المسحراتي- 2

أمان صقر

الحوار المتمدن-العدد: 7259 - 2022 / 5 / 25 - 23:44
المحور: الادب والفن
    

ن قصاصات أمان صقر –



ما كنت حْداكي عامنوّل

حاجيب القصة م الأول

يا قاهرتي .. أنا جايلك

قسيتي .. ولا حنّيتي

في نني العين أنا شايلك

ومهما بعدتي انا طايلك

بزهوة عمري .. حنيتي

كفوفك .. والعيون بيتي

دانا سنيني.. حكاوى

ضافرها بإيدي فى جدايلك (*)

ومكتوبلي كدا .. أحايلك

قبِلْتي ولا صدّيتي .. أنا جايلك

عاتبتي أو ما ردّيتي

لتاني مرة حاوصلك

وشوق ع البعد ..واصلك

مأذّيني .. اللي حاصلك

سلامتك م الألم .. والبين

ـــــــــــــــــ

سلامتك م السلف والدين

ومن ظلم الولاد الشين

ومن جهل الغجر والضيم

راح اتطهّر .. وأتوضّي وأدعيلك

وف أول خلوة راح أصلي

في صحن السيدة نفيسة

ومش حاخجل وأدعيلك حتي ف كنيسة

يعيدلك ربنا .. بصيرتك .. ومنزلتك

ينور ليكي قناديلك

ومنها ح عدّى .. ع الحنفي

سنين واخدِك أنا ف كنفي

وشايل همك الكافي .. علي اكتافي

مع المحاسيب ..مع المجاذيب .. أنا حافي

وزى ما داب .. زمان قلبي ..

أخاف يدوّبوا القدمين .. ولو دابو

حاطير واحط في الحلمية ..وابو الريش

وما تلومينيش .. دانا الدرويش

حا لفّ وراكي من عطفة.. إلي عطفة

وبين اللفة.. واللفة .. أخاف علي عقلي م الهفّة

وخايف يا ام قلب ضنين

تردى في الهوى بابك .. وتنوي البين

دا قلبي ع المدي.. ف طوعك

وفات عمرى .. ما رديت له ف ليلة بيبان

بيبانه اللي كانت مفتوحة .. تمللي منها للشارع

وحلمي فيكي يا صبية .. جدع فارع

شايل عودُه .. وجنبه جيتار

بيتبتل ف محرابك.. حياته وقِبلته .. بابك

حكاياته شموع .. تضْوِى ف حواريكي

مفندق كل شبابيكه.. وشبابيكي

عشان الاحباب.. وفي الحسينية بيعدّى

لباب الشعرية .. باب النصر .. مرجوشي

أخدنا معاد مع أحبّة .. ولا جوشي

يا عينى.. عن عيني .. لدمعتي حوشى

وحوشي ليها .. كام ضحكة

و.. وارْبي للحنان .. سكة

في ميت عقبة ..والسكاكيني

والدقي والجمالية .. يا جميلة

حا اشيلك والله ف رموشي

وأخليكي ..في لحظة صفا ترِقّى

ولما أجيلك .. أتدندش

بلاسة ..وانفش كده .. ريشي

بين الرفاعي .. والسلطان حسن

كانت لنا قعده ..في حضرة حبيب

بقالي .. زمان ما شفتوشى

نسيم م الجنة يوصلّك.. يرد الروح

وتبدأ رحلة الأحلام .. ويحلوّ الكلام .. والبوح

أما الغورية .. فدول أهلي

حبيبتي والله تستاهلي

مناديلي وخلاخيلي .. وتوب قصب بلون نيلي

وطرحتين من المخمل .. ح أقدمهم

يا غالية ف طلعة المحمل

يا خان الخل .. يا خليلي

حاسب شوية .. نزّلني وهدّي لي

واصُرّ الفرحة .. لـ أحبابك في منديلي

وفي الفيشاوى ريّحْنا .. في ركن بعيد دا مطرحنا

وخدنا شاينا والشيشة.. وبصّينا فْ ريحنا .. و لقينا

تاريخنا .. قاعد بطربوشه

بنكهة عمرنا يحكّي .. نجيب محفوظ وحرافيشه

وطول رمضان يسحّرنا .. يفكّرنا بفؤاد حداد ودراويشه

ووحوي صغار بفوانيسنا .. في حارة سد ونّسْنا

وعبْ قدوس.. معاه يئسنا.. ناخد عادة(1)

ــــــــــــــــــــــ

قوام سكّتنا .. بياميشه

ورغم همومنا .. وسأمْنا ..

يجينا العيد سوا.. نعيشه

وع الصاجات ونار الفرن

يلاغي الكحك مناقيشه

وحقه عمنا يحيى ما دام ساكتة يناديلِك (2)

بدال الزيت حاطط روحه .. في قنديلِك
حاولنا نقول له دا كفاية .. أصرّ بقلبه يديلِك

كإنك بنته .. بيْعولِك

وما قدرناش سوا .. نحوشه

حصيلة عمرنا الأخضر بقت للعمر تحويشة

وثروة.. وبالي ما نسيشي

وعن إدريس ونداهته ..مع نباهته

وْملاحة طيشه .. وعياقته

يعاند حلمنا وبُوحْنا

وجرح جاهين مع جراحنا

وكل مواهبه في المحنة

ورغم غنانا وطموحنا
نعيش بالكاد

ـــــــــــــ

دفا ودافيين كدا إحنا ..

بنوهب للعلا روحنا

،،،،،،،

كأن الحلم دا هدية ..

صحيت منه علي صوتهم

حبايب م الخيامية .. نادوني بحُب قالولي:

خد لك حتة علقها في مندرتك

حبايبك من الفجالة.. لسّاهم في سيرتك

والآلاتية.. ف محمد علي .. طالبين مشورتك

في لحن قديم.. غناه.. صافي

وابن طولون دا متعافي.. باني مدرسة وجامع

وللأوليا والطهّار.. هنا جامع

ومحضّن بقفطانه علي زينهم وعين الصيرة

وفي الإمام والتونسي .. حافظ حقوق الجيرة

وفى الجيارة .. مارى جرجس وفى البساتين

حبايب .. جولنا ع السيرة

ونامت.. في حضنك يا قلعة

المغربلين ، وسوق السلاح

وزاد كرمِك في ساحة براح ..

ولادك دول مع ضيوفك

ومنديلنا المحلاوى .. فرشناه

.. ف ركن رصيفك

وسيييييعة في الصيييييف الحصيرة

عيش وملح .. ومية زلااااال .. وتصبيرة

وقيــّـلنا .. وشيــّـلنا .. حبايبنا هدايا

.. وخدنا تصويرة

ولما قلنا حنسافر .. أخدناهم كده .. بالحضن

ودوّبنا في أحضانا .. تلال م الشجن والحزن

ولإنك حبيبة العمر باتصور .. يا غالية.. إني أغلي حبيب

وعشان لقانا نصيب.. فراقنا كان برضه نصيب
،،،،،،،،،،

راح أنوى.. والمشيئة لربِّك .. أنا جايلك

وسامحيني عشان خاطري .. فراقك والله ما بْخُطْرى

وعن مشوارك.. لا عمري حتوب ولا أسلي (3)

ولا محتاج معايا خريطة أو بوصلة

ومهما تعبت .. راح تحلي فى عيني الرحلة

وحجيلك بورد الدنيا .. خير الدنيا.. سعد الدنيا .. ومش سهلة

فراقك ده علي عيني

فسامحيني.

ـــــــــــــــــ
(*) ضافر .. من الفعل .. يضفر الضفائر
(1) ( ناخذ عادة ) أي نحصل علي نقود كإكرامية ، و( عبْ قدوس) شخص مسيحي .
(2) المقصود هنا الأديب يحيى حقي وقصته المعروفة ( قنديل أم هاشم )
(3) ( أسلي ) ( تنطق الياء ألف أسلي ومعناها الكف عن عمل الشئ.
30 إبريل 2005

#أمان_صقر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات