أمان صقر
الحوار المتمدن-العدد: 7275 - 2022 / 6 / 10 - 19:46
المحور:
الادب والفن
3- من قصاصات .. أمان صقر
البنت دي ما حْلمْتش إني أشدّها
ولّا في يوم ..
يكون لي رُكْن ف قلبها
زي الفراشة بألف لون..
قمر حنون
زى الغصون خضرا .. وعالية بطبعها
فيها من دنيا البنات
ألف وردة ف خدّها
وما شفتهاش.. شايلة الهموم
أو ساندة بإيدها .. خدّها
تستني فارس معاه حصان
جي .. يطلب ودّها
هي اللي راحت للنجوم..
من غير ما تعرف ردّها
هي اللي صاحبت .. إلشموس ..
وراجعة سعيدة بصهْدها
ماشية علي وش البحور
ورا كل موجة تعدها
فاردة الدراعات للحياة
عايشاها طولها وعرضها
مريم جديدة بتناجينا
صاينة شرفها وإبنها
هي اللي بتعيد الحكاية ..
والقصة تخلص عندها
وإيه بقي ..؟!
عصفورة عاشقة الزقزقة
والشقشقة
حابّة الحياة ومحنْدقة
خدّينْها ( صَدَفة .. ولؤلؤة )
ضفايرها ..علي طول المدى
عصفورة عاشقة الزقزقة
والشقشقة
بتقوللي أدوّر ع الصدي .. متشوقة
و لقيتني .. محتاج اللقا
أيوه اللقا.. والملتقي.
#أمان_صقر (هاشتاغ)
كيف تدعم-ين الحوار المتمدن واليسار والعلمانية
على الانترنت؟