بطاقة تموين

أحمد سعد عبيد

الحوار المتمدن-العدد: 1756 - 2006 / 12 / 6 - 11:35
المحور: الادب والفن
    

بطاقة تموين
أنا: بطاقة تموين.
النوع: دعم جزئي.
مشكلتي إني صاحبة رأي وهو ده اللي جايبلي الكافية لأني بقول ( أن يصل الدعم لمن لا يستحق أفضل من ألا يصل الدعم لمن يستحق ) مش فيزياء هيه دقق فيها وأنت تفهمها أنا قلت الرأي ده بمناسبة إنهم قرروا يعدموني ويستبدلوني ببطاقة الكترونية اسمها بطاقة الأسرة هما مين هما دول يعني الحكومة ايوه الحكومة اللي بتعمل إصلاح اقتصادي و عاوزة تعمل الصح للناس والصح ده وجهات نظر وده طبعا صح لأنه وجهة نظر الحكومة وعشان تعمل إصلاح اقتصادي صح بصت وشافت في الموازنة العامة للدولة لقت حاجة في الأموال اللي بتصرفها الدولة اسمها الدعم ولقت إنها بتصرف كتير علي موضوع الدعم ده ففكروا ووصلوا إلي إنهم يخفضوه بس أزاي ده الناس تهيج عليهم فعملوا شعار( وصول الدعم لمستحقيه ) وعملوا جمع بيانات للمستفيدين من الدعم السلعي يعني الناس اللي معاهم بطاقة تموين وعشان الناس بدأت تتكلم علي إن الموضوع غرضه هو إخراج اكبر عدد من المستفيدين من الدعم السلعي فطلعت الحكومة بفكرة إن اللي معندهوش بطاقة تموين وعاوزها يقدم عشان يعملها يعني يكون فيه مستفادين جداد من الدعم بس الحقيقة بتقول إن لو مستفيد واحد جديد دخل هيكون فيه ميه خرجوا وكل ده عشان تقل المصروفات في الموازنة العامة المهم أنا قلت رأيي ده ورحت علي مكتب التموين اللي أنا تبعه وكان ماسكني شحاتة ابن المرحوم مجاهد صاحبي اللي كان عاملني في مكتب التموين طبعا أنا كنت بتجدد كل فترة بس عم مجاهد ملحش يقيد فيه بنته دعاء ومحدش عرف يقيدها فيه فمابتخدش حصتها من التموين شحاتة كان واخدني عشان يعمل اللي قاله عليه مدير المجمع اللي بيصرف منه التموين وهو انه ياخد الورقة اللي فيها هيملي البيانات عشان يراجعها قبل ما تعدي المدة وتتلغي البطاقة وقف شحاته في أخر الطابور لحد ما وصل للشباك وهناك أداني للموظفة ومعايا الورق المطلوب طبعا أنا مش هقولكم علي جهاد شحاتة للوصول للشباك ولا عدد الساعات أقصد الأيام اللي وقفها في الطابور ولا أزاي اقنع الموظفة انه هو شحاتة مش أمه جارية و أزاي أقنعها إن شهادة وفاة أبوه عم مجاهد صاحبي شهادة وفاة مش حاجة تانية و أزاي قدر يثبت انه بيشتغل بس مرتبه 120 جنيه ده طبعا لأنه مرضاش يقول انه مابيشتغلش لان أي حاجة غلط هتلغي البطاقة و أزاي جاب لامه بحث اجتماعي من الشئون الاجتماعية و أزاي أقنعهم إن أمه هي أمه مش أم حد تاني وان أخته من حقها إنها تضاف علي البطاقة ولا أزاي اثبت إنها لسه تلميذة بتدرس لان ده أسهل من انه يثبت إنها أخته طبعا مش عاوز أقولك علي كل اللي فات لأنك أكيد شفت وعملت اكتر منه ميت مره لان الواد شحاتة ده مدردح وعلي طول حاطط فيه الخمسة جنيه اللي بتفتحله السكك المفتوحة بس يكون عليها موظف رخم بيحاول انه يقفلها بس أنا عاوزة أقولك علي القرف اللي أنا شوفته من أول عرق الواد شحاتة لغاية ريالة الموظفة في الشباك علي الختم اللي اتختمت بيه بصراحة أنا بطالب بإعدامي لأني ارفض إني أكون وسيلة للضحك علي شحاتة وأمه وأخته اللي بيدفعوا 5,25 في كيلوا ونص زيت في الشهر مع إنهم يقدروا يجيبوا من بره 2 كيلوا ب6 جنيه وطبعا غير المصالح اللي بيعملها الموردين للسلع الفاسدة التي ينبغي أن تعدم ولكن بيوردوها للتموين عشان تأكلها أم شحاتة وعيالها بس هو إعدامي هيفيد بأيه هو أنا اللي بضحك عليهم وقولهم أنهم بيخدوا دعم هما اللي غلطانين أنا لازم اسبهم أنا بطاقة عندي طموح ليه مبقاش بطاقة لناس تانية ناس تانية إيه أنا لازم أغير اسمي مش بطاقة تموين وبطاقة آسرة وكلام من ده أنا عاوزة أكون بطاقة مساندة في برنامج المساندة التصديرية لرجال الأعمال وبدل ما أشم عرق شحاتة أشم برفان حلمي بيه أبو العيش وبدل ما اتعذب في مكتب تموين أتكيف في مكتب برنامج تحديث الصناعة وبدل ما أتزنق وسط سكر وزيت ويتحط فيه ورق من أبو جنيه لحد خامسة أتزنق في وسط فايلات ملونة وأرقام كبير وخصومات باليورو والدولار 5% خصم حاجة تفرح صاحب بطاقة المساندة مش يبقي شحاتة شايلني وشايل التموين وبيلعن أبو اليوم اللي شافني فيه .

#أحمد_سعد_عبيد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات