عادل عياد
الحوار المتمدن-العدد: 4963 - 2015 / 10 / 22 - 04:00
المحور:
الادب والفن
أحلامي عايزه تمشي على جثث الناس
فتلاقيني واخد سيف أفكاري
أقتل بيه أي سور في الطريق
بس خوفي قافل عليا أبواب كتير
بأقفال محكومه
..
ما بين الإنسانيه والحياه الشخصيه
طريق مبني بالأجساد
مرشوش برماد أمواتي
داخل كوخي عيون كتير
خايفه مني وللا بتخوفني
مش عارف أحدد
عيون ناس قتلهم هيفيد
لكن ديماً بشوف عيوني وسطهم !
إنتصاري كان ليهم
لأعداء كل يوم بنمسي عليهم
مين فاكر إن اقتحام الأوهام لسرب الحمام
هيقتل الطيبه فيهم؟!
..
رسمت على وشي ضحكه
بحاول استقبل بيها العالم
والعالم يعني الناس
يمكن أضحك عليهم قبل ما يتوهوني
قبل ما اضيع في عالم اتخلق للضياع
اتخلق لأعدائي
هفترس أجنحة أعدائي
وهطحنهم بلا رحمه
علم حياتهم هلونه اسود
علم حياتي هلونه ابيض وارصعه بالنجوم
عقلي الشيطاني عايز يدمر
يحرق
يكسر
يدمر بشراسه
( من يبني للغروب تكسره أشعة الشمس )
مفيش شمس
مفيش قمر
كل الحكايه دوامه دايره
يقع كل اللي فاكر إنه يقدر يقف في طريق العاصفه
زي عصفوره حابه تخطف حبه
من إنسان جفت فيه كل معاني الكرم
..
حبة تعاسه وبؤس
بيقودوا الهذيان للوصول لذهني
القلق واقف حاير
يعدي الطريق وللا يقف ؟
يدوس بنزين وللا يقف ؟
مُنكمش داخل قوقعه كبيره من صنعي
مسقوفه بعذاب أفكاري
مكسيه بتشاؤمي
وجدرانها اكتملت بجماجم أعدائي
وقت الدواير ما اكتملت
لقيت نفسي جواهم
مخطوف من نفسي
( تهددني الكآبة وتزحف على جسدي المثقل بالهموم )
مرضي بتفوح منه ريحة الموت
اللي يقول أني سليم كداب
شهوتي بقت كدابه
زي تِعبان بيتلذذ بلدغي ويهرب
( أصوات تعوي في كل مكان )
الفزع بينبش ويتغذى على أعضائي
خطواتي بتلاحقني
قلبي بينبض بشده
وبقوه رفض سماع صوت العقل جوايا
وشرب كاس دم على شرف روحي
دم مخلوط بسموم الحياه
زرعته بروحي وللا زرعته روحي فيا ؟
متفرقشي
المهم
ان الروح هتغادر الجسد دلوقتي
بعد رفاة القلب ما غادرت بالفعل
وهصبح في عالم تاني
يمكن أحقق هناك أحلامي ...
#عادل_عياد (هاشتاغ)
كيف تدعم-ين الحوار المتمدن واليسار والعلمانية
على الانترنت؟