الفلوس ..قليلة الأدب !!!

ابراهيم جادالكريم

الحوار المتمدن-العدد: 4330 - 2014 / 1 / 9 - 00:44
المحور: كتابات ساخرة
    

الفلوس ... قليلة الأد ب !!!
دعانى أحد الأصدقاء الى الجلوس مع الصفوه من رجال الأعمال وحاولت التملص منه ومن تلك الجلسه التى ليس لى بها – ناقة أو بعير – ولكنه صمم وقال أنا عايزك نقعد وتسمع صفوة رجال الأعمال وتشوف كلامهم .. وذهبت معه ودخلنا وكان الجالسون فى شبه دائرة وكل بجواره طاوله صغيره يضع عليها الموبايل ومفاتيح كثيره وبجانبها مفتاح واحد فى ميداليه كبيره ذهبيه أو فضيه للسياره وبجانبه أيضا المشروب الذى يشربه وبعضهم أمامه الشيشه ... ومن حولهم وقف صاحب الكافيتيريا والقهوجى ... والمشعلجى أو الذى يدور عليهم لزيادة الفحم المشتعل فى الشيشه أو تغييره وهكذا دخلنا ووقفنا أمام الجميع حيث قدمنى صديقى اليهم وجلسنا وطلب لنا أحدهم القهوة وكان الحديث بين كل أثنين أو ثلاثه أحيانا والى أن تكلم أحدهم ولاحظت أن الكل سكتوا ونظروا اليه بأهتمام ... فسألت صديقى من هذا فنظر الى بتعجب وقال ده ... الملك !! فقلت له الله يرحمه .. الملك مشى من مصر منذ 1952 !! فقال لأ ده الملك بتاع السوق ... اللى بيحرك الكل واللى يرفع السعر أو ينزله ... وكان الملك يتحدث فى السوق والأسعار والضرائب التى تنهك الكل وتتعب التجار وتشاركهم فى فلوسهم ... والى أن قال والفلوس قليلة الأدب !! فنظرت اليه ونطقت ... أزاى ... يعنى أيه ... وتحملت النظرات التى أتجهت الى بأستنكار وملل ... وكأنى الوحيد الذى لم يفهم !! وبدأ ... الملك يشرح لى معنى الفلوس قليلة الأدب .
قال الأفندى أول مره يقعد معانا ولازم يفهم ... شوف ياسيدى الفلوس قليلة الأدب لأنها تخليك تعمل .. أى حاجه !! يعنى أحرس القصب ... بالقصب !! فقاطعته وأيه القصب هنا ... فقال يعنى لو كنت زارع فدان قصب لازم تسيب الحارس ياكل قصب و .. يحرس وهو قاعد ... يعنى من القصب تحرس القصب ... يعنى الفلوس منها تحرس الفلوس ... وبدل ما تروح القسم تخللى القسم ييجى لك والمحضر يتكتب زى ماأنت عايز وبدل ما تدفع للى بيقطعوا فى أرزاقنا زى ما هما عايزين ... الضرائب يعنى ... ممكن تجيب من الفلوس واحد ياخد النص فقط ويعفيك من الباقى ...يعنى بنفس الطريقه تيجى لك المخالفات بتاعة المرور وتلاقيها كام ألف ... لأن من بتوع المرور ناس عينيها تندب فيها رصاصة ويبقى باصص للعربيه بحقد وكأنه عايز ياخدها منك ... واللى من النوع ده بيحط لك مخالفات على كيفه ... كل يوم وبدل ما تروح تدفع المخالفات وتقرف نفسك تطلع شهريه لواحد يخلص المخالفات أول بأول ويجيبها لحد عندك ... بالفلوس برضه , يعنى بدل ماتيجى مخالفات الطريق بالمبالغ الكبيره أنت تربط مع واحد وهو يجيب لك المخالفات لحد عندك وكل ده ... أنت بتحرس القصب بالقصب ... يعنى الفلوس تحرسها ... بفلوس يا فندى وكده الفلوس قليلة الأدب ... تخليك تعمل أى حاجه .. أى حاجه فى الدنيا حتى ولو قلة أدب ... الكل يبقى فى خدمتك ... وتطلعت حولى لأجد الكل جالسون بأهتمام وأفواههم شاغره (مفتوحه) ببلاهة وكأن على رؤسهم الطير وكانهم جميعا يسجلون كل ما ينطقه ... الملك وكانه حكيم الأمه !!.
وسرح عقلى فى بلد ينوى النهوض بأمثال هذا الملك !!! والعصبه المنضمة اليه وهم يرون فيه حكيم الأمه وهو الفنان فى تعليم الرشوة والتهرب من دفع الضرائب بمنطق أحرس القصب بالقصب ولكنى سكت خوفا من المريدين والبطانه المحيطه به وما كان سكوتا الا لمقولة أوسكار وايلد :
مائة عالم لا يستطيعوا أقناع جاهل واحد ولكن جاهل واحد يستطيع اقناع مائة عالم

#ابراهيم_جادالكريم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات