيك إحمـار 0


[email protected]

*العبارات الموضوعة داخال قوسين هي عناوين المجاميع الشعرية للشعراء موضوع القصيده 0
( 1 ) بت الزار : المقصود زوجة الشاعر الشاعرة الرائعه رسميه محيبس زاير أي بنت الزائر

#جبار_عودة_الخطاط (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات