أخبار عامة - وكالة أنباء المرأة - اخبار الأدب والفن - وكالة أنباء اليسار - وكالة أنباء العلمانية - وكالة أنباء العمال - وكالة أنباء حقوق الإنسان - اخبار الرياضة - اخبار الاقتصاد - اخبار الطب والعلوم

الصفحة الرئيسية - الادب والفن - عثمان محمد على - بلح المدينه















المزيد.....



بلح المدينه


عثمان محمد على

الحوار المتمدن-العدد: 2076 - 2007 / 10 / 22 - 08:32
المحور: الادب والفن
    



إعتاد الدكتور –محمد عبد العال واسرته الصغيره .ان يقضى اجازة عيد الفطر ببلدته بين أهله واقاربه وأصحابه وأحبابه وليقوم بزيارة قبر والديه وليصلى عليهما ويدعو لهما بالرحمة والمغفره .وفى ثانى يوم العيد وهو جالس مع اسرته الصغيره المكونه من زوجته وولديه تامر واسمهان وبصحبتهم أخته واولادها وزوجها يشاهدون مسرحية (الهمجى للفنان محمد صبحى ). وإذا بجرس المنزل وخبط قوى على الباب ومن خلفهما صوت إحدى عماته (الحاجه سكينه) وهى ليست عمته عصبيا ولكن تعود اdil;هل القريه ان ينادوا السيدات الكبار لقب عمتى او خالتى . وهى تنادى وتصرخ بأعلى صوتها إلحقنا يا دكتور إلحقنا يا إبن اخويا فخرج الدكتور محمد ومن خلفه الآسره كلها .وكان هذا الحوار
د-محمد .ايوه يا عمتى فى إيه خير إيه اللى حصل .
الحاجه سكينه. إلحقنا يا إبنى عمك الحاج سالم ابو جاب الله (شيخ البلد )تعبان قوى .وتعالى شوفه يا ابنى .
د- محمد .حاضر يا عمتى ثوانى . وانت يا حاج رمضان (زوج إخته) هات العربيه وحصلنى على بيت عمك الحاج سالم علشان لو إحتجنا ننقله المستشفى ولا حاجه .وخرج وراءها مهرولا إلى منزل الشيخ سالم .ودخل المنزل فوجده ملىء بالعائله والجيران وبسرعه فتحوا له طريق ودخل الغرفه فوجده لا يتحرك ولا يتكلم ولا بيحط منطق وحوله اولاده –عيد وأحمد وساميه وجدتهم الحاجه وكلهم بيعيطوا وبيصوتوا .فأخرجهم بره وأغلق الغرفه وبدأ فى فحصه يدويا عن طريق قياس النبض من ايده وعن طريق عيناه فوجده ما زال ينبض ولكنه فى غيبوبه شديده .
ففتح الغرفه وطلب من عمته سكينه ان تحضر له التليفون .وإتصل بصديقه وزميله طبيب القريه د- محمود الشاطر وبدا الحوار .ايوه يا محمود انا محمد عبدالعال
إفتح العياده بسرعه انا جاى وجايب معايا الشيخ سالم ابو جاب الله لأنه داخل فى غيبوبه شديده ومش حاعرف اعمل حاجه هنا فى البيت علشان البيت زحمه وكلهم بيصوتوا وجهز نفسك وحضر أدوية الطوارىء وانا جاى على طول .سلام يا محمود .
..وبسرعه جت عربية الدكتور وزوج اخته وعدد اخر من السيارات والشارع إتملى بالناس من كل البلد .وبسرعه اخذوه على عيادة الدكتور محمود الشاطر.وانتشر الخبر بسرعة البرق فى البلده وقبل ما يوصل الحاج سالم للعياده كانت العياده إتملت بأكثر من عشرين دكتور (حاكم ابناء البلد منهم اكتر من 100 دكتور ومعظمهم موجودين فى العيد ) والشيخ سالم يإما عمهم او خالهم حاكم البلد كلهم عائله واحده من خلال النسب والتصاهر .وبدأ الدكتور الشاطر يفحصه وسريعا قال لهم لازم ننقله للمستشفى لآننا محتاجين حاجات كتيره جدا مش عندى .فرد عليه د- متولى فاروق وقال له طيب معلش يا دكتور ممكن افحصه فقال طبعا . وبدا فى فحصه وشم نفسه (رائحه فمه ) فوجدها تشبه رائحة الأسيتون فقال يا جماعه الحاج سالم عنده غيبوبة سكر ولازم نفوقه منها الأول واثناء الحوار دخلت بسرعه إبنة الحاج سالم الدكتوره سلوى جاب الله ومعها زميلتها وصاحبتها الدكتوره مريم (إبنة خالها الحاج شحات ومعها استاذتها الدكتور فردوس شعبان جايين من عند منزل خالها (عزموها لقضاء العيد معهم فى البلد وعلشان تحضر فرح الدكتوره سلوى على إبن عمها الدكتور فريد محمود جاب الله خامس ايام العيد . ). فعرفتهم بنفسها انا د-فردوس شعبان استاذ مساعد الباطنه بطب المنصوره .بعد إذنكم ممكن تسمحوا لى اتدخل واتولى علاجه هنا طالما انها حالة باطنه فرحبوا بها وشكروها ووسعوا لها المكان وبدأت فى تعليق المحاليل الطبيه وطلبت حقنه إنسولين تركيز 100 وبدات فى إعطاءه 1مللى تحت الجلد وآخر داخل محلول رنجر وبدات كل 30 دقيقه تأخذ عينة دم وتحللها وتشوف نسبة السكر .وبدات فى فحصه من قلب وباطنه وعملت رسم قلب وإطمأنت على قلبه وعلمت ان لديه مشاكل فى المعده وانه يعانى من تسمم غذائى وبدأت فى كتابة روشته لإحضار ادوية معالجته من التسمم الغذائى ايضا .وحصل طوارىء فى العياده وكل الدكاتره واقفين وكانهم فى حالة حرب وكل منهم يريد ان يساعد بشكل او بأخر وكل الصيدليات فتحت رغم اجازة العيد لإحضار ألأدويه المطلوبه واتصل بعضهم بزملاءه فى المدينه ان يفتحوا صيدلياتهم إنتظارا لطلب ادويه قد لا تتوفر فى صيدليات القريه .
وخارج العياده وفى الشارع وقف الناس ما بين صمت و بكاء وعويل ووقفوا جماعات ومجموعات ومنهم من يتكلم عن تجهيز الميتم. واية مقبره ستفتح؟ هل مقبرة والده ام المقابر الجديده؟ ومن المقرأ الذى سيقرأ فى الميتم وما نوع السرادق وهل سيكون العزاء فى المضيفه ام فى سرادق فى الجرن الكبير امام البيت ؟؟ وهكذا.. وتعددت المجموعات والأحاديث عما سيحدث فى حالة الوفاه . وهناك مجموعات اخرى تطالب بنقله للمستشفى الجامعى ومنهم من طالب بنقله للقاهره ..
ومنهم من قال هو فى دكاتره احسن ولا اكتر من دول كل التخصصات هنا وكلهم ممتازين واولادنا ومش ممكن يغشونا .
وبعد ساعه تقريبا بدا الشيخ سالم يلتقط انفاسه وما ان عاد إلى وعيه وإذا به يبدا فى صراخ وتأوه من ألام مبرحه فى معدته وفى صدره .وهنا بدأت مرحلة أخرى من العلاج بعد ان سمعت الدكتوره فردوس تاريخه المرضى من إبنته ومن د- الشاطر طبيبه المعالج فى حالات الطوارىء .وبدأت بإعطاءه ادويه مسهله وحقن شرجيه وغسيل معده لمحاصرة التسمم الغذائى قبل إمتصاصه قدر الإمكان وبعدها بدات فى معالجته من الام قرحة المرىء والمعده والإثنى عشر .وإستغرق هذا حوالى 12 ساعه فى عيادة الدكتور الشاطر وتكدس اهل القريه امام العياده وفى الشارع الكبير بجوارها والشوارع الجانبيه وكل شويه يخرج لهم احد افراد الاسره ليخبرهم عن الجديد وماذا حدث .
وبعد تماثله جزئيا للشفاء وعودته لوعيه وحديثه مع من حوله.طلب ان يروح لبيته .ومع إلحاحه وافقوا بعد ان طمأنتهم د- فردوس على ان حالته اصبحت مستقره وممكن تكملة العلاج فى البيت فى اليومين القادمين ..
وأخذوا الرجل ومعاه اهالى البلد الى بيته وجلس الناس فى الجرن الكبير قدام البيت ..وشويه شويه هدأ الحال وبدأ الناس فى المرواح .وظلت معه إبنته وزميلتها د- مريم –ود – فردوس .وعملوا نبطشية صحيان بجواره لمتابعته .
وفى تانى يوم الظهر إتصل د –محمد عبدالعال ب الدكتور الشاطر وقال له تعالى نروح نطمن على عمك الحاج سالم ابو جاب الله .
.فرد عليه د- الشاطر .حاضر حاصلى الظهر واجى لك على طول رغم اننا حنلاقى الواد إبنه الصغير ده هناك وده واد بخارجى وبتاع جماعات وإخوان مسلمين وانا ما بحبش اتكلم معاه لكن ربنا يسهل .
وراحوا للحاج سالم .ايوه يا جماعه سلام عليكم .اهلا اهلا يا دكاتره اتفضلوا هنا فى المندره (غرفه كبيره جدا فى المنزل ) عمكم الحاج سالم هناك ومعاه العائله كلها اتفضلوا إتفضلوا .. اهلا يا عم الحاج عامل إيه دلوقتى .
.الحمد لله البركه فيكم وفى الدكتوره فردوس والدكتوره مريم ودكتورتنا الدكتوره سلوى .
لا شكر على واجب يا عم الحاج . وإحنا اللى بنشكر الدكتوره فردوس وإسمح لنا نرحب بها مرة تانيه ..شكرا يا دكاتره انا معملتش حاجه والبركه فيكم طبعا .
اهلا يا جماعه كلكم عاملين ايه وكل سنه وانتم طيبين . الحمد لله وانتم طيبين يا دكاتره إتفضلوا هنا على الكنبه دى جنب ابونا الحاج ..

ولسه بيقعدوا والباب بيخبط و الخفير بينادى يا عم الحاج سالم يا عم الحاج سالم سعادة الباشا المامور وسعادة الباشا رئيس المباحث ..
اهلا اهلا اتفضلوا اتفضلوا .
وفى نفس اللحظه وصل معهم الشيخ سيد المخ (هو إسمه كده لأنه من عائله تسمى عائلة ابو مخ) عضو مجلس الشعب ومعه سكرتيره ومرافقه الدائم الشيخ متولى الحسباوى .وهما من ابناء قرية الشيخ سالم ابو جابالله
سلام عليكم .إيه يا حاج شغلتنا عليك .لا يا بشوات دى وعكه بسيطه كده وعدت والبركه فى الدكاتره بتوعنا وفى الدكتوره فردوس استاذة بنتى الدكتوره سلوى .
وبعد ان جلسوا تحدث المأمور طيب يا شيخ سالم احنا جينا نطمن عليك وبصفه رسميه كمان لأننا عرفنا من مصادرنا ومن شيخ الخفر انها محاوله لقتلك بالسم فهل تتهم احد بذلك ؟؟؟
لا يا باشوات قتل إيه وتسمم إيه دانا زودتها شويتين فى الأكل من عندنا من هنا من البيت وباين الواحد كبر خلاص ماعدش زى زمان فمعدتى ما قدرتشى تهضمه فكبس على مراوحى ونفسى والحمد لله لحقونى بدل ما الواحد كان يموت فطيس من غير ما يحللوه ههههههه.
ياعنى ما بتتهمش حد خالص ولا حتى مراتك وفرصه نخلصك منها هههههههههه؟؟
لالالالا يا باشا وبعدين مراتى ايه دى رفيقة عمرى وبركة البيت .
إحنا بنضحك معاك ومعاها يا شيخ سالم..
طيب يا شيخ سالم نستأذن إحنا بقى علشان عندنا شغل فى المركز .
لا يا سعادة البيه مش ممكن ابدا داحنا عندنا عيدين العيد الصغير (عيد الفطر ) وجيتكم لنا (مجيئكم لنا ) .وقسما عظما مانتم ماشين غير لما نتغدى سوى .
يا راجل حتاكل تنانى ؟ لا يعنى تتغدوا كلكم حدانا والبنات بيعملوا فطير مشلتت يستاهل بوقكم.
ماشى يا حاج سالم وهى فرصه ندردش شويه معاكم ومع الشيخ سيد المخ .
بس ألاول عايزين نطمن على حالتك من الدكتوره فردوس ..
حالة عمى الشيخ سالم دلوقتى كويسه ومستقره والموضوع انه اكل إمبارح كتير شويه وغالبا معظمه كان سكريات فرفعت نسبة السكر عنده سريعا ودخل فى غيبوبة سكر والأكل اثر على معدته وهو عنده قرحه وواضح إن الأكل كان ملوث فدخل فى بوادر تسمم غذائى .لكن الحمد لله دلوقتى مفيش مشكله وحيفضل على نظام علاجى لمدة يومين كمان وبعد كده يرجع لعلاج السكر والقرحه زى ماكان ماشى الآول مع تعديل بسيط فى علاج القرحه علشان يخف منها نهائى إن شاء الله.
شكرا يا دكتوره وبارك الله فيكى هكذا تكلم الشيخ سيد المخ .ومعلش حرمناكى من انك تعيدى مع زوجك واولادك ..
لا ابدا ده بالنسبه للدكاتره عادى خالص وعلى فكره انا مش متزوجه وجايه مع زميلتى د-سلوى بنت الشيخ سالم اقضى معاهم العيد واحضر فرحها إن شاء الله خامس يوم العيد..
لمؤاخذه يا دكتوره سؤال بايخ حبتين إزاى لسه ما تزوجتيش لغاية دلوقتى ؟؟
عادى يا شيخ سيد نسيت اتزوج (ههههه).ابدا كنت مشغوله بالدراسه والطب والدراسات العليا والدكتوراه ونسيت اتجوز ودلوقتى المسافه بعدت بينى وبين الزواج من حيث نوعية الرجال اللى بيتقدموالى من ناحيه ومن خوف بعضهم من انى ارفضه لبعد المكانه الإجتماعيه بينى وبينه من ناحيه تانيه .وعلى كل حال الموضوع ده مش شاغلنى كتير ومبيجيش على بالى كتير .
وهنا تدخل الدكتور الشاطر وقال معلش يا دكتوره ما تزعليش من الشيخ المخ هو كده دايما بيحشر نفسه فى كل حاجه ....
لا ابدا انا متفهمه الموضوع وما عدش بيمثل عندى حساسيه ..وشكرا يا دكتور.
وهنا تدخل الدكتور محمد عبد العال بسؤال للشيخ سالم ليكسر حائط الصمت والخجل من اسئلة السيد المخ وليقطع عليه الطريق فى ان يستحوذ على الجلسه بالكلام كعادته فقال للشيخ سالم طيب على ما تجهزوا لنا الفطير المشلتت بتاعكم الحلو ده عايزينك تحكى لنا على اللى حصل بالتفصيل وإوعة تنسى حاجه خالص ..
حاضر يا غالى ياإبن الغالى الله يرحم ابوك كان اعز اصحابى الفاتحه لروحه .
ايوه يا جماعه الموضوع هو ..
وهنا دخل الحاج محمود ابو جابا لله عمدة البلد والحاجه رحمه امهم (ام محمود وسالم ابو جابا الله)...سلام عليكم كل سنه وانتم طيبين نورتونا وشرفتونا .داحنا حنوزع العيا (المرض )علينا بعد كده علشان نشوفكم على طول .
ودخل الجميع فى ضحك مع العمده .ثم هدأت الجلسه وعاد الشيخ سالم لسرد حكايته مرة أخرى .
إحنا كنا عاملين فطار اخر يوم رمضان وعازمين بناتى وازواجهم وأهاليهم والأكل كان كتير وفاض وحطوه فى التلاجه وبعدين زى ما انتم عارفين فرح العيال يوم الخميس الجاى . فجبنا المعلم عبده الجزار يدبح لنا عجل علشان نجهزه للفرح وفعلا دبحه وخده عنده فى تلاجة المحل لكن فضل هنا الحلويات بتاعته (القلب والكبد والطحال والكلاوى والفشه والرأس ووو) فالجماعه طلعوا الأكل من التلاجه وحطوا الحاجات دى .والحاج متولى الدرينى جاب لنا كم قفص طماطم من الغيط بتاعه علشان الفرح فالجماعه نشروه فى الأوضه الجوانيه فدخلت ابص عليه فلاقيت فيه شوية حيبوظوا فنقيتهم فى قفص كده وجبيتهم فخليت الجماعه يعملوا لى صينيه اتغدى بها من ألاكل البايت علشان ما يترميش فجابوه لى كله وقالوا لى اقعد اختار اللى انت عايزه من بواقى اللحمه والزفر (البط والوز والفراخ ) فقعدت عليهم وعملت زى المثل ما بيقول خسارة بطنى ولا خسارة حاجتى. وقبل ما آكل خدت لى سبع بلحات من علبة البلح اللى بعتها لنا الشيخ سيد المخ وكاتبين عليها من بره (اللى ياكل سبع بلحات فى الصباح لا يصيبه مرض ولا سحر فى يومه ابدا فعملت احتياطى وأكلت )( رواه الشيخان ) .ونزلت على الأكل حتة لحمه من هنا وحباية طماطم من هنا وحتة بطه من هنا ورغيف عيش خاص سخن من هنا وحتة جبنه قديمه من هنا وشوية مخلل من هنا المهم شطبت على الأكل والطماطم واديتها وكبستها مظبوط .
وبعدين ما قدرتش اقوم من مطرحى فقلت اريح شويه كده واقوم اروح اعيد على باقى العيله (العائله) .وبعدين شويه فشويه بدأ صدرى يقبض على ونفسى يروح وسكاكين تقطع فى معدتى ونار طالعه على زورى .فندهت على الحاجه وقلت لها إلحقينى فندهت على الوله (الولد) أحمد .
طيب يا حاج سالم اسكت انت يا خوى علشان تعبان وانا حاحكيلهم قلت الحقنا يا واد يا احمد ابوك تعبان فقال طيب وراج جاب كوباية (كوب) عسل وقال له اشربها ففيها شفاء .وشويه ومفيش فايده قلت له يابنى الحقنا وانده لنا الدكتور الشاطر او روح انده لأختك من عند الدكتوره مريم فقال خدى اسقيه كوباية العسل التانيه دى وهو حيخف .وبعد شويه مفيش فايده يابنى الحقنا اعمل معروف .فقال صدق الله وكذب بطن زوجك .وعلى كل حال خد اشرب كوباية زيت حبة البركه دى الإمام البخارى بيقول فى روايه عنه انه بيشفى من كل داء وسام إلا الموت .شويه ومفيش فايده يابنى الحقنا بقى حرام عليك ابوك حيروح مننا .طيب اسكتوا وبلاش تخاريف .وبعدين راح متكلم فى التليفون مع واحد مخبول من صحابه فقال له ابوى باطنه واجعاه واديتوا عسل وزيت حبة البركه ولسه تعبان شوف لى عندك فى كتاب الطب النبوى كده ايه تانى اديهوله . فقال طيب شويه وانا جاى لك .وشويه ولقيته جاى وبينده على احمد ومعاه قزازه (زجاجه) .والواد احمد خدها وصب منها شويه وحط عليها شوية ميه (ماء)وجابها لأبوها وقال له اشرب .فشميت ريحتها فقلت له يابنى دى خل .فقال ايوه احنا بنعالجه بالطب النبوى والطب النبوى والإمام البخارى بيقول (خير الإدام الخل ) يعنى خير الطعام الخل .والحاج سالم شربها من هنا وصرخ تانى وسروق (دخل فى غيبوبه) ووقع على الأرض .والباقى انتم عارفينه ..
ودخل الحضور والضيوف فى ضحك شديد ملىء بالتعجب إزاى يا شيخ سالم تعمل فى نفسك كده
وهنا تدخل الدكتور محمد عبدالعال فى الكلام وقال .يا عم الشيخ سالم يا راجل يا طيب دانت طول عمرك ناصح ازاى تعمل فى نفسك كده وطبعا الطماطم كان فيها بايظ وعليه دبان (ذباب) .فقال الشيخ سالم مانت عارف ان الذباب فيه رجل فيها داء والتانيه فيها دواء ..فقال الدكتور محمد عبدالعال لا مش مظبوط انت مش عارف ان ربنا بيقول (كلوا واشربوا ولا تسرفوا ) ازاى تاكل بالشكل ده وخاصه اننا طالعين من صيام وانت كمان تعبان بالسكر والمعده .والتفت إلى احمد إبن الشيخ سالم وقال له ليه يا بنى تعمل فى ابوك كده طب نبوى ايه اللى بتعالج بيه ؟؟
يابنى هو مفيش دكاتره هنا فى البلد يابنى؟؟ والمصيبه ان اختك دكتوره طيب عايز ايه تانى .وبعدين يا حبيب قلبى الرسول عليه الصلاة والسلام ماكانش دكتور. يابنى ده كان رسول وكل اللى قالوه عنه من روايات عن اللى بتسموه الطب النبوى كله كدب فى كدب وغلط ومخالف للرساله اللى بعث الرسول عليه الصلاة والسلام بها ..وهنا تدخل الشيخ سيد المخ وقال لا يادكتور محمد ما تخوضش فى السنه والحديث وفى حبيبنا المصطفى .والأحاديث اللى انت بتنكرهها دى ثابته ومرويه فى الصحيحين ومرويه عبر الثقات العدول من الصحابه ...
وبعدين إحنا واقعين تحت مؤامره إسرائيليه امريكيه غربيه علينا ومنها انهم بعتوا لنا مبيدات بايظه بوظت البلح بتاعنا ومعدش بيجيب نتيجه زى زمان .
فصرخ فيه الشيخ سالم هو ده مش بلح المدينه المنوره فقال له لا طبعا ده بلح مدينة الوادى الجديد .
فقال له يعنى كمان بتضحكووا على الناس وبتغشوهم وتقولوا لهم انه بلح المدينه .ثم واصل الشيخ سيد المخ قوله بإنفعال وقال على كل حال إحنا مش حنسكت وحاطالب فى البرنامج بتاعنا ان نوصى من خلال الإجتهاد ان نغير عدد البلحات من سبع بلحات إلى إطناشر طمناشر(12-18) بلحه لكى نتغلب على مؤامرة اعداء الدين علينا. فدخل الجميع فى ضحك وسخرية من السيد المخ وكلامه.
وقال له د- محمد .يا شيخ سيد انا مش حأدخل معاك فى مواضيع ولكن لازم تعرف ان كتاب ربنا امرنا بالإعتدال فى كل شىء بما فى ذلك ألأكل والشرب وإختيار الأزكى والأطهر من الطعام وتقدر تقرأ سورة الكهف علشان تعرف ان رغم محنة أهل الكهف إلا انهم لما طلبوا من زميلهم يشترى لهم اكل طلبوا منه يشتر لهم الأزكى (فأبعثوا احدكم بورقكم هذه إلى المدينة فلينظر ايها أزكى طعاما فليأتكم برزق منه وليتلطف ولا يشعرن بكم احدا).ومن ناحيه تانيه إحنا على ارض الواقع قدام حاله بين ايدينا هنا .هل ما حدث مع الشيخ سالم وطريقة علاجه بالطب النبوى وخزعبلات روايات البخارى عن العلاج نفعته ولا كانت حتقضى عليه (لا مؤاخذه يا عم الشيخ سالم ).. وهنا إلتقط مأمور القسم الكلام وقال معقول يا دكتور محمد الكلام ده موجود فى البخارى وكتاب الطب النبوى .فقال له نعم يا سيادة المأمور ده كلام موجود والمشايخ والجماعات مقتنعين به ولو حكمونا حيرجعونا له تانى .
معقول فى حديث بيقول خير الإدام الخل .وحديث البلح والحبه السوده والكلام ده .نعم يا سيادة المأمور نعم ..طيب يا دكتور محمد ده كلام خطير والمفروض الناس تعرفه .يا سيادة المأمور .مااحنا لما بنتكلم فى الموضوعات دى بتعتقلونا وتتهمونا بتهمة إنكار السنه وبتودونا ورا الشمس .
.إسمع يا دكتور محمد إحنا ناس بننفذ ألأوامر وبس ومش من حقنا نناقش او نعترض على تنفيذ ألأوامر .يعنى لو جانى امر انى اروح اهدم مسجد حاروح فورا من غير ما اسأل ولا اعترض .فارجو ان تتفهم كلامى ..
د- محمد – عموما مش ده موضوعنا دلوقتى . لكن ارجو ان تراعوا وتفرقوا فيما بعد بين من يريد الخير والصلاح للناس ومن يريد ان يقتلهم ويعيدهم للعصر الحجرى .
وفجأه تدخلت الحاجه رحمه فى الكلام وقالت يعنى اللى حصل لإبنى الشيخ سالم كله من ورا سيد المخ وبلاويه ؟
. فرد عليها الشيخ سالم ياامه مش كده الراجل ضيفنا وعندنا وعندنا ضيوف ..فقالت له لا مفيش هنا ضيوف كلكم ولادى وهو كمان ابنى لكن لازم اقول اللى فى نفسى .هو لسه فى ايه تانى بعد ما كان حيضيعك .وبعد ما ضيع الواد أحمد .الواد كان زى الورده المفتحه وكان لما بيضحك الدنيا كلها بتضحك وبيملى قلبى بالفرح .دلوقتى بقى عامل زى اللى عنده ستين سنه وبقى قليل الأدب.
شوفوا الواد من يومين باكلم اخته وباوصيها على عريسها وباقول لها يا بنتى مفيش عيب ولا حرام بين العروسه والعريس اعملوا كل اللى انتم عايزينه وتمتعوا وربنا يجعل ايامكم كلها سعاده ومتعه .يقوم الواد يرد على وهو بره فى الصاله يقولى ايه ؟ احتشمى يا إمرأه وبلاش إنحلال صحيح شياطين ..وهنا إنتفض الشيخ محمود ابو جابالله وقال إنت ياواد بتقول لجدتك كده طيب على الطلاق بالتلاته ما انت متجوز البنت (حاكم هو كان خاطب بنت عمه الشيخ محمود ابو جابالله العمده).فقالت جدته إهدأ يا محمود وبلاش عصبيه وسيبك من الواد دلوقتى خلينا مع سيد المخ .يعنى انت يا سيد يا مخ السبب فى ضياع العيال بتوع الجامع بتوعك . وكل يوم عاملين لنا مشاكل مع اهاليهم ومع اخواتهم البنات ومع البت الكوافيريه اللى بتزوق العرايس فى الأفراح وكل شويه يكسروا لها الدكانه .
وبعدين تعالى هنا إنت مالك ومال الست مريم مراة المرحوم المقدس جرجس وبنتهم الأستاذه نرفانا .الست اشتكت لى حاطط مكرفون الجامع فوق بيتهم وكل جمعه عمال تشتمهم وتدعى عليهم انت وشوية العيال بتوعك وقال ايه بتدعى لنصرة الإسلام
..وإيه الناس اللى انت عمال تبعتهم لها علشان يشتروا منهم بيتهم هى الست قالت لك انها عايز تبيع بيتها ولا عايزهم يسبوا بيتهم وبلدهم ؟؟
شوف يا سيد يا ابو مخ انا عارفاك طول عمرك حلنجى ولو ما بعدتش عن الست وبنتها الله فى سماه لاكون فاضحاك وقايله على كل المستخبى عنك وانت عارف انى عارفه كل حاجه عنك من اول شرب الحشيش وانت لسه عيل فى المدرسه لغاية فلوس الجامع اللى لمتها من الإمارات وسرقتها انت والمدعوك شريكك ابو صدقى بأماره الخناقه اللى كانت بينك وبينه على حتة الارض اللى اشتراها وسجلها بإسمه بعد ما رجعت من الإمارات وكنت حتموت فيها عندهم فى البيت ..عارفها ولا نسيتها ولا ايه ولا ايه ....
ايه جدتنا انتى حتفتحى ليه بس كده دانا باحبك والله ويبدوا ان فى حد مزعلك منى .هكذا قال السيد ابو مخ .
وهنا تدخل د- محمد عبد العال وقال اسمع يا اخ سيد البلد دى طول عمرها بلد الأستاذ جرجس وعائلته واى حد يحاول يمسهم بسوء مش حنسكت له واسمعها منى انا بالذات اى تعدى على الست مريم وبنتها حاعتبره تعدى على انا شخصيا ولن اسمح به وساحاسب اللى يعمل كده بشكل يندم عليه .. انت نسيت يا شيخ سيد ان الأستاذ جرجس هو اللى عمل المدرسه الإبتدائيه بتاعتنا دى وهواللى علمنا فى بيته وفى المدرسه ونسيت لما كان بيخلينا نروح عنده فى شم النسيم وبفتح لنا باب الجنينه ويدينا كل واحد ورده وفى عيد الغطاس كان يشترى لبشتين قصب ويدى كل واحد مننا بعد الدرس عود قصب وبرتقاله .هل جزاءه اننا نطرد مراته وبنته من بيتهم ولا نحميهم ونحافظ عليهم ويحسوا ان كل البلد اهلهم وقرايبهم..صحصح يا شيخ سيد وسيبك من اوهام الروايات بتاعتكم دى اللى بتقول انكم لما تلاقوهم فى الطريق تضيقوا عليهم او تطردوهم من البلد ..
وهنا تدخل المأمور وقال إيه جماعه الكلام ده انتم مش واخدين بالكم اننا فى بلد فيها قانون وان المامور وظابط المباحث معاكم ولا ايه؟ على كل حال لو تقدمت لى السيده مريم وإبنتها ببلاغ رسمى ضد اى حد بيضايقهم زى ما بتقولوا انا حاعرف شغلى معاه حتى لو كان سيادة النائب سيد ابو مخ شخصيا .وارجو ان تكون الامور ابسط من كده وتتحل ودى بينكم .ولكن لى كلمه للشيخ سيد ابو مخ او سيادة النائب سيد ابو مخ اوعى تفتكر اننا مش عارفين اللى بتعمله انت والاولاد بتوعك لالالا .واوعى تفتكر ان الحصانه حتمنعك منى او تخليك تنسى اننا لازم نحافظ على امن وامان البلد دى تبقى غلطان .وعايز اقول لك على حاجه بسيطه انت عارف الشوال اللى كان فى عربية إبن اختك (الشوال الأخضر)..احنا اللى أخدناه ووصينا الولد ما يقولكش .لكن انا باقول لك اهه .
بقى يا شيخ سيد تستغل عربية الولد المعاق وتاخدها منه وتحط فيها شوال بانجو فى الشنطه وتطلب منه يروح يودى شوية كتب لصديقك فى كفر غزاله وهناك ياخدوا شوال البانجو من غير ما الواد يعرف .وعموما احنا لولا اننا متأكدين ان الواد ما يعرفش حاجه وانه عنده عاهه مستديمه كنا خدناه .لكن بشرفى لو تكررت مره تانيه لحاجى واعتقلك حتى لوكنت على سريرك ولو حافقد فيها وظيفتى وشغلى .
ايه سيادة المامور انت بتتكلم عن ايه وشوال ايه وعربية ايه دى وبعدين احنا ناس مبنتهددش ...انتم حولتم الجلسه إلى إستجواب لى ولا إيه؟؟
وهنا تدخل الدكتور الشاطر والدكتوره فردوس .إيه جماعه صلوا على النبى احنا فى عيد وكل سنه وانتم طيبين فين يا عم الشيخ سالم الفطير احنا جوعنا ..
وبسرعه قبل الجو ما يتكهرب جابوا الفطير والعسل والجبنه القديمه ودكرين بط ووزه ونزلوا عليهم حتتك بتتك .
واثناء الأكل سمعوا بنت الحاج عبد الوهاب بتنده على شوية خس وطماطم للبيع معها على عربيهم الكرو وبتقول خس المحاشى يا خس الورور معاى الورور حمره يا قوطه . ودخلوا فى نوبة ضحك هستيريه .

.وبعد الغداء بدأوا يستأذنوا ويسلموا على الشيخ سالم ووالدته واهل المنزل مع دعائهم له بالشفاء والوصايا بأنه ياخد باله من نفسه بعد كده. وبدأوا فى الخروج من المنزل وخرج المأمور وظابط المباحث والعمده وجرى وراههم الشيخ سيد المخ علشان ياخد المأمور يشرب عنده الشاى .وخرج د الشاطر وصديقه د- محمد عبد العال وعزموا علىالدكتوره فردوس تزورههم وتتعشى معاهم مع د-سلوى ود-مريم .وقالوا لها حنبعت لك الستات بتوعنا ياخدوكم المغربيه .
وهما خارجين من البيت نده الولد أحمد بن الشيخ سالم على د- محمد عبد العال وراح له وقال له ممكن تسمح لى ابقى اجى ازوركم فى مصر (القاهره) فقال له انت عبيط يا بنى طبعا ممكن ومن غير إستئذان ياوله وتيجى فى اى وقت .
وبالفعل بعدها بإسبوع واثناء صلاة الجمعه لقوه بيخبط على الباب وفتحوا له لقاهم قاعدين فى الصاله د –محمد وزوجته وتامر واسمهان اولادهم الصغار وكل واحد معاه مصحف وفاتحين على اول سورة الإسراء فطلبوا منه ان يجلس معهم واعطوه مصحف وبدأوا يقرأوا العشر ايات الأوائل وبدات زوجة الدكتور محمد بالقراءه لتعلم الأبناء القراءه الصحيحه ومن بعدها اسمهان وتامر يصحح لها ووالدتهم تصحح لهم ود-محمد يصحح للجميع وبعدين قرأ احمد وبعده د-محمد .وبدأوا فى تدبر العشر ايات الأوائل من السوره اية أيه وبدأوا بتامر وبعدين والدته وبعدين احمد وبعدين د- محمد وهكذا إلى ان انتهوا من العشر ايات ثم اقاموا الصلاه وصلوا الجمعه مع بعض .وبعدها دخل احمد فى ذهول من جمال وروعة طريقة د- محمد واسرته فى تدبر القرآن ومعاملة د-محمد وزوجته لأولادهم وكيف انهم يستمعون لأراءهم ويناقشوها ويصححوهها لهم بهدوء .واحس بالفارق بين ما تدبره وفهمه حول موضوع الإسراء هذه المره وما تعلمه عنه عبر سنوات وسنوات من المشايخ والجوامع والتلفزيون .وكيف ان صلاة الجمعه بهذه الطريقه تؤدى لفهم حقيقى للقرآن وتمنى لو إنتقلت للمساجد والجوامع ....والفارق بينها وبين وبين ما يفعله المشايخ على المنبر وسطوتهم على عقول الناس وإرهابهم بأن من يتحدث فى الخطبه فقد لغى ومن لغى فلا صلاة له .يعنى لازم نسمع اللى يطرشه علينا الشيخ واحنا ساكتين وقاعدين مبلمين ولاغيين عقولنا كده كأننا كومبارس صامت فى فيلم بايخ . وبعدين قال للدكتور محمد انا محروج منك قوى لكن انا عارف انك حتعذرنى وعلى كل حال انا قررت انى اسيب الشيخ سيد المخ والناس اللى معاه وحتى الجامع بتاعهم خلاص مش حاصلى فيه وحاصلى فى البيت لما اكون فى البلد ولو انا فى مصر حاجى اصلى معكم بعد أذنكم طبعا ولو مش فيها مضايقه لكم.
لا يا سيدى مش فيها مضايقه بس انت تعالى واهلا وسهلا بك طبعا .
وايه تانى يا خلبوص اللى انت عايزه ؟؟
معلش عايزك تتوسط لى عند عمى الحاج محمود علشان موضوع الخطوبه احسن دماغه ناشفه وحلف بالطلاق ..
ماشى يا عم احمد ما تشغلش بالك انا حاروح البلد الأسبوع الجاى ولك على اسوى لك الموضوع وافهمه ان الطلاق مش كده عمال على بطال وانه لا يقع بمجرد النطق به زى ما الناس فاكراه وانك متيم بالبت ماشى يا عم .
طيب انا لى طلب تانى ..انا عايز اعرف شوية كتب عن المواضيع اللى بتتكلموا فيها ...
يا سيدى الموضوع بسيط .عليك بالقرآن وواحده واحده حتلاقى نفسك بتعرف اكتر مننا ...
العفو يا دكتور .لكن مفيش كتب يعنى .لا فى طبعا على كل حال دور على كتب الشيخ محمد عبده والشيخ شلتوت والأستاذ احمد امين وطه حسين واقراهم كويس .هم مش بيعلنوا رايهم بصراحه قوى لكن حيساعدوك فى ان عقلك يكبر ونظرتك للأمور تختلف شويه وبعدين عليك بالباقى .واقرأ القرآن بهدوء وكتير وأعمله زى كتاب الرياضيات والكيمياء والفزياء يعنى زى المعادلات وبالورقه والقلم وبطريقة بما أن إذن .وأطلب من ربنا الهدايه وهو حيهديك لأنه سبحانه وتعالى وعد وقال ( والذين جاهدوا فينا لنهدينهم سبلنا ) واللى مش تفهمه اسال فيه .
وحاول تنسى كلام الروايات عن الطب والكلام ده وانت شايف كانت حتودينا لغاية فين لولا حفظ الله ولسه هناك آجال لنا ولوالدك .
وبعد كده ممكن تدخل على موقع على الإنترنت إسمه ( اهل القرآن) لكن بعد ما تقرأ الكتب اللى قلت لك عليها .ولما تدخل عليه حاول تقرا اللى عليه الأول قبل ما تسأل أو تعترض لأنه ممكن تلاقى الموضوع نفسه تمت مناقشته بإستفاضه عندهم .وقد يبدوا لك ان موضوعاتهم صادمه لكن بالقراءه المحايده والهدوء حتلاقيهم عندهم حق فى اللى بيقولوه .وعموما ده موضوع يرجع لك انت وما حدش يقدر يجبرك عليه ..
وبعدين سكت احمد شويه وقال طيب ممكن كوباية ميه(كوب ماء ) فنده د- محمد على تامر وقال له هات كوباية ميه لأباه احمد (اخوك الكبير) .
فردت العفريته الصغيره اسمهان قائله (إسقه عسلا)........وأعطه رطبا ......
هههههههههههههههههههههههههههههههههههههههههه





كيف تدعم-ين الحوار المتمدن واليسار والعلمانية على الانترنت؟



رأيكم مهم للجميع - شارك في الحوار والتعليق على الموضوع
للاطلاع وإضافة التعليقات من خلال الموقع نرجو النقر على - تعليقات الحوار المتمدن -
تعليقات الفيسبوك () تعليقات الحوار المتمدن (0)


| نسخة  قابلة  للطباعة | ارسل هذا الموضوع الى صديق | حفظ - ورد
| حفظ | بحث | إضافة إلى المفضلة | للاتصال بالكاتب-ة
    عدد الموضوعات  المقروءة في الموقع  الى الان : 3,399,303,263
- لغة ألرقام وائمة لهو الحديث
- ترجمان القرآن وأموال اليتامى والنسوان
- حاكموا الشيخ شلتوت-3-3
- حاكموا الشيخ شلتوت-2
- ردا على السيد--اشرف عبد المقصود
- حاكموا الشيخ شلتوت --1--
- القرآنيون بين حرية التفكير وسيوف التكفير 1
- رسالة الصحابه
- كنت أحسب انى خازن لبيت مال المسلمين
- كنت احسب انى خازن لبيت مال المسلمين
- البخارى وفقر الدم
- البخارى وعلم ألانساب
- أمن العالم يبدأ من القاهره
- مصر فى خطر يا مبارك
- تعقيب على تصريحات البابا
- مصر بين مبارك ومهدى عاكف
- مصر بين الخليفه الثالث والخليفه الثالث
- مين يشترى الورد منى
- فضيلة المفتى وتمثال حبيبى
- التياران المتصارعان


المزيد.....




- عمر هلال يترأس بجنيف افتتاح قسم الشؤون الإنسانية للامم المتح ...
- 24 عاما منذ العرض الأخير.. دور السينما بغزة جدران دون حياة
- مسابقة -تشايكوفسكي- الموسيقية الدولية تحقق أرقاما قياسية
- العثماني وأمزازي يطلقان البرنامج الوطني للتربية الدامجة لفائ ...
- الجامعة العربية: الاهتمام بالتعليم ومواجهة التطرف وتعزيز ثقا ...
- السفيرات والسفراء الجدد: المهام الوطنية الجسام
- -منتدى شومان- يحتفي بإشهار -ثلاثية الأجراس- لإبراهيم نصر الل ...
- 15 جامعة روسية ضمن تصنيف -شنغهاي- لأفضل جامعات العالم
- الفريق النيابي للبام يهدد بمقاطعة لجنة برلمانية
- العثماني يشدد على محاربة الاحتكار والمنافسة غير الشريفة


المزيد.....

- الاعمال الشعرية الكاملة للشاعر السعيد عبدالغني / السعيد عبدالغني
- مسرحيات (برنارد شو) توجهات لتوعية الإنسان / فواد الكنجي
- الملاكم / معتز نادر
- النقابات المهنية على ضوء اليوم الوطني للمسرح !! / نجيب طلال
- الاعمال الكاملة للدكتور عبد الرزاق محيي الدين ج1 / محمد علي محيي الدين
- بلادٌ ليست كالبلاد / عبد الباقي يوسف
- أثر الوسائط المتعددة في تعليم الفنون / عبدالله احمد التميمي
- مقاربة بين مسرحيات سترندبيرغ وأبسن / صباح هرمز الشاني
- سِيامَند وخَجـي / عبد الباقي يوسف
- الزوجة آخر من تعلم / علي ديوان


المزيد.....


الصفحة الرئيسية - الادب والفن - عثمان محمد على - بلح المدينه